Com'e Fattu u Sicilianu
Expand Window  |   Homepage

Di Gaetano Cipolla
Traduzioni n Sicilianu di Ninu Russu

L'italia senza a Sicilia nenti cunta, a Sicilia senza l'Italia nun si scanta. Dittu pupulari sicilianu.

    È na cosa ironica ca la maggiuranza di li Miricani canuscinu lu nomu di la Sicilia, anchi si la Sicilia è na isula nica, a stentu un quartu di l'isula di Cuba, mentri hannu diffiultà a lucalizzari nazioni cchiù granni nta lu munnu. Accussì la prima cosa chi forsi putemu diri pi la Sicilia è ca occupa un postu di rinumanza nta la cuscenza muderna Amiricana e Europea ca nun currispunni a la so' mpurtanza ecunomica e pulitica prisenti. Sta sprupurzioni apparenti, comunqui, cchiuttostu chi essiri na cosa nun comuni, e la regula di l'isula. Nsemi pi chiddu chi idda ha cuntribuiutu a lu munnu e nni la percezioni chi li genti hannu d'idda, pari comu si ci fussi n elementu di iperbuli e esaggerazioni chi duna culuri a qualunqui cosa chi è siciliana. La Sicilia, comu recentimenti dissi Ben Morreale nta un so' articulu, ha statu un talismanu pi li putenti: la dominazioni di lu meditirraneu ha stato sempri attaccata a lu pusessu di l'isula. Inversamenti, la perdita di l'isula ha marcatu sempri lu diclinu di l'imperi.

    Quannu la Sicilia fu accupata di li massi Vandali, Roma cadiu; li Bizantini persiru lu cumannu 'n Italia quannu l'Arabi accuparu la Sicilia; li Burbuna persiru lu regnu di li dui Sicili, quannu persiru la Sicilia a Garibaldi. La Sicilia ha statu lu passaggiu versu l'Italia e l'Europa. E cumprinsibili ca l'Alliati la sciggheru pi cuminciari l'assartu a l'Europa nta lu 1943. La so' pusizioni giugrafica ha garantutu a la Sicilia un postu di mpurtanza cchiù granni di chiddu chi unu si putissi aspittari di la so' stissa misura, na cosa chi avi 'n cumuni cu l'Italia. Li genti hannu vinutu nta la Sicilia pi cummattiri guerri, p'arrubbaricci li so' ricchizzi, pi satari nta l'Europa. Di lu pricipiu di la storia ha statu lu puntu di cuntattu tra vari civilizzazioni ca hannu lassatu lu so' mercu nta li terri di lu Mediterraneu, lu puntu d'incontru tra Orienti e Occidenti, tra Africa e Europa.

La mappa di la Sicilia

 

    Li biddizzi di l'isula attraeru lu populu marinaru Finiciu chi fabbricaru Palermu; li mistiriusi e ndiscrivibili Elimi stabbileru na riligioni di Veniri, la dia di l'amuri, supra l'auta muntagna di Erici; li Cartaginisi cuntrullaru la maggiuranza di l'isula occidintali; li Greci cunzidiraru l'isula la terra prummisa, e na vota ca si stabbileru comu Siciliani, supiraru li cunnazziunali di la Grecia pi grannizza e biddizza di cultura; Roma costruiu l'imperu cchiù putenti di lu munnu doppu chi cunchistò la Sicilia; l'Arabi la trasfurmaru nta lu Iardinu di Allah; li guirreri Nurmanni nni ficiru lu Statu cchiù avanzatu di l'Europa e Fidiricu II, chi nasciu ottu seculi fa, nni fici lu centru di cultura cchiù mpurtanti di l'Europa. Ma la Sicilia e li Siciliani nun godinu di na riputazioni bona. Nta li Stati Uniti, o nta qualunqui parti di lu munnu, quantu riguarda a chissu, quannu la genti senti lu nomu di Sicilia, subitu nta la menti d'iddi accumparinu mmagini nfirnali e di viulenza e di briganti cu capiddi niuri, li quali cu cutedda nta li manu, sunnu pronti a fari qualunqui malazioni contru l'ordini e la liggi.. La media avi minutamenti discrittu li Siciliani accussì esclusivamenti appartenenti a la Mafia, ca li dui nomura linguisticamenti vannu nzemmula comu "pani e caciu". Lu modus operandi di li mafiusu fu mpiccicatu a tutti li Siciliani e iddi sunnu visti comu ndividui nzazziabili e senza pietà.

    Assai genti veramenti cridinu ca li Siciliani portanu la simenza, li geni, di la criminalità e di li foraliggi nta lu sangu. La distanza tra lu veru Sicilianu e l'immagini nvintata di la media è assai granni di certu e ancora crisci, giudicannu di lu film comu True Romance di Quentin Tarantino ca carattarizza li Siciliani comu minzugneri digginirati e arriva a lu puntu di mettiri 'n dubbiu l'appartinenza di li Siciliani a la razza bianca. Nni li paggini siguenti, vogghiu pruvari di prisintari un quatru cchiù bilanciatu di la cuntribuzioni Siciliana a la civilizzazioni di l'occidenti. Vogghiu fari un tentativu di darivi n'apprizzamentu pirsunali di li Siciliani e di la Sicilia, picchì nevitabilmenti la storia di na terra è la storia di lu populu chi l'abita. Cu sunnu li Siciliani, chi valura àhannu n comuni, chi cosa li fa funziunari? Comu è fattu un Sicilianu? Mi piaci accuminzari dicennu chi la riputazioni chi la Sicilia e li Siciliani hannu, àvi picca a chi fari cu l'esperenza fatta di prima manu. La stragranni maggiuranza di chiddi chi hannu iutu n Sicilia hannu mmenzamenti ammiratu li so' bbiddizzi e lu caluri di la so' genti.

    Li tanti viaggiatura chi hannu scrittu di l'Isula, accuminciannu cu lu risucuntu di Ibn Giubair, un viaggiaturi Arabu di lu dudicesimu seculu, a Roger Peyrefitte, nu scritturi cuntimpuraniu, l'hannu discrittu, cu picca eccezioni, comu un paraddisu tirrestri. Nè ci sunnu opiri di littiratura rispunzabuli pi carattirizzazioni nigativa di li Siciliani! Tanti scrittura straneri e pueta, spicialmenti a la fini di lu dicinnavumesimu seculu, visitaru la Sicilia e lassaru ntirissanti diari di li so' riazioni. Di Shelley a Byron, di Goethe a De Maupassant, di von Platen a Wagner, di Matthew Arnold a Holderlin, di Renan a Gide, la Sicilia ha statu rapprisintata comu la terra di la rinascita. Pi tanti di sti scrittura la Sicilia era un postu dutatu di tanti diffirenti qualità. Nun era chi li cosi nta l'isula eranu unichi, ma chi avianu cchiù chi nta avutri posti; lu suli era cchiù cavuru, lu vinu cchiù forti, li cuntrasti cchiù duri, li biddizzi cchiù sarbaggi, li passioni cchiù brucianti, lu panurama chi leva lu ciatu!

    Nni l'Imoraliste di Andrè Gide la sicilia è na mitafura di la forza di vita. Lu carattiri principali di lu rumanzu, Michel, è trasfurmatu di un "vecchiu" nta un novu essiri giuvini quannu veni a cuntattu cu la primavera Siciliana. Nta lu menzu di dda vigitazioni gluriusa, Michel, si senti rinatu nta un essiri novu "Et je courais sur la route escarpèe qui joint Taormine a Mola criant, pour l'appeler en moi: Un nouvel Etre! Un nouvel Etre!" (E iu curreva nta la trazzera a pinninu chi iunci Taurmina cu Mola gridannu dintra di mia: Un essiri novu! Un essiri novu!) Stu sensu di essiri rinatu 'n Sicilia fu ripitutu di D.H. Lawrence chi discrissi l'isula comu "la terra di l'arba". Iddu puru ntisi di aviri vinutu n cuntattu cu lu so' essiri nternu nni l'isula primitiva "la miravigghiusa costa di la Sicilia, comu l'arba di lu iornu, la maravigghiusa matina di la nostra epica".

    La nozioni Rumantica di la Sicilia comu un paraddisu tirrestri è difficili d'accittari quannu unu ha ntisu li vintati friddi di la tramuntana chi ciuscia di lu Munti Etna c'arrifridda l'ossa, o quannu manca l'aria nta la timpiratura di quaranta gradi centigradi di Catania nto misi d'austu. No, La Sicilia nun è un paraddisu tirrestri, mancu sucialmenti, si penzi a la puvirtà di un nummaru di la so' pupulazioni, quannu si sapi ca la disoccupazioni è cunsistintimenti la cchiù ghiavuta di tutta l'Italia. Sucialmenti e storicamenti, è cchiù comu "un paraddisu pistatu", comu Connie Mandracchia De Caro dichiarò nto titulu di l'urtimu so' libbru. È chiaru chi li giniralità nun fannu un quatru accuratu di na pupulazioni; ma pittannu a grossi pinziddati, e evitannu li banalità, mi piacissi identificari na piccaredda di li qualità Siciliani e li forzi suciali-storichi chi hannu statu la causa di furmarli.

    Facitimi diri ca la cchiù granni qualità di li Siciliani nun è tinnirizza. Comu hannu suttaliniatu tanti ossirvatura straneri. Senza dubbiu la quistioni giugraficu-climatica ha avutu un effettu nnê Siciliani. Ca si è veru ca l'Eschimesi sunnu cundiziunati di lu so' clima frigidu e di la nivi onniprisenti, facennu effettu nta la so' lingua e nni la so' forma mentis (modu di pinzari), è puru veru ca lu meravigghiusu cuntrastu prisenti nta lu panurama Sicilianu, li culura brillanti di la vigitazioni, lu ciavuru ntussicanti di li ciuri, lu spietatu suli di la stati c'asciuca li terri pi sei misi di l'annu, lu profunnu blù di lu so' mari e li so' celi chi la circunnanu, sunnu prufunnamenti stampati nni la forma mentis di li Siciliani. L'eccessi naturali di la giografia e di lu tempu sunnu spicchiati nta lu carattari di lu populu Sicilianu. Comu lu so' panurama, li cui tunalità nun sunnu mai "sfumati" (talia a lu cuntrastu tra la viggitazioni lussuriusa di la costa orientali e lu panurama lunari nudu di l'internu vicinu Enna), iddi sunnu a l'istrimità nta li so' emozioni. Lu "chiaruscuru" è priduminanti. Iddi sunnu "ardenti amici e pessimi nimici", comu dissi Giuvanni Maria Cecchi nta lu sidicesimu seculu.

    A discriviri li Siciliani, li supirlativi pari ca fussiru all'ordini dû iornu pi iddu. Citannu li paroli di Cecchi, iddi sunnu "avidissimi nel mangiare…e vivono in gran gelosia delle loro donne che le tengono molto ristrette e fanno acerbissime vendette sopra a chi hanno in suspezione". Scipio Di Castro, parrannu puru nta lu stissu periodu, cunzidirò li Siciliani "sommamente timidi", quannu si tratta di spenniri li so' sordi e "sommamente temerari" quannu si tratta di spenniri li sordi di lu pubbricu. Unu di li primi tratti carattiristici ca è cchiù 'n vista a li straneri è lu granni orgogliu chi li Siciliani hannu di sè stissi e di la so' terra. È significanti ca li Siciliani, spicialmenti chiddi chi sunnu nta avutri nazioni, fannu qualunqui cosa pi diri quantu sunnu orgogliusi di essiri Siciliani. Nun àiu mai ntisu un Vinizianu o un Bulugnisi diri ca è spicialmenti orgulgliusu di essiri Vinizianu o Bulugnisi. Sibbeni l'orgolgliu spiciali chi li Sicilaini vantanu nfrunti a lu munnu è certamenti ginuinu, po' puru essiri un miccanisimu di difisa pruvucatu di li disgrazi chi hannu accumpagnatu li Siciliani atrraversu la storia. Seculi di abusi e di aviri avutu ripitutu ca nun sunnu li stissi di lu restu di lu munnu hannu fattu pagari un prezzu all'amuri propriu di li Siciliani.

    Nsumma, l'orgogliu chi iddi pruiettanu po' essiri nenti avutru ca un tintativu pi ammucciari un profunnu sensu d'infiriurità chi di tantu tempu cci hannu martiddiatu di supra. È un modu di prutistari lu giudiziu ingiustu e nun veru contru d'iddi stissi. Orgogliu, difinutu comu lu sensu di valuri pirsunali di na pirsuna 'n facci a lu munnu, parissi ca fussi un trattu cumuni tra li Siciliani d'oggi, comu puru di li tempi passati. Li Siciliani, in geniri, si cunsidiranu supiriura a li so' vicini, a li genti di li paesi vicinu, a li genti di avutri pruvinci e di avutri riggioni. Nun c'è bisognu di diri ca li Siciliani tradizionalmenti hannu sempri vantatu li so' qualità e disprizzatu li qualità di lu so' prossimu 'n puisia e canzuni. Li genti di lu paisi vicinu sunnu sempri nfiriuri nta tuttu. Li babbi sunnu sempri di fora di l'urizzunti. Liggennu quarchi barzilletta di li Mimi siciliani, un libbru ntirissanti scrittu di Franciscu Lanza, c'addivintò un classicu, unu po' vidiri comu li Siciliani vidinu lu so' prossimu Un casu di chisti è la favula di n'omu stupidu di un paisi vicinu, Burgiu, chi, prioccupatu ca so' muggheri si scanta di lu scuru e di passari la notti sula nta lu so' gran lettu, nun perdi tempu a dumannari a lu so' vulintirusu cumpari, di pigghiari lu so' postu, mentri iddu è fora paisi, " pi nun fari succediri nenti a idda".

    La diffirenza tra Siciliani probabilmenti nun è facilmenti ricunuscibili di li straneri. Ma la diffirenza tra Siciliani comu un gruppu e avutri Taliani sunnu mmidiatamenti e facilmenti pircipibili di li viaggiatura. Lu scritturi Francisi Guy de Maupassant chi visitò la Sicilia versu la fini di lu 1885, fici li siguenti parauna tra Napulitani e Siciliani:"Nun c'è nuddu ca è menu Napulitanu di un Sicilianu. Tra li Napulitani di la bassa classi unu trova sempri tri quarti di Puddicinedda. Iddu gisticula, si agita, si mpipiriddia senza scusa, si esprimi tantu cu gesti quantu cu paroli, usa versi cu la facci 'n tuttu chiddu chi dici, si mustra sempri amabili pi aviri chiddu chi voli, è curtisi pi ngannu comu puru pi natura, e arrispunni cu curtisia a cumplimenti scurtisi. Ma ntôn Sicilianu unu già trova assai di l'Arabu. Avi lu cumpurtamentu seriu di l'Arabu, anchi si avi la gran vivacità e argutizza di lu Talianu. Lu so' orgogliu nativu, l'amuri pi li tituli, la natura di la so' boria e puru la fisonomia di la so' facci lu fannu cchiù simili a lu Spagnolu ca a lu Talianu. Ma chiddu chi vi duna cuntinuamenti l'imprissioni di essiri nta l'Orienti, appena mittiti pedi nta Sicilia, è lu tonu di la vuci, ddu tonu nasali di li grida di strata." Si li Siciliani sunnu sciovinista tra d'iddi e nun si calanu a nudd'avutru Sicilianu, li rancura lucali si li scurdanu prestu quannu si fannu parauna cu li straneri, vogghiu diri, genti chi nun sunnu Siciliani. Nu sturneddu spissu ntisu doppu l'annessioni di l'isula a lu Piamunti nta lu 1861 si vantava ca un sulu Sicilianu avia lu valuri di tutti li "piramuddisi" (na curruzzioni, fatta apposta, di la parola piamuntisi) misi nzemmula.

 

Lu tempiu di Segesta

 

    L'espressioni esaggirata di orgogliu nni lu curaggiu di li Siciliani po' essiri ntirpritata comu na manifistazioni rimanenti di chiddu chi Denis Mack Smith, chi scrissi na storia di la Sicilia nta dui volumi, chiama megalumania Siciliana. Iddu crideva ca tutti li Grecu-Siciliani suffrevanu di megalumania, carattirizzata di lu so' eccissivu, cirtamenti, patologicu bisognu di esaggirari chiddu chi avianu fattu. Stu trattu è evidenti nni li monumenti ca ci sunnu nta l'Isula. Li Greci chi culunizzaru la Sicilia e li so' discinnenti, no comu li genti chi culunizzaru li Stati Uniti, manifistaru stu bisognu ca avianu, fabbricannu tempii cun chiaru cumpiacimentu pi la magnificenza. Nun sulu li tempii Greci chi si truvanu n Sicilia sunnu fatti pi suprapassari sia 'n grannizza ca comu abbillimentu l'antichi mudelli chi si trovanu nta la Grecia, ma sunnu puru misi nta na pusizioni strategica pi fari na mprissioni eterna a lu visitaturi. Nta nuddu postu lu disederiu Sicilianu di fari maravigghiari è cchiù visibuli comu nta la Valli di li Tempii a Agrigentu. Ddà, ntôn risautu rucciusu chi forma comu na scena chi po' essiri vista di supra e di sutta, custrueru, no unu, picchì chistu nun avissi sudisfattu lu so' orgogliu, ma cincu tempii, un migghiu luntanu di l'avutru.

    Guy de Maupasant nun fu lu primu e mancu l'urtimu visitaturi a miravigghiarisi di lu dramma chi ponnu suscitari nta la menti li tempii Siciliani. Pinzannu a lu sulitariu e magnificu tempiu Doricu di Segesta, iddu scrissi: "Li mastri decuratura chi nzignaru arti all'umanità, mustranu, spicialmenti n Sicilia, la scenza prufunna e raffinata chi iddi avianu di effettu e scena. (Lu tempiu di) Segesta pari ca avissi statu pusatu a li pedi di sta muntagna di un omu di ncegnu a cui avia statu rivilatu l'unicu postu unni puteva essiri fabbricatu. Sulu e cu sè stissu (stu tempiu) anima tuttu lu panurama, lu fa viventi e divinamenti beddu." Li Siciliani hannu eriditatu lu so' sensu drammaticu, nzemmula cu la so' spiritusaggini, lu so' sensu di ospitalità, lu donu di lu ragiunamentu, la so' mancanza di fiducia e puru lu so' purtamentu fisicu, di li Greci. Li siciliani sunnu cchiù vicinu a li Greci comu assumigghiamentu fisicu e cumpurtamentu chi ponnu essiri a li Viniziani o a li Fiurintini.

    Si unu avissi a dentificari ddi genti chi hannu cchiù affinità cu li Siciliani unu avissi a mettiri li Greci 'n primu postu, siguiti di vicinu di l'Arabi, li Nurmanni e poi li Spagnoli. L'Arabi ca abitaru nta l'isula di l'827 d.C. nzinu a lu 1050 circa, appiru n effettu chi dura nta lu modu comu li Siciliani talianu a la vita. Si po' diri ca lu so' senzu di fatalisimu, la so' risistenza e lu so' accittari e rassignazioni a na vita dura vinni eriditata di l'Arabi. La cunzidirazioni pi l'avutri e la malincunia di li Siciliani, lu prufunnu senzu di nustargia e l'attacchi di diprissioni sunnu puru di natura araba. Li Siciliani hannu puru assai tratti n cumuni cu li Spagnoli chi duminaru l'isula pi cchiù di cincu seculi. Lu senzu di grannizza e di prioccupazioni di li Spagnoli di comu sunnu li cosi, lu so' amuri pi la pompa e la cirimonia, pi dicurazioni e eliganza esterna toccanu na corda chi sona nta l'animu di li Siciliani. Eppuru, anchi si iddi mustranu assai similarità cu li Greci, li Siciliani nun sunnu Greci, nè sunnu Arabi o Spagnoli. A li Siciliani ci piaci la pompa e la cirimonia, ma nun sunnu, comu l'Arabi, affascinati di lu spittaculu, la morti e li rituali, iddi nun si pigghianu seriamenti comu li Spagnoli. Lu cummattimentu cu li viteddi, la corrida, pi esempiu, nun appi mai successu 'n Sicilia e morsi cu lu tempu.

    Anchi si la Sicilia è la punta cchiù a sud di l'Europa, li Siciliani nun dimmustranu l'attitudini di cuntentu spinziramentu, l'esubiranti e spiritusa superficialità chi la genti spissu attribuisci a genti di lu sud. Iddi dimmustranu nta lu cumpurtamentu iurnaleru tratti comu pirsiviranza, ditirminazioni, pirsistenza, pricisioni, travagghiari forti e fiducia assuluta nta la rialità impirica chi unu associa a lu tipmiramentu nordicu. Ma nun sunnu immuni di sunnari!

 

Don Chisciotti e Sanciu Panza, by B. Vesco

 

    Si iu avissi a pigghiari cui megghiu rassumigghia a lu spiritu Sicilianu, iu pigghiassi a Giuvanni Meli senza esitazioni. Giuvanni Meli, lu cchiù granni pueta di qualunqui tempu, po' essiri cunzidiratu lu simbulu di l'arma Siciliana, battennusi sempri tra idialisimu e realisimu, tra pessimisimu e ottimisimu. La battagghia interna chi abbrucia nta l'arma di lu Meli è ncurpurata nni li pirsuni di Don Chiosciotti e Sanciu Panza.l'eroi di stu longu puema burlescu, scrittu no comu na imitazioni di lu Cervantes, ma pi mustrari unni li Spagnoli avianu sbagghiatu. Don Chiosciotti rapprisenta li disideri idialisti di lu pueta pi migghiurari la vita di li poviri cuntadini Siciliani, e Sanciu Panza rapprisenta l'attitudini scettica di lu stissu Meli versu li diliri di Don Chiosciotti. La battagghia tra idialisimu e empirisimu eventualmenti la vinciu Sanciu Panza, l'omu chi crideva sulu a chiddu chi iddu puteva tuccari cu li so' manu. Lu poviru Don Chisciotti - chi Sanciu difiniu comu un omu ca nun sapia cunzari na nzalata e pritinnia di cunzari lu munnu- fici na morti comica (nta lu sensu Pirandillianu) chi avissi statu incuncipibili pi li Spagnoli o pi Cervantes. Iddu muriu "di na morti veru viddanisca", causata di na ruttura. E Sanciu dici: " Cu à ntisu mai di un Cavaleri Erranti moriri di ernia?"

    Ntê Siciliani, la lotta tra ottimisimu e pessimisimu è vinciuta di lu pessimisimu. Scetticisimu, prammatisimu, rialisimu spissu hannu cchiù cridenza tra lu populu, senza però escludiri li contraparti. Liunardu Sciascia nutò na vota ca li Siciliani sunnu accussì pessimista pi lu so' futuru ca nta la so' lingua lu tempu futuru nun esisti. Li Siciliani dicinu: "Dumani vaiu a Catania." Ma a tanti avutri lingui ci manca lu tempu futuru. Lu Napulitanu, pi esempiu, nun avi lu tempu futuru. Eppuru nuiavutri nun dicemu ca li Napulitani sunnu particularmenti pissimista versu lu so' futuru. La pruspittiva di li Siciliani avi a essiri vista comu na cuntinua perdita di lotta tra tinnenzi prugrissivi, idialistichi contru na cchiù trincirata filosufia cunsirvativa e rialistica. Chistu spieca lu ristagnu ca è carattaristicu di la sucità Siciliana. Cci avissiru statu cchiù visiunari, cchiù sunnatura, cchiù Don Chiosciotti, lu cursu di la storia Siciliana avissi statu certamenti diffirenti.

    Avutri genti hannu statu attura nta la scena Siciliana, ma iddi hannu statu puru sempri cunzidirati straneri di l'isulani. Li Siciliani nun gheru mai d'accordu cu li Rumani, li Bizantini, li Francisi, l'Austriaci, e li Piamuntisi e, iddi, eranu o uddiati o tullirati a secunnu a quantu s'intrumittevanu nta la manera di vita Siciliana. Roma nun fu mai ntirissata assai a la Sicilia tranni chi comu surgenti di travagghiu mircatu e di furmentu. Sutta li Bizantini la Sicilia fu dipridata di ddu picca ca avia arristatu doppu chi parteru li Rumani. Li Francisi pi la so avidità suscitaru supra d'iddi stissi la raggia di li Vespiri Siciliani e li Piamuntisi ca vinniru doppu la nvasioni di l'Isula di Garibardi, nveci di risorviri l'antichi prubrema chi affriggevanu la Sicilia, ficiru li cosi cchiù tinti, causannu la cchiù granni emigrazioni di massa nta la storia di l'Isula. Iddi eranu uddiati pi tanti ragiuni, ma particularmenti pi mporri nni la Sicilia tradiziunalmenti antimilitari (un pruvrbiu Sicilianu dici "megghiu porcu ca surdatu!"), lu pisu di ottu anni di leva militari. Lu panurama fattu di li Siciliani mustra chiaramenti li civilizzazioni chi eranu cunginiali a lu spiritu Sicilianu e rifretti chiddu chi aiu dittu. Li cchiù mprissivi mprisi di la criatività di l'omu chi si vidinu ddà, sunnu li tempii punici e greci sparpagghiati nta tutta l'Isula, li casteddi Arabu-Nurmannu, li cattidrali di Cefalù e Munriali e lu Baroccu Spagnolu-Sicilianu. Facitimi agghiunciri n'avutra piccaredda di pezza a lu labirintu di l'arma Siciliana.

 

"La Famigghia" by B. Vesco

 

    La famigghia accupa lu primu postu nta la vita di li Siciliani. La famigghia è l'unica stituzioni cchiù mpurtanti chi fa di muturi a la vita suciali di li Siciliani. È un simbulu di l'unità di lu populu Sicilianu comu nazioni ed è un menzu di difisa contru li straneri. Unu po' diri ca pi li Siciliani la famigghia è tuttu. Ogni membru di la famigghia avi la so' precisa rispunzabilità e duviri, di lu patri comu capu, la matri comu centru emutivu e li figghi chi hannu lu duviri di fidiltà versu li ginitura e li frati e soru. Chistu è chiaru nta l'amuri chi li granni dimustranu versu li nichi, e prutegginu li figghi nta na manera ossessionanti. La matri è a lu centru di lu nucliu familiari. Idda teni la famigghia nzemi cu tutta la so' putenza di matri, idda fa 'n manera ca tutti li membri di la famigghia si cumportanu 'n manera accittabili. La matri è l'universu emutivu di la famigghia. "Casa mia, matri mia!" Idda avi quarchi cosa di sacru. Mentri è veru ca la sucità Siciliana è supratuttu patriarcali, è puru abbastanza chiaru ca la matri è la codda chi teni la famigghia unita.

    Lu rolu di la matri, furmatu di migghiara di anni di storia, cuntinua quasi nzinu a oggi senza canciari. Idda nutrisci sia fisicamenti chi psicologicamenti, e cumprisci li so duviri suciali 'n manera già usata nta tanti seculi, sacrifica tutta la so' vita a la so' famigghia, nigannu qualunqui cosa a sè stissa nta lu prucessu e divintannu vittima di la so' dedica versu l'avutri. La so' divozioni a lo so' famigghia e accussì cumpreta ca un pruverbiu Sicilianu dici: "La matri senti li dulura di lu mutu." Comunqui, nevitabilmenti nta la battagghia tra lu disideriu di libbirtà di li figghi e lu disideriu di la matri di manteniri lu status quo - pi sta ragiuni, Liunardu Sciascia cunzidira li matri Siciliani la causa di la stagnazioni di la sucità Siciliana - nascinu cunflitti e li matri accumincianu a cunzidirirarisi vittimi, pigghiannu chiddu chi po' essiri chiamatu lu sintumu di martiri. Nta n'articulu ricenti pubbricatu nta Arba Sicula (Vol. XIII, 1993), Ancilu Custanzu suggiriu chi li fimmini Siciliani di qualunqui postu, eventualmenti finiscinu pi cunfurmarisi a l'immaggini di la Matri Addulurata, ca chianci pi la perdita di lu figghiu. Nun è na cuincidenza ca 'n Sicilia, fora di qualunqui scena pussibuli di la vita di la Madonna, chidda cchiù canusciuta è chidda di la Matri Addulurata.

    Nè è na cuincidenza ca li fimmini vidennu un ncidenti subitu gridanu "Bedda Matri!". Ncidentalmenti, li mmaggini di Cristu chi ghinchi l'animu Sicilianu sunnu ristritti tipicamenti a chiddi di lu Cristu suffirenti e di lu Bammineddu, ca sunnu suffirenza e nnuccenza, na vittima nnuccenti scannata di nimici putenti unni unu po' vidiri la suffirenza di lu populu Sicilianu pruittata nta na scena di duminazioni e abusu esternu. L'onuri di la famigghia s'avi a difenniri a qualunqui costu. L'apparenzi addiventanu assai mpurtanti nta sta rilazioni. "Fari na bedda fiura" è la cosa cchiù mpurtanti. Tuttu e subburdinatu a l'interessi principali di la famigghia. Lu sensu di orgogliu chi unu senti pi sè stissu vali puru pi la famigghia. La mala fiura di un membru nun po' falliri di aviri effettu nta l'orgogliu di la famigghia comu unità. Lu pruverbiu Sicilianu "Cui perdi la bona fama, perdi tuttu", ncorpura un sintimentu univirsali accittatu nta l'Isula. Un Sicilianu chi capisci ca lu so onuri è attaccatu direttamenti, riaggisci cu na furia supprinnenti.

    A lu stissu tempu po' mustrari na friddizza nsolita si l'attacu è prisintatu nta na manera ndiretta e nu tantu chiara.. Chistu certamenti nun significa ca l'offisa nun è punita o nun è nutata, picchì li Siciliani, comu regula ginirali, hannu na mimoria longa, comu l'elefanti, e iddi, a lu tempu giustu vi ripaganu cu la stissa munita di l'offisa. Iddi nun sunnu fatti pi pirdunari e scurdari. Lu granni rispettu chi li Siciliani hannu pi li so' morti nun è avutru ca n'estenzioni di la stissa rivirenza chi iddi hannu pi la famigghia. Nuddu Sicilianu avi mai l'idia di ammuntiari li morti. Nfatti nudda offisa versu li morti asisti n Sicilianu comu nni li Rumani; "A li mortacci tui!" Stannu a stu senzu di rispettu pi li morti, li picciriddi ricivinu doni lu iornu di Tutti li Santi, ca n Sicilia e canusciutu comu "Lu iornu di li morti". Si dici ca li morti di famigghia portanu doni pi li picciriddi, no San Nicola. Lu rispettu pi li vecchi è na sprissioni di la stissa rivirenza.

 

La Trinacria, n anticu simbulu di la Sicilia

 

    Lu sintimentu Sicilianu di ospitalità è puru n'aspettu di sta spiritualità. Mentri nu è facili 'n Sicilia riciviri appruvazioni e trasiri nta lu circulu chiusu di l'amicizia, na vota dintra li Siciliani fannu di tuttu pi fariti sentiri comu a la to' casa. Iddi sunnu veramenti ginirusi cu lu so' tempu e cu li so' sordi quannu si tratta di ospiti. L'ospitalità è sacra. Ciceroni identificò tri punti chi discrivinu cu pricisioni li Siciliani, di li so' tempi, circa dui mila anni fa. Iddu dissi ca eranu "na razza ntilliggenti, ma suspittusa cu lu donu di un miravigghiusu senzu di umuri ". Vogghiu allargari sti tri punti e virificalli contru la rialità di oggi. Chi li Siciliani sunnu un populu ntilliggenti nun criu c'à statu mai misu 'n dubbiu, eccettu forsi nta certi pseudu-scintifici rapporti pubbricati nni l'anni '20 nta certi rivisti populari Amiricani. Pi esempiu, iu nun sacciu tanti barzilletti "Siciliani" n cunfruntu a quantu ci sunnu -senza offisa a li Pulacchi - barzilletti "Pulacchi". Barzilletti circa li Siciliani di solitu parranu di avutri aspetti di li so' pirsunalità apparenti. Ma comunqui, l'intilliggenza nun è na qualità chi manca a li Siciliani. Lu pruverbiu "megghiu cummattiri cu centu mariola, ca c'un babbu!", fa tistimunianza a quantu sunnu sicuri di essiri capaci di priviniri li menti scattri, ma si dichiaranu imputenti versu la stupidizza.

    È ntirissanti minziunari ca li Siciliani tantu ditestanu la stupidizza ca iddi nun lassanu essiri lu so', universalmenti canusciutu stupidu, Giufà, cumpritamenti stupidu. Nfatti, Giufà ca è comu lu stupidu di lu paisi, spissu fa l'omu saggiu e giustu, c'arrisorvi prubrema di li so' paisani. Iddu è nu stupidu e un saggiu a lu stissu tempu, spertu e ottusu, dipinni di la favula di cui iddu è prutagunista. Iddu è chiddu chi quannu so matri ci dissi : "Nun ti scurdari di tirariti la porta quannu nesci", e iddu scippò la porta di li perni e si la purtò appressu supra li spaddi quannu nisciu. Ma iddu è puru chiddu chi fa vidiri la stupidizza di l'avutri. Iu penzu ca c'è na qualità visuali chiuttostu singulari nta l'intelliggenza. Unu po' veramenti diri di li Siciliani ca l'occhiu è lu specchiu di l'arma. Certu chistu nun è un fattu scentificu ma vi pozzu diri cu espirenza ca li Siciliani ponnu fari nteri discussioni cu l'occhi senza moviri li labbra. Li Greci hannu un verbu pi diri chistu: ananouein. Mi riordu chi quannu manciavamu, me patri avia simpricimenti a taliari versu la direzioni di na cosa supra la tavola e me matri capeva mmidiatamenti si iddu vuleva un biccheri d'acqua o lu pani.

    La dumanna nun era mai fatta, na simprici sbricia taliatura, un muvimentu di lu iditu, un mpircittibili muvimentu di la testa era tuttu chiddu c'abbisugnava pi na cumunicazioni effittiva. Nun nn'aiu spiegazioni pi chistu, eccettu di diri ca li Siciliani pi tantu tempu hannu avutu na espirenza longa a essiri spittatura di la storia, a circari di minimizzari li prubremi chi ponnu veniri liggennu nta l'occhi di la genti. Ma mentri la ntilliggenza Siciliana nun si po' mettiri 'n quistioni, probabilmenti è causa di certi so' diffiurtà. Li Siciliani nta lu taliari lu valuri di la propria ndividualità hannu la tinnenza di esaggirari, di unciari la so' mpurtanza. Ogni Sicilianu cridi di essiri lu cchiù spertu, chiddu chi fa tuttu megghiu di qalunqui avutru. Nta lu so' Gattupardo, G.Tommasi di Lampedusa scrissi ca li Siciliani si cunsidiranu semidei, essiri umani perfetti chi vonnu essiri lassati 'n paci. Sta supravalutazioni d'abbilità ndividuali forsi fu eriditata di li Greci, di cui lu piccatu cchiù granni, comu sapiti, fu orgogliu, ca porta boria e superbia, gilusia e nvidia. Li Siciliani disprezzanu chiddi chi si dunanu arii, iddi nun ponnu suppurtari ca unu di li so' pari acchiana supra di iddi 'n termini di putenza ecunomica o suciali, e nun accetta l'idia ca unu ca arriva a essiri mpurtanti cci arriva sulu, senza aiutu di nuddu, e pi la so' pura supiriurità di li so' doni naturali.

    È na cosa megghiu pi iddi pinzari ca la furtuna, circustanzi spiciali o ntrallazzu ficiru lu iocu maggiuri pi purtari dda pirsuna a lu successu. Nni lu stissu tempu li Siciliani ammiranu assai na pirsuna putenti e di successu chi nun si vanta di la so' bona pusizioni.. Nta na terra unni li tituli sunnu mpurtanti e quarchi vota puru unciati, un prufissuri chi si prisenta sulu cu lu so' nomu è ammiratu veru assai. Giuvanni-Maria Cecchi, chi citamu prima, nun sbagghiava quannu dissi ca nni la so' boria "li Siciliani nun si abbassanu a nuddu, ammenucchè la diffirenza nta lu statu suciali nun è stragranni o pi l'unu o pi l'avutru". Un pruverbiu Sicilianu cumunica lu senzu di briogna ca accumpagna na malafiura ca risurta di na azioni di accusa fausa di parti di l'ugguali: "Amaru a cui si fa supraniari! Lustru di paraddisu nun nni vidi." Lu fallimentu o la nabilità di difenniri la so' dignità 'n frunti a la sucità porta a la perdita di lu paraddisu. Nun c'è di maraviggharisi si 'n Sicilia mprisi cullittivi nun arrinescinu boni 'n ginirali. Li "Vespri Siciliani" di lu 1282, chi ponnu essiri difinuti comu la prima rivoluzioni populari e naziunali nni la storia di lu munnu mudernu, è na eccezioni a la regula.

    Facitimi parrari di lu secunnu puntu fattu di Ciceroni: la natura "suspittusa" di li Siciliani. È probabili ca iu avissi usatu la parola "cautu" nveci di "suspittusu". Comunqui, nun po' essiri nigatu ca li Siciliani nfatti nun sunnu canusciuti pi acchiappari la palla a volu. La storia cci nzignò a iddi a stari attenti. Mentri a li Siciliani piaci manciari, iddi tennu assai a la timpiranza (iddi sunnu la genti cchiù modirata di l'Italia, secunnu na statistica di lu 1991, ca cunsumanu sulu dui litra di vinu a testa a lu misi) e su nnimici di la frivularia. Lu fattu ca nun cci piaci viviri è ca si scantanu di perdiri lu cuntrollu di sè stissi e di la situazioni. Unu ca si fa vidiri n pubbricu mbriacu è taliatu cu disprezzu, "Omu di vinu, nun vali un carrinu"; la mmaggini di na fimmina ca è vivuta nforza lu criticisimu. La so' cauzioni po' essiri la estenzioni di lu so' scantu di mittirisi nta un cursu di azioni chi ponnu divintari difficili di cuntrullari. Lu so' stuicisimu 'n frunti a la suffirenza po' puru essiri na manifistazioni di lu stissu bisognu di mettiri 'n frunti a tutti na facci di "omu" o di "difisa".

    Pirandellu diceva ca li Siciliani "hannu nu scantu stintivu di la vita, pi cchissu si chiudinu dintra a iddi stissi, accuntintannusi di picca, abbasta ca hannu un senzu di sicurizza… È lu mari ca li isula, ca li tagghia fora di lu munnu e li fa sentiri suli e ognunu è e si fa comu na isula." Lu mari è rispunzabili pi dari a li Siciliani ristrittizza di viduti, lu mari è lu menzu attraversu cui tanti disastri hannu arrivatu nta la Sicilia. A lu cuntrariu di l'Inghilterra ca usa lu mari pi allargari versu fora la forza vitali di la nazioni, la Sicilia ha vistu lu mari comu lu menzu ca ci ha purtatu barbari affamati 'n cerca di suli. Sidici duminazioni straneri hannu lassatu lu so' mercu nta l'arma di li Siciliani. Cauti? Suspittusi? E comu no! Nuddu ha vinutu mai 'n Sicilia purtannu rigali. Tutti hannu vinutu pi pigghiarisi quarchi cosa. Hannu vinutu pi la so' ricchizza, pi la so' biddizza ca leva lu ciatu, pi la firtilità di li so' vaddati e lu so' crima di nvidia. Cc'è di maravigghiarisi si li Siciliani sunnu suspittusi di li stranii? D'arreri ogni facci stranera vidinu la firocità di li Mammeluchi, lu riordu di li pirati Algirini chi vinevanu a li terri Siciliani pi arrubbari e ammazzari, la boria di li baruna di Carlu D'Angiò e l'avventureri di tutti li razzi chi vinniru e sinni ieru. A dispettu di l'oppressioni ca ha stato lu so' distinu, o forsi a causa di chista, li Siciliani hannu sviluppatu un forti senzu di umuri, ca fu ricanusciutu di genti comu Ciceroni e avutri. Ma lu so' senzu di umuri è sempri mudiratu cun senzu di fatalisimu. L'umuri Sicilianu è di di lu tipu Pirandillianu. Lu so simbulu è l'Erma Bifronte, lu Janus cu dui facci chi chianci e ridi a lu stissu tempu.

    E nuddu ncorpura st'aspettu di l'arma Siciliana megghiu di Giuvanni Meli. Nta na puisia ntitulata "Lu specchiu di lu disingannu, o sia la cugghianiata", chi Pirandellu stissu ricanusciu comu la ncurpurazioni di lu so' tipu di umuri, lu so' "sentimento del contrario", Meli dimmustra ca tuttu chiddu ca l'omu fa nun è avutru chi illusioni "cugghiuniati", ogni ottava chi discrivi tutti l'oggetti di disideriu di l'omu finiscinu cu la parola "cugghiuniata", la quali cosa esprimi la so' profunna delusioni cu la vita. Amuri, ricchizza, fama e sessu - tutu chiddu chi l'omu apprezza veru assai - li mustra comu premi illusori, na "fissaria" o pi usari li paroli di na famusa canzuna populari "chissu è tuttu?" Na ottava sula è sufficienti a dimmustrari chiddu chi vogghiu diri:

 

Oh chi bedda picciotta! Oh ch'è sciacquata!
Oh chi sangu! Oh chi vezzi! Oh chi attrattiva!
Ah! Mi la vogghiu teniri abbrazzata,
Ah! Lu alitu stissu mi ravviva:
Mettiti bona, figghia nzuccarata,
Proi ssu labbru…apri ssi cosci…oh viva!
Moviti, strinci…oh estasi biata!
Ticchi, ticchi, finiu…Cugghiuniata!

 

 

Lu pueta Sicilianu Giuvanni Meli (1740-1815)

 

    Ma unu nu avi a ricurriri a Meli pi capiri ca l'umuri Sicilianu è giniralmenti ironicu, direttu a sè stissu, na speci di autucritica. Comu Vitalianu Brancati dissi, li pruverbi Siciliani nun sunnu maliziusi o ngannevuli comu sunnu li priuverbi Tuscani. Cunzidirati chistu: "Scappari nun è virgogna, quacchi vota è sarvamentu di vita!" Stu proverbiu dici ca li Siciliani sunnu prammatista cun senzu d'umuri, nfini. Ma lu pruverbiu chi avi un gran significatu pi l'umuri versu sè stissu, è: "Ringraziamu a Diu pi chiddu chi nni duna, e a lu re pi chiddu chi nni lassa!", cu lu quali li Siciliani espriminu la propria rassignazioni nta l'essiri suggetti a forzi fora lu so' cuntrollu, mentri cuntinuanu mpirturbati lu so' caminu di la vita. L'articulu di Jane Vessel supra la Sicilia, pubbricatu nta lu National Geographic (austu 1995) offri n'avutru esempiu di umuri Sicilianu. Discrivennu la criatività di l'epiteti Siciliani ntisi nta li strati cungistiunati di Palermu, Vessel discrissi sta bedda scena: "Chi cci soni?" Un omu gridò di n'avutra machina. "Mi piaci la musica!" Idda cci arrispunniu. "Si nu la finisci cci rumpu li corna a to maritu!" Chiddu cci gridò. Idda cci arrispunniu, " E iu cci fazzu arreri!"

    Nta la minazza di rumpiricci li corna a so' maritu, l'omu sta accusannu la fimmina di essiri n'adultira. Nun sulu a la fimmina nun cci passa mancu pi la testa pi essiri chiamata adultira, ma, p'aviri l'urtima parola, idda sfacciatamenti dici ca l'adultira la fa n'avutra vota rigalannucci a so' maritu n'avutru paru di corna. Eccu la qualità di l'umuri versu sè stissu. Si sta barzilletta nun è veru è certamenti na bona spiazioni di l'umuri Sicilianu. Picchì l'umuri Sicilianu versu sè stissu è nevitabilmenti comu na cuntraddizioni, difficili a capirisi. La Sicilia è na isula china di suli e di luci, unni li culura sunnu accussì brillanti ca quasi annorbanu la vista, unni lu suli è veramenti ginirusu (Catania avi lu cchiù granni nummaru d'uri di suli di tutta l'Europa), eppuru è abbitata di genti ca nun ponnu ridiri cumpritamenti senza pinzeri, genti chi nun sannu lu valuri di na risata. È fuddia chista o saggizza? Iu nun lu sacciu.

     Paulu Arena, auturi di La Sicilia nella sua storia e nei suoi problemi (Palermo: F. Agate Ed. 1949), lu libbru cchiù appassiunatu di la Sicilia chi aiu lettu, osserva chi "ogni artista Sicilianu, ogni filosufu, ogni scritturi è na fiura traggica, un foddi ntruspittivu, un cantanti di malincunia e disulazioni chi strinci lu cori nta na morsa di chiantu, è un nvistigaturi senza cori, un omu chi tagghia a pezza a iddu stissu e ad avutri, duru finu a tali puntu chi la strana fratillanza di cori, spiritu e timpiramentu tra la nostra genti e la Russia di Dostoyevsky addiventa chiara…" La Sicilia ha pruduttu granni scrittura, filosufi e pueti, "ma no un sorrisu di lu tempu di li Rumani n poi…" È l'umuri Sicilianu schizzufrenicu picchì ncorpura la ruttura di comu li cosi avissiru a essiri e di comu nveci sunnu, tra l'aspirazioni pi la giustizia e la ngiustizia evidenti. Tra lu disideriu di libbirtà e indipindenza e la eterna frustrazioni? Resta un urtimu puntu. Storicamenti li Siciliani hannu avutu li siguenti attitudini e sintimenti: na ginirali cuntrarità pi la polizia e pi lu sistema di giustizia; na strafuttenza cauta versu la liggi; un prufunnu suspettu versu li stituzioni guvirnativi e pulitichi; na natura furtimenti ndividualistica; fidiltà a un codici di cumpurtamentu chiamatu omertà, chi oggi e caputu comu n'attitudini di nun-viu-nenti, nun-sentu-nenti, versu l'autorità nvistigativi, ma chi nta lu significatu originali è essiri omu, cumpurtarisi comu un omu. L'etimolugia di la parola omertà è omu, e secunnu Cesare Mori (The last struggle with the mafia, London: Putnam 1933, p. 224), significava "autocunfidenza cumprita, gran senzu d'onuri, giudiziu bilanciatu e autocuntrollu". A vista d'iddu era na forma di aristucrazia di carattiri.

    I Siciliani universalmenti e apertamenti ammettinu ca è megghiu futtiri ca essiri futtutu, megghiu supravviniri lu nimicu ca essiri supravvinutu, megghiu diri picca ca assai, megghiu nun parrari di cosi di famigghia, megghiu escludiri ca includiri genti nta lu circulu intimu di la famigghia e d'amici. Li Siciliani hannu sempri disprizzatu li pulizziotti chi tradiziunalmenti hannu nfurzatu li liggi a favuri di li ricchi e garantutu l'oppressioni di li poveri, e ha statu sempri un puntu d'onuri pi iddi di nun coopirari cu la polizia. Nfatti essiri na spia era l'attu cchiù vigliaccu chi un Sicilianu putissi fari. Ma chistu puru significa ca storicamenti li Siciliani hannu truvatu difficili di iri a ripurtari di aviri statu vittimi di un crimini, prifirennu, si lu putevanu fari di farisi giustizia iddi stissi. Sti tipi di cumpurtamentu, ca si svilupparu attraversu tanti seculi di espirienza, comu lu modu, menu dannusu, di fruntiggiari forzi nimichi esterni, è pussibili ca è aduttatu di la maggiuranza di li Siciliani. Chisti (cumpurtamenti) hannu a essiri cunzidirati miccanisimi di difisa sviluppati di tutti li sucità chi hannu canusciutu la libbirtà a lampi, pi ricadiri subitu nni la cchiù vili suttamissioni di forzi esterni. Chisti (cumpurtamenti) rapprisentanu strategii di supravvivenza pi un populu ca ha canusciutu l'oppressioni, la trascuratizza e l'abusu a li manu di tanti straneri.

    Accussì com'è, i carattari chi aiu discrittu brivimenti sunnu simili a li codici di cumpurtamentu cu li quali s'ha cumpurtatu finu a urtimamenti la mafia. La parola mafiusu veramenti n Sicilianu significa beddu, omu, avvinenti, mprissivu. Sta parola discrivi un omu chi tramiti l'usu di la viulenza o un sistema di nfluenzi a so' dipusizioni è capaci di ottiniri rispettu e pruteggiri chiddi chi iddu penza sunnu li so' dirittti. Nsumma, iu penzu ca la mafia nasciu pi na supavalutazioni di meritu ndividuali nzemmula a l'arruganza di lu putiri: un casu d'intelliggenza ca nun perdi tempu a usari la viulenza pi la so avidità. La mafia, comu avutri sucità sigreti, comu chidda di li Beati Paoli, chi era na organizzazioni effittiva e timuta, potti essiri caputa nnô passatu comu si rapprisintassi na forma di giustizia unni nun c'era giustizia, un modu di fari aggiustari li cosi torti chi nu eranu cunnannati. Ma li Siciliani sunnu li primi vittimi di la mafia. Nfatti iddi sunnu fatti vittimi dui voti di la mafia: nta la so' riputazioni e nta la sacchetta. Ma ora li Siciliani stannu dicennu "basta!" cu na vuci e ntinzioni sempri cchiù forti. Cci ha statu un canciamentu drammaticu, sia quantu riguarda lu modu di fari di li Siciliani versu la polizia sia quantu riguarda versu la mafia, speciarmenti doppu l'assassinii di li Iudici Falcone e Borsellino, e quantu riguarda lu codici di cumpurtamentu cu cui opira l'organizzazioni stissa. Lu nummaru di li pentiti, assuciati di la mafia, chi si stannu uffrennu di coopirari cu la polizia, ha aumintatu, comu sta aumintannu lu nummaru di li Siciliani, citatini privati, capi riliggiusi e pulitici ca hannu la vuluntà di iri contru la mafia pubbricamenti.

    Comunqui, lu fattu ca tanti Siciliani hannu un suttafunnu di valura chi fici nasciri sta tirribili organizzazioni, nun avissi a essiri usatu comu na ncriminazioni di la maggiuranza di li Siciliani chi sunnu un populu energicu, ncignusi e diligenti, li cui valura personali pusitivi trapassanu d'assai chiddi nigativi. La mafia, si unu cci voli dari un valuri nta lu gran ritrattu di la cuntribuzioni Siciliana a la civilizzazioni di lu munnu occidentali, nun po' essiri avutru chi na pervessioni, un violu capricciusu chi nesci fora di la strata principali, na diviazioni a un crucivia. Comu tali nu si cci avissi a dari lu putiri di arristari comu na macchia, comu na macchia chi nfusca tuttu chiddu ca è Sicilianu. Li Siciliani hannu cuntribbuiutu tantu a la civilizzazioni occidentali nta tutti li campi. Un gran nummaru di ferri, nvinzioni e produtti foru purtati nta la Sicilia e foru poi espurtati nta l'Europa. Lu roggiu a suli, li nummari arabi, la sita. Tanti frutti di citru, canna di zuccaru, cuttuni, risu e gilatu, pi dirinni na piccaredda truvaru la so' strata versu l'Europa pi via di la Sicilia. Li Siciliani hannu statu accussì forti nta la puisia ca cc'è puru un pruverbiu populari ca dici "Cu voli puisia vegna n Sicilia, ca teni la bannera di vittoria". Stesicoru di Imera (VI seculu a.C.), ca è taliatu comu lu primu pueta chi trattò suggetti mitologici e epici nta na manera lirica, fu Sicilianu. Li critici lu cunzidiranu un Omeru liricu, lu nvinturi di la lingua puetica. Virgiliu basò lu so' mitu di li sbarchi di Enea nta l'Italia di un resucuntu di Stesicoru. Navutru Sicilianu di Siracusa, Teocritu (III ceculu a.C.), nvintò la puisia bucolica.

    Li siguenti sunnu puru Siciliani: Gacomo di Lintini ca nvintò lu sunettu. La Scola Siciliana a cui appartineva iddu fu rispunzabili pi nvintari na nova lingua littiraria chi lanciò la littiratura Taliana; Giuvanni Aurispa di Notu, un umanista e mircanti di libbra chi cullittò 578 manuscritti Greci, nclusa l'Iliadi di Omeru, cuntribbuiu assai a lu Rinascimentu Talianu; Antoniu Venezianu, "lu Petrarca Sicilianu" ca scrissi n Sicilianu "picchì nun vosi essiri un pappagaddu e ripetiri la lingua di l'avutri". La puisia di Venezianu fu stimata di Cervantes, ca era tinutu prigiuneru di li pirati nta la stissa cella cu Venezianu, digna di lu patraddisu; Giuvanni Meli (1740-1815), chi era canusciutu comu lu novu Anacrionti e fu rispunzabili pi purtari la lingua Siciliana a lu puntu cchiù ghiavutu; lu cuntimpuraniu e rivali di Meli, lu ligginnariu Miciu Tempiu, ca ha pirdutu di riputazioni pi lu briugnusu criticisimu di la so' puisia, e nta lu XX seculu, Salvaturi Quasimodu, ca vinciu lu premiu Nobel di la littiratura nta lu 1959.

    'N filosufia, Ciceroni, pi l'attitudini chi si annu li Siciliani  p'alliticarisi, cridiu ca la ritorica nasciu 'n Sicilia. Gorgia di Lintini, unu di chiddi chi principiaru lu pinzeru filosoficu, spissu fu chiamatu 'n Grecia pi parrari supra l'arti di la ritorica: Empedocli, chi Bertrand Russel cunzidira lu patri di la filosufia nta l'occidenti, fu accussì ncignusu nta tuttu, ca lu populu di Agrigentu lu cunzidirava un diu. Matthew Arnold fu accussì affascinatu di Empedocli ca scrissi un dramma pueticu supra d'iddu, Empedocle sull'Etna, e Fidiricu Harderlin, ca scrissi Der Tod des Empedocles, unni iddu s'immagina ca lu filosofu scelsi la morti ittannusi nta lu crateri di lu Munti Etna. Nta la scienza, Archimedi di Siracusa fu probabilmenti la menti cchiù granni di lu munnu anticu: iddu carculò la putenza di Pi, e si misi a curriri nudu pi li strati di Siracusa gridannu "Eureka! Eureka!" (lu truvai!), nvintò un modu d'abbruciari li navi Rumani nta la baia diriggennu li raggi di lu suli supra d'iddi pi menzu di grannissimi riflittura di metallu. Iddu fu ddu scinziatu ca mentri si faceva lu bagnu scupriu lu principiu di lu spustamentu d'acqua dovutu a un corpu solidu nfilatu nta l'acqua. La liggenna dici ca iddu era accussì appricatu nta li so' studi ca mancu vitti lu surdatu Rumanu chi l'ammazzò.

 

"L'Annunziata" di Antonello di Missina

 

    Nta lu Dirittu, Caronda di Catania fu unu di li cchiù granni giurista antichi. Iddu praticamenti livò di mmenzu li calunniatura, mittennu la liggi ca chiddi chi giuravanu dicennu cosi fausi avianu a purtari na curuna di ligna ntrizzati 'n testa pi farisi canusciri di tutti. Caronda puru prumuviu l'idia di lu nzignamentu pubbricu pi chiddi chi nun putianu pagari la scola. Iddu fici na liggi ca nuddu puteva purtari armi nta la la Sala di Cunzigghiu, sutta la pena di morti. Un ghiornu ca avia statu chiamatu pi carmari na ribbellioni, a lu ritornu, sintennu vuci forti veniri di la Sala di Cunzigghiu, trasiu di cursa, senza pinzari ca era armatu. Quannu ci ficiru nutari ca era armatu, iddu nisciu la spata e s'ammazzò. È veru ca li Siciliani hannu sviluppatu un senzu d'onuri iavutu assai, ma secunnu lu mudellu mudernu, chistu è comu esaggirari anticchia superchiu! 'N pulitica e guvernu, li Nurmanni criaru lu primu guvernu assolutu di l'Europa, e Fidiricu II, "Stupor mundi", s'impignò di fari di la so' amata Sicilia un mudellu di essiri imitatu di tutti li parti di lu so imperu; iddu vuleva chi la Sicilia fussi lu specchiu di lu munnu.

    Nta l'arti, Antonellu di Missina ntruduciu la pittura a ogghiu nta lu Rinascimentu Talianu La Sicilia ha datu tanti pittura, sculara e architetti di classi mundiali. Petru Novelli, canusciutu comu lu "Munrialisi", fu lu pitturi Sicilianu cchiù granni doppu Antonellu, Giacomu Serpotta fu nu sculturi maistru di stuccu e Fulippu Juvara, l'architettu chi costruiu la Basilica di Superga a Torinu. E cu è ca nun canusci l'estatica musica di Vincenzu Bellini, lu "cignu di Catania", ca lu so nomu è sinonimu cu lu "bel canto", e la musica di Alissandru Scarlatti? Ninu Martoglio, Rosso di San Secondo e Luigi Pirandello (premiu Nobel di lu 1934) accupanu posti mpurtanti nta lu tiatru. Nfatti è difficili mmaginarisi lu tiatru mudernu senza lu travagghiu rivuluziunariu di Pirandello. E si vulemu iri nnarreri dui mila anni, putemu agghiunciri ca lu tiatru comicu fu pirfiziunatu di Epicarmu, navutru Sicilianu. Guido Piovene, appi ragiuni quannu dissi ca la Sicilia ha datu all'Italia lu nummaru cchiù granni di pueti e scrittura nta l'urtimi 150 anni. Accuminciannu cu lu XIX seculu, srittura verista Giuvanni Verga, Luigi Capuana e Fidiricu de Roberto chi svilupparu un modu novu di rapprisintari lu munnu nta na manera cchiù scintifica e oggittiva, li scrittura Siciliani hannu duminatu la narrativa Taliana cu opiri veramenti originali: Elio Vittorini, Giuseppe Tomasi di Lampedusa, Leonardo Sciascia, Stefano Arrigo, Gesualdo Bufalino, Vincenzo Consolo, Dacia Maraini ecc…

 

Na viduta di l'Etna di Taurmina

 

    Li Siciliani hannu statu n frunti a tutti puru nta lu muvimentu puliticu. Lu partitu di la Demucrazia Cristiana chi guvernò l'Italia pi cchiù di 40 anni fu accuminciatu di don Luigi Sturzu, un preti di Rigalbutu. Assai statisti Siciliani comu Ruggeru Settimu, Francesco Crispi e Vittoriu Emanueli Orlandu hannu avutu un rolu principali nta lu guvernu di l'Italia... Li Siciliani hannu statu primi nta tanti cosi, comu nni nzigna Santi Correnti, un prufissuri di l'università di Catania: Archistratu di Gela scrissi Lu Dolci Gustu, lu primu libru pi cociri, nta lu IV seculu a.C., stabbilennu na granni riputazioni pi la cucina Siciliana.

• Empedocli fu lu primu vulcanologu.
• Lu primu roggiu sulari nta l'Europa fu misu a Catania nta lu 263 a.C.
• Lu primu Statu mudernu fu stabbilutu di lu re Ruggeru II, n Palermu, nta lu XII seculu.
• La prima mappa di lu munnu fu criata pi re Ruggeru II di un Arabu-Sicilianu ca si chiamava Al Edrisi.
• Lu gilatu fu nvintatu di un omu chiamatu Priccopiu di Aciriali. So' niputi grapiu na gilataria Le Procope a Parigi, un postu friquintatu assai di Voltaire e li so amici.
• Lu primu cenzu nta la storia fu fattu n Sicilia nta lu XVI seculu.
• Li primi cinologhi e orientalisti foru Siciliani; Prosperu Intorcetta di Piazza Armerina fu lu primu a tradurri l'opiri di Confuciu.
• Branca Minuti, na dutturissa chirurgu di Catania, nvintò l' "arti di ricostruiri lu nasu" nta lu XV seculu.
• Lu primu sindacatu, li "Fasci Siciliani dei Lavoratori", chi unificò cuntadini e artigiani, nasciu 'n Sicilia nta l'urtimu decenniu di lu XIX seculu.
• Lu primu spitali psichiatricu veramenti mudernu chi lassò li metudi mediuevali pi curare la schizzufrenia fu fattu 'n Palermu di Petru Pisani nta lu 1816.
• Lu manuali scrittu di lu Pisani pi la cura di sti malati è un maravigghiusu ducumentu umanitariu e di cumpassioni.

    Aiu fattu vidiri lu ncapu ncapu di stu suggettu ca avi tanti aspetti, ma ammenu ammenu, si aviti lettu nzinu a stu puntu, putiti capiri ca 'n Sicilia c'è chhiù di chiddu chi la genti si po' mmagginari. Speru chi nni faciti un vostru puntu di inchiri lu vacanti chi lassai. Fussi na cosa assai cchiù sudisfacenti, e assai cchiù vicina a la virità si nveci di pinzari a la Sicilia comu na isula nfittata di la mafia, unu pinzassi a idda comu un postu unni ciurisci lu bugainvillea tuttu l'annu, unni l'oduri di la zara d'aranci è un afrodisiacu, unni lu profumu di lu gesuminu è forti e ghinchi la notti. Pinzati a idda comu ddu postu chi detti a l'Europa lu gustu pi li "snguinelli", l'aranci sanghinghi chi scriscinu sulu ddà, un postu chi fici cosi duci quannu l'arabi cuminciaru a curtivari nta la so' terra la canna di zuccaru, lu postu chi detti la pussibilita` all'Europei d'ammugghiarisi nta la sita di lussu. Pinzati a la Sicilia comu ddu postu unni la primavera nasci quannu Plutoni libbira a Persefoni di la prigiunia nfirnali! Pinzati d'idda comu lu pueta tidiscu rumanticu Volfangu Goethe, ca scrissi nta lu so diariu: "L'Italia senza la Sicilia nun lassa nudda traccia nta l'arma, La Sicilia è la chiavi di tuttu."