Li Greci in Sicilia
Expand Window  |   Homepage

    Secunnu Tucididi, li Calcidisi, cu a capu Teocli, fôru li primi greci ca vinniru ‘n Sicilia e frabbricaru la prima culonia greca chiamata Naxos, versu lu 735 a.C. Picca tempu doppu vinniru li Corinzi e frabbricaru Siracusa vicinu li terri margigni di Siraca. Un populu venutu di Creta frabbricò Gela e doppu, versu lu 580 a.C, Agrigentu., chi lu pueta Pindaru chiamò “la cchiù bedda cità di li murtali”. Zancle canciò nomu e divintò Missina nta lu 491 a.C., picchì fu occupata di un populu scappatu di priggiunia chi avia origginatu a Messena nta la Grecia. Li Siculi c’abbitavanu la zona orientali di la Sicilia, si ribbillaru a st’occupazzioni di genti strania, ma foru supraffatti di li greci c’avianu cchiù armi e cchiù cunuscenza di l’arti di la guerra.

    La Sicilia avia vistu cchiù di na migrazzioni, ma nudda nzinu a ora avia statu ostili a l’abbitanti. Li Finici avianu vinutu senza ncuitari a nuddu, sulu mittennu cocchi basi cummirciali pi travagghiari cu li nazzioni di lu Miditirraniu e puru cu l’abbitanti di l’isula. Ma mentri li Finici avianu fini cummirciali senza pinzari a culunizzazzioni, li Greci, nveci vinniru cu autri pinzati. Iddi ficiru na mmigrazzioni nta la Sicilia, traseru, assicutaru l’abbitanti liggittimi di la zona orientali e s’impusissaru di la terra cu l’idia di curtivalla e farisi na casa e na patria. Iddi eranu cchiù ntirissati a l’isula pi lu benessiri pirsunali e la libbirtà pulitica e ecunomica. Li primi greci ca vinniru n Sicilia eranu na genti povira e vinianu pi farisi na vita megghiu ca nun si putianu fari ntê so cità-nazzioni a causa di la curruzzioni pulitica, di tassi esaggirati e di la tirannia di li cuvirnanti, chi ntaccavanu assai nta la libbirtà di li populi.

    Prestu, puru n Sicilia, si ficiru cità-statu putenti, e cuminciaru a luttari l’una contru l’autra pi suttamettirisi l’una cu l’avutra e divintari ognuna cchiù putenti. A causa di chistu nasciu la ligislazzioni p’addifenniri li poviri contru li putenti, e li provi li truvamu prima nta li rivuluzzioni civili e poi nta li liggi di Caronda, chi misi liggi contru li disirtura e li tistimoni favusi e s’intirissò assai di lu benessiri di li picciriddi, speciarmenti di l’orfani. Iddu fu lu primu nta la storia ca ubblicò lu statu a pagari la scola pi li picciriddi poviri. Assai capi di statu greci, ca ora amu a chiamari “sicilioti” (accussi foru chiamati li greci di Sicilia doppu ca s’affirmaru nta l’isula), fôru tiranni tinti contru lu populu , ma nun fôru tutti. Ci nni fôru ca luttaru pi la dimocrazia, cci fôru chiddi ca luttaru pi teniri l’innipinnenza di l’isula. Geloni di Siracusa e Teroni di Agrigentu sarvaru la civilizzazzioni occidintali contra li Cartaginisi nta lu 480 a.C. a Imera, e nta lu trattatu di paci cci mpuneru a li Cartaginisi, di nun sacrificari cchiù li primi nati masculi a li dei quannu arrivavanu a deci anni, mentri Geroni, puru di Siracusa firmò l’espanzioni di l’etruschi a Cuma.

    Cu tuttu chistu li greci trattaru malamenti l’abbitanti di la Sicilia, ‘n particulari li Siculi ca cu a capu Duceziu si ribbillaru a li greci e li luttaru cu successu finu a lu 446 a.C. Poi li greci vinceru e a Duceziu lu mannaru ‘n esiliu a Corintu. Duranti la Guerra di lu Peloponnesu, Atene attaccò la Sicilia ma si pigghiò na bona scunfitta e la sò flotta vinni tutta pigghiata di li greci sicilioti nta lu 415 a.C., e Nicia, lu sò ammiragghiu, s’ammazzò mentri era priggiuneru. Tra li greci sicilioti ci fôru omini di valuri e di granni ncegnu. Archimedi di Siracusa lassò signali ca mancu lu tempu po` cancillari. Li sò principi di fisica sunnu usati ancora oggi. Lu filosufu e matimaticu Emppedocli di Agrigentu, ca si dici ca la sò curiusità pi lu sapiri lu fici cadiri dintra l’Etna unni iddu avia iutu pi vidiri chi succideva dintra la vucca di lu vurcanu. Lu pueta e filosofu Archistratu ca fu l’auturi di lu primu trattatu di cociri: “Lu bonu gustu”. Pindaru e tanti autri chi nasceru tutti nta Sicilia e Stesicoru ca fu unu di li cchiù bravi pueti Sicilioti e fu pigghiatu a mudellu puru di lu pueta latinu Virgiliu, e Timeo di Taurmina unu di li storici cchiù granni di la Sicilia e tanti, tanti autri.

    Autri forti mprisi ficiru li sicilioti, comu Dionisiu I chi scunfissi li Cartagginisi e addivintò lu patruni di lu Miditirraniu custruennu culonii puru nta la Magna Gercia. Li sicilioti, brillaru nta la Sicilia comu na luci nta la notti, sia pi cultura, pi pulitica e pi ligislazzioni e addivintaru la putenza cchiù forti di lu Miditirraniu. Cu tuttu ciò nun appiru lu cuncettu di statu-nazzioni. Emigraru in Sicilia n cerca di na terra megghiu e cchiù amica e quannu cuminciaru a ciuriri, si orgaizzaru a cità-statu e cuminciaru a farisi guerra l’unu contra l’autru, ignurannu li Siculi, li Sicani, l‘Elimi e puru li Finici. Pinzaru di na manera egoistica e nun tintaru mai di riuniri la Sicilia sutta un sulu cuvernu cu na sula lingua. Finu ca n Sicilia c’eranu li Siculi, li Sicani. li Finici e l’Elimi, chistu nun si putia fari, picchì nta un certu senzu , nun si trattava di un populu sulu ma di gruppi di populi cun numaru limitatu di genti di diversu modu di pinzari e di diversi lingui. Li greci c’avianu espirenza di pulitica, di civilizzazzioni, di custumi suciali ecc., eranu un populu unicu, cu na sula lingua ma iddi nun ficiru autru chi cupiari li cuverni d’unni vinianu e accussi nasciu n’autru sistema puliticu comu nta la Grecia.

    La genti suttavaluta l’unità chi ci voli pi teniri un populu unitu. Li Greci cridevanu ca appartinevanu a la stissa razza; pussidevanu na lingua e na littiratura cumuni e cridevanu nni li stissi dei. Tutti li Greci participaru a li iocura Olimpichi. Avianu un nimicu cumuni: I Persiani, ca minacciavanu la libbirta`d’iddi. Eppuru chisti nun foru liami forti abbastanza pi supirari dui fattura: patriuttismu lucali e cundizioni giugrafichi chi ca facianu nasciri divisioni pulitichi. Cu lu tempu li Greci di Sicilia si ficiru accussi ricchi, e campavanu cu tantu lussu, comu si ddu iornu fussi l’urtimu iornu pi iddi. Nzumma la curruzzioni civili, pulitica e murali fu accussi forti, ca a causa puru di nun aviri pinzatu di fari di la Sicilia nu statu unicu, doppu la ribbellioni di li Siculi accuminciata nto 466 a.C., e finuta cu la scunfitta di Duceziu nta 446, l’egimunia greca cuminciò a dari i primi signali di la sò morti. La dibbulizza a cui s’arridduceru li Greci, purtò li Mamirtini a accupari Missina e chista fu la fini di la putenza Grecu-Siciliota. Chista fu la scusa chi purtò li Rumani in Sicilia.