Sicilia: Piriudu Anticu
Expand Window  |   Homepage

    Quannu cuminzò la storia di la Sicilia? Chista è na dumanna a cui li storici nun hannu truvatu mai risposta. Certu ca è impussibili truvalla, picchi storia significa fatti successi e pruvati cu documenti, ducumenti chi dicinu chiddu ca ha successu ntô passatu. Di la storia di la Sicilia nuiatri nun avemu ducumenti, picchì l’arti di la scrittura, cuntrarimenti a la civilizzazzioni eggizziana e ad autri di lu vicinu orienti, nta l’occidenti ancora nun si canusceva. E puru avemu nutizzi apprussimati di l’arba di la Sicilia pi mmenzu di storii cuntati di ginirazzioni in ginirazzioni, di poeti-cantastori (Omeru?) chi cuntavanu l’atti iroichi di l’omini, quannu ancora nun si canusceva la scrittura e poi pi mmenzu di Tucididi e Erodotu, storici greci, li quali nni riportanu chiddu chi si sapeva dû passatu, tramannatu di vucca ‘n vucca e pecciò cu na basi storica debuli, ma tantu utili.

    Avutri nutizzi cchiù o menu ricenti nni l’ha datu la paliontoluggia, ca è na scienza affirmata, e chi pi mmenzu di scavi, avi rinisciutu a fari un certu lustru supra l’abbitanti di la Sicilia di cocchi tri mila anni fa e anchi di prima. Perciò si pò diri ca la pristoria di la Sicila, nni veni di cunti, tradizzioni, puemi e scavi archiologgici. Pi mmenzu di li surgenti tradizziunali orali, avemu nutizzi di la Sicilia accuminciannu di lu tardu neoliticu, vol diri accuminciannu di la fini di l’età di la petra e ntra lu menzu di l’eta` di lu ramu e di lu brunzu. Ed è pi menzu di sti cunti e liggenni ca sapemu ca li primi a abbitari l’isula foru li Ciclopi e li Listrigoni.

    Li Ciclopi, secunnu la liggenna eranu omini di na statura sprupurziunata, cun sulu occhiu nta la frunti, genti bona ca si didicava a la pasturizia, mentri li Listrigoni eranu chenchi viulenti di latri e assassini: barbari. Anticchia di tempu doppu, versu lu seculu tridicesimu a.C., prima di la distrutta di Troia, certi genti di l’Iberia sbarcaru nta li costi nord-occidintali di la Sicilia e cuminciaru a curtivari la terra e a organizzarisi in cumunità. Percciò nun si trattò di n’occupazzioni ma di na migrazzioni, pi truvari un postu megghiu e cchiù tranquillu. Sti genti fôru chiamati Sicani, picchì si dici ca vinianu di vicinu a lu ciumi Sicanu nta la pinisula iberica e lu sò re, secunnu la tradizzioni, era Cocalu. Tucididi (V seculu a.C.) dici ca li Sicani eranu un populu origginariu di la Sicilia, voli diri di razza siciliana.

    Cocchi tempu doppu n’autru gruppu di genti, a quantu pari, di l’Italia Cintrali, sbarcò nta li costi orientali di l’isula e li chiamaru Siculi, pigghiannu lu nomu di lu so' capu ca si chiamava Siculu.

    Duranti tuttu stu tempu parissi ca li Finici avissiru stabbilutu certi rapporti cummirciali cu l’abbitanti di l’isula e certi punti d’appoggiu pi lu cummerciu ca facianu ntô Meditirraniu e pari puru chi li greci avissiru visitatu l’isula cchiù di na vota.

    Si dici ca li Finici, un populu assai cchiù avanzatu di civilizzazzioni, avisssi datu pi la prima vota l’arfabetu all’abbitanti di la Sicilia, un arfabbetu cumpostu sulu di vintidui cunsunanti, e a sti cunzunanti li greci cchiù appressu cci agghiunceru li vucali.

    Ma la storia propriamenti scritta nun accuminzò finu a lu V seculu a.C. E puru a stu puntu, parrannu sempri dû passatu, avemu sulu scarsi nutizzi supra la Sicilia, chi, comu si dissi, nni fôru dati di Tucididi quannu s’intirissò di la guerra di lu Peloponnesu.

    Mancu li Greci vinniru nta Sicilia cu l’intentu di occupalla, nun vinniru cu n’esercitu armatu, ma, comu li sicani, fu un muvimentu di migrazzioni, duvutu a li duri cundizzioni di vita nte so' nazzioni, causati di situazzioni pulitichi, ecomomichi e suciali. Nfatti appena sbarcati nta li costi orientali di l’isula, essennu genti cchiù avanzata in civilizzazzioni, espropriaru li terri a li Siculi e li cacciaru versu l’internu di l’isula, facennunni un bon numaru priciuneri pi usalli comu schiavi. La prima culunia greca fu Naxos, funnata ntô 750 a.C., mentri ntô 734 a.C., li Corinzi, cu a capu Archia, sbarcaru a Ortigia e funnaru un paiseddu chiamatu Siracusion, picchì era vicinu a na terra margiusa chiamata Siraca. Appressu nasciu Palazzolu Acreidi ntô 664 a.C. e Camarina ntô 598 a.C. Cu lu stissu nomu di lu ciumi Gela fu funnata la cità di Gela ntô 589 a.C. di un populu ca vinni di l’isula di Creta e chi poi funnò Agrigentu (Akragas) ntô 581a.C.

    L’unica culonia custruiuta di li greci nta la parti occidentali di l’isula fu Selinunti. Nzemmula a tutta sta genti, truvamu l’Elimi, un populu mistiriusu chi certuni dicinu ca sbarcaru ‘n Sicilia doppu a caduta di Troia e perciò profughi truiani ca, stanchi di viaggiari, nun vosiru siguiri cchiù a Enea, autri dicinu ca vinniru di l’Etruria, assicutati di l’etruschi; truvamu puru l’Ausoni nta l’isuli Pelagi chi vennu di diffirenti parti di l’Italia e, comu si dissi, li Finici chî so’ avamposti comu puntu d’appoggiu pi lu so’ cummerciu nta lu Meditirraniu. Si dici ca fôru iddi ca funnaru Palermu.

Finu a ora semu ancora nta la scena di la liggenna, ma liggenna storica.