Un Cappucciu Pun Curnutu
Expand Window  |   Homepage

 

    Doppu la longa spirienza musulmana, la Sicilia, nta lu 1061, addivintò  uggettu di la cunchista Nurmanna. Rubertu lu Guiscardu avia addivintatu forti nta l’Italia miridiunali sia pi l’ambizioni chi l’ammuttava ca pi li mbrogghi pulitici nte quali avia addivintatu mastru. Arricanusciutu dû papa Nicola II comu Duca di li Pugli e di la Calabria, detti la Calabria comu cuntia a so’ frati Ruggeru. Avennu li du frati cummattutu comu miricinari sutta l’impero bizantinu, cu lu ginirali Maniaci pi libirari la Sicilia di li musulmani, si ritiraru poi nta l’Italia miridiunali, pi nun putiri iri d’accordu cu Maniaci.

 

    Sta visita a la Sicilia però ci avia misu ntesta na pinzata, vol diri di tentari iddi la cunchista di l’isula si li bizantini nun ci arriniscevanu. Nfatti lu Maniaci, fu accusatu di tradimentu dû ginirali Stefanu Calafatu doppu la battagghia vicinu a Troina, forsi pi n’erruri di stratigia di lu stissu Stefanu Calafatu. Giorgiu Maniaci e Steafanu Calafatu appiru na sciarra di paroli e doppu di chistu Stefanu accusò lu Maniaci di tradimentu e fu subitu richiamatu a Custantinopoli e misu mprigiuni.

 

    Senza d’iddu l’esercitu bizantinu nun sappi risistiri a li forzi musulmani. Li bizantini foru scunfitti e appiru a lassari l’isula.

 

    Fu accussì ca doppu un pocu d’anni, avennu nasciutu certi attriti tra li capi musulmani di la Sicilia, lu Kaid di Catania circò aiuto a li Nurmanni contru lu Kaid di Enna, ca era so’ cugnatu.

 

    Rubertu e Ruggeru passaru lu Strittu cu cocchi milli fanti e un pugnu di cavaleri e occuparu bona parti di la parti nord-orientali di l’isula. Rubertu pi ragiuni pulitichi appi a turnari nta la bassa Italia e Ruggeru arristò sulu a cummattiri li musulmani. Lu prugressu fu lentu e chinu di sangu e ci vosiru trent’anni pi Ruggeru assuggittari tutta l’isula, stanannu a picca a picca tutti li musulmani ca s’avianu sbarricatu nta ddi tanti furtizzi di la Sicilia.

 

    Doppu chistu Ruggero si pigghiò lu titulo di Gran Conti di Sicilia e Calabria, ma sempri sutta l’atorità di Rubertu. Quannu muriu iddu, Ruggeru arristò sulu a cuvirnari lu novu duminiu chi lu mannò avanti cu prudenza, saggizza e priviggenza facennulu addivintari lu primu regnu assolutu di l’Europa.

 

    Mortu Ruggeru nta lu 1101, pigghiò la riggenza la mugghri Adelaide, pi lu figghiu minorenni Ruggeru II, lu quail appena arrivò all’età ligali, si pigghò lu cuvernu di la cuntia. Ruggero siguiu li passi di lu patri, riniscennu a fari di la Sicilia lu Statu cchiù  attrattivo di l’Europa, tantu ca la Sicilia si varagnò lu titulu di “Iardinu di l’Europa”.

 

    Sutta lu cuvernu di Ruggeru tutti, arabi, latini,greci, francisi, e ngrisi campavanu nzemmula e n paci, Ruggeru lassò libirtà di riligioni e di lingua, anche si sutta d’iddu cintinuò la latinizzazzioni di la lingua e n’apirtura cchiù granni versu lu cristianesimu, accuminciati di so’ patri. Cu lu bon cuvernu e la manu forti sappi teniri sutta li baruna finu a farisi numinari Re di Sicilia, chi, cu la morti di so’ cucinu Ruggeru Duca di Puglia, ora abbrazzava tutta l’Italia Miridiunali.

 

    A la so morti lassò eredi lu figghiu Gugliermu, ca pi lo modu di fari e pi lu pocu ntiressi versu lu populu fu suprannuminatu Lu Malu. Lu cuvernu di Gugliermu I fu affrittu di cungiuri di palazzu di spidizioni militari zenza rinisciuta; ma chiddu ca ci appiccicò lu suprannomu di Malu, comu si dissi, fu la so’ politica fiscali assai pisanti finu a lu punto ca arritirò tutti li muniti d’oru e li fici fari di coriu

 

     A la so’ morti, nta lu 1166, ci succidiu lu figghiu ancora nicu Gugliermu cu lu titulu di II. Puru iddu appi assai chi fari cu li cungiuri di palazzu e puru a iddu ci vinni appiccicatu un suprannomu, ma a lu cuntrariu di lu patri, vol diri “Lu Bonu”, pi lu so’ bon fari e pi lu maistusissimu Domu di Munriali chi fici custruiri, e di lu quail li siciliani sunnu urgugliusi, tantu ca asisti un dittu chi dici ca:” Cu va Mpalermu e nun va a Munriali, ci va sceccu e torna animali”.

 

    Puru Gugliermu Lu Bonu tintò d’allargari la so’ putenza tirrituriali e nta lu 1184 mannò n’esercitu putenti e numirusu contro Andronicu I Conmeno, Mpiraturi di Costantinopli. Andronicu era lu tuturi di lu Mpiraturi ancora giuvini Alessiu II, ca lu tuturi stissu fici ammazzari nta na cungiura di palazzu pi mpatrunirisi di l’Imperu. Andronicu era un dilinquenti senza murali e senza cuscenza e arraggiunava cchiù di briganti ca d’impiraturi. Nfatti, abusannu di lu so’ putiri, facia mprigiunari o anchi ammazzari li so’ aiutanti di curti pi poi pigghiaricci li muggheri e abusarisinni, cosa ca facia puru cu avutri nobili anchi si eranu fora di la spera cuvirnativa, dannu ordini a li so surdati cchiù fidati di iri a pigghiari tali e tali signura e purtariccilla a la curti.

 

    Mancu la cosa finia ddocu, anzi pi scornu nta tutti li casi di li famigghi chi iddu avia abusatu, faceva appizzari davanti la porta un paru di corna di armali chi iddu avia ammazzatu a caccia.

 

    Li surdati siciliani, quannu occuparu la cità e si truvaru davanti stu spittaculu, nun pottiru capiri chi significava e vidennu subitu ca era na cosa tinta e di malu gustu, dumannaru na spiazioni.

 

    Turnati n Sicilia li surdati, ca ntantu avianu parratru assai ntra d’iddi di sti corna appizzati all’entrati di ddi palazzi, arrivaru a la cunclusioni e cuntavanu chiddu c’avianu vistu e ntisu e cuncluderu ca lu maritu ca era tradutu, vuluntariamenti o nvuluntariamenti era “curnutu”, cosa ca si spargiu prestu pi tutta l’Europa.

 

    Pari ca tra l’antichi rumani stu nomu asistia e chi puru avissi na certa mpurtanza picchi dava onuri e vantu a cu lu purtava. Ma pi chiddu ca custataru li surdati siciliani a Custantinopoli, la parola pi iddi pigghiò un significatu assai offinsivu. Pi li siciliani prestu dda parola addivintò na forti offisa all’onuri. Ora pi li siciliani l’onuri è sacru e si quarcuno lu macchia si pò lavare sulu cu lu sangu. E mentri li giappunisi si perdinu l’onuri fannu “Karakiri”, vol diri s’ammazzanu pi ricupirari l’onuri pirdutu, li siciliani ammazzanu prima l’omu ca fa l’offisa e si c’e curpa di parti di la muggheri ammazzanu puru a idda.

 

    Si dici ca nta certi parti di la Sicilia fôru fatti di li liggi pi cui si un maritu nun si minnicava di l’offisa all’onuri, vinia cunnannatu a girarri un ghiornu cun cappucciu ntesta, facennu a capiri a tutti ca s’ammucciava li corna. A Modica finu a dui seculi e menzu nn’arreri, un maritu chi campava vinnennu li biddizzi di la muggheri, fu cunnanatu a girari pi la cità cun beddu paru di corna attaccati n testa.

 

    Lu munnu di oggi nun e cchiù chiddu di cent'anni fa e sti cosi nun succerinu cchiù. L'idei di la genti hannu canciatu e quasi nuddu si voli ruvinari la vita pi na cosa di chissi. Ora si usa lu divorziu o la liggi.