Cursu di Lingua Siciliana

Song: Stornellata (Popular refrain) 

Expand Window  |   Homepage


Cursu di Lingua Siciliana 

 

    Secunnu Giorgiu Piccittu l'ortografia di la lingua Siciliana avissi a essiri ditirminata di la pronuzia di la lingua parrata. Chista fussi na bona regula, ma, comu nni ogni lingua, nni la lingua Siciliana ci sunnu dialetti, gerghi e nflissioni. Veni a diri spissu li paroli sunnu diffirenti di un paisi a n'avutru e la pronunzia varia assai di un puntu a n'avutru di l'isula. Anchi si assai genti chiamanu a lingua Siciliana dialettu, chistu è sbagghiatu. Lu Sicilianu è na lingua e comu tali avi li sô dialetti. L'unicu problema, ed è un problema granni, è ca nun avemu reguli scritti di la nostra lingua: na grammatica, na sintassi, un trattatu di ortografia, pi farinni assirìri chi lu Sicilianu è na lingua naziunali, o riggiunali, di la Sicilia. Nuiavutri avissimu ad aviri reguli di grammatica e sintassi unni l'ortografia e la funetica avissiru a essiri parti intigranti di lu prucessu. Avemu tentativi di grammatica e di ortografia ma nun avemu nu studiu cuncritu e apprufunnutu di sti materi.

    È na cosa strana ca li straneri hannu dimustratu sempri ntiressi pi la nostra lingua, la nostra storia, la nostra littiratura, li nostri tradizioni. ecc., mentri nui Siciliani avemu sempri pigghiatu comu na cosa senza cuntu chiddu chi avemu, finu a lu puntu ca la nostra lingua sta murennu, e cu idda mori puru lu nortu passatu, la nostra storia e li nostri tradizioni. Mi dispiaci diri chi tuttu chistu è simplicimenti virgugnusu. Nui Siciliani nni avissimu a virgugnari di trattari accussì a nuiatri stissi. Appuntu pi chistu ora iu provu a scriviri un cursu brevi di lingua Siciliana, pi circari di fari chiddu chi pozzu pi aiutari la nostra lingua, pi daricci quarchi ghiournu di vita di cchiù, si è pussibili. Lu vogghiu fari pi ddi Siciliani chi dicinu chi hannu bisognu d'aiutu pi nzignarisi a scriviri lu Sicilianu, e pi circari di sprunari a quarcunu, macari pulemicamenti, a scriviri na bona grammatica, na sintassi, un trattatu di ortogragfia.

    Vogghiu pruvari di stabiliri certi reguli quantu riguarda la lingua Siciliana scritta, aiutannumi cu G. Piccittu, cu G. Pitrè e cu lu mê istintu di Sicilianu. La Sicilia è na nazioni cu la sô lingua, lu sô guvernu e li sô liggi, e mentri tanti avutri riggioni di l'Italia hannu già fattu appruvari lu dirittu di aviri avutu la sô lingua dichiarata lingua ufficiali di la propria riggioni, nui Siciliani semu ancora nta nu statu litargicu e apateticu, comu di solitu,versu la nostra matri patria e chiddu chi idda rapprisenta.