La Sicilia e la Mafia
Expand Window  |   Homepage

    Nta la menti di la maggiuranza di li giurnalista in ginirali e di tanti famusi regista e pruduttura di spittaculi di tilivisioni e di film n particulari, diri Sicilia è comu diri Mafia. Certu è na mala cosa ca sti pirsuni dunanu tutti sti nfurmazioni, chi sunnu senza basi di virità, a miliuna di genti, senza sapiri (?) chi cosa è la Sicilia, finu a lu puntu chi, tanti voti, cu la parola "Sicilianu" fannu traspirari lu significatu di "mafiusu". Nuddu po' nigari ca la mafia nasciu n Sicilia. La mafia nun è nenti avutru chi n'organizzazioni chi si duna a attività illigali, comu traficari cu droga, contrabbannu, fari cuntratti illigali, fari siquestri di pirsuni e, nsumma, mponiri la so vuluntà criminali cu l'intimidazioni e anchi cu la viulenza, cu la sigreta o nun tantu sigreta canuscenza di certi signuri chi sunnu a lu guvernu.

    La mafia nasciu n Sicilia cu la vinuta di li Burbuna n Sicilia e s'affirmò comu parola di vocabulariu cu l'unificazioni di l'Italia. Ma quannu veramenti nasciu la mafia e picchì? Prima ca discurremu chistu e curriri lu stissu risicu di l'avutri, cioè di lassari capiri chi diri Sicilianu è comu diri mafiusu, videmu chi razza di genti sunnu li Siciliani. E pi aviri na idia bona e ferma, di sapiri chi significa essiri Sicilianu, accuminciamu anticchedda prestu nta la storia. 

 

    La Sicilia nta lu cursu di li seculi suffriu tanti occupazioni. Mentri certi occupanti purtaru certi cosi boni 'n Sicilia, nta la maggiuranza la Sicilia fu sfruttata. E la sfruttaru pi daveru cu tassi pisanti, malutrattamentu, oppressioni e pirsicuzioni.

    Sti Siciliani sanguinari, sti briganti, st'assassini, si distingueru finu di lu principiu nni l'aiutari a fari nasciri e sviluppari la civilizzazioni di l'Occidenti. Si sta genti chi accussi facilmenti difiniscinu la Sicilia la terra di la mafia e i Siciliani comu criminali comuni, si pigghiassiru lu tempu di struirisi tanticchia circa la civilizzazioni di lu munnu in ginirali e circa la storia di la Sicilia 'n partiiculari, iddi scuvassiru la gloria e la luci chi lluminava e ancora llumina la Sicilia. Li Siciliani fôru li primi genti d'Europa a usari l'alfabbetu chi ebbiru di li mircanti Finici. Ma senza iri a lu principiu, accuminciamu versu lu 650 a.C. Fu a stu tempu ca esistiu 'n Sicilia lu cchiù granni ligislaturi di li tempi antichi. Lu sò nomu fu Caronda di Catania, capu di ddà cità e pocu canusciutu di la genti di li nostri tempi. Iddu fici un corpu di liggi di cui pigghiaru esempiu quasi tutti li populi canusciuti di ddu tempu. Li so' liggi foru fatti pi lu migghiuramentu di la sucità in ginirali, pi raffurzari sopratuttu li valuri umani e in particulari lu centru familiari. Li so' liggi eranu assai siveri versu li latri, li minzugneri, e li diffamatura.

    Chisti vinevanu cunnannati a girari pi la cità cu na curuna di pampini supra la testa comu signu di la so' disonistà. Li disirtura eranu cunnannati a stari nta na cantunera di la chiazza di la cità pi tri iorna, vistuti di fimmina comu signu di la so' dibulizza e pi essiri disprizzati di li citatini. Pi la prima vota nta la storia, li tistimonii favusi fôru puniti di la liggi. Caronda fu lu primu capu di Statu chi misi la liggi chi la scola a li picciriddi poviri ci l'avia a pagari lu Statu. Caronda sopratuttu prutiggiu l'orfani, e pruibiu a omini veduvi chi si rimaritavanu di serviri nta l'Assimblia. Si na pirsuna tineva accussi picca a li so figghi a lu puntu d'imponiricci na matrigna, a sta pirsuna nun si puteva aviri fiducia a serviri nta l'Assimblia di Statu. Puru pi l'orfani iddu fici la liggi chi di iddi s'avianu a ntirissari li parenti materni, mentri li parenti paterni eranu ncarricati di amministrari li beni di li picciriddi orfani. Siccomu l'eredi in casu di la morti di li picciriddi eranu li parenti paterni, era megghiu chi iddi nun s'incarricassiru di li picciutteddi, picchi nta stu casu era pussibili di succediri quarchi cosa a li picciutteddi.

    Pi evitari chi l'omini pulitici canciassiru li so liggi, Caronda fici na liggi ca si qualchidunu vulissi canciari na liggi, dda pirsuna avia a cumpariri nta l'Assimblia e avia a prisintari la liggi dicennu li so' ragiuni. Si la so pruposta nun passava iddu pirdeva la vita. Caronda avia pi daveru un rispettu riligiusu pi la liggi: iddu avia pruibitu a qualunqui di iri a l'Assimblia armatu. Un ghiornu, di ritornu a dari la caccia a briganti, sintennu ca c'eranu grida nta l'Assimblia, curriu pi mettiri ordini. Qualcunu ci fici nutari ca iddu avia ruttu la liggi picchi era armatu. Caronda subitu tirò la spata e dda stissu s'ammazzò. 

 

    Un esempiu di la cuntrarietà di li Siciliani versu la viulenza l'avemu finu di lu 480 a.C. Dopu la vittoria di Imera di Siracusa e Agrigentu supra Cartagini, a muggheri di Geloni, Tirannu di Siracusa e figghia di Gironi, Tirannu di Agrigentu, fici mettiri n'articulu nta lu trattatu di paci ca li Cartaginisi di ddu mumentu n poi nu putevanu cchiù sacrificari lu primu natu, a li dei, appena arrivava a lu decimu annu.

    Li Rumani, e sopratuttu Marcu Tulliu Cicironi, vantavanu la buntà, la ginirusità, l'ospitalità, la lialtà e la cultura di lu populu Sicilianu. Fu di li Siciliani chi li Rumani mpararu a usari lu roggiu sulari, cioè la miridiana. Quannu lu Consuli Rumanu Marcu Valeriu Messalla, curiusu, vosi sapiri quali era lu significatu di ddu assi chi era chiantatu nta lu menzu di la balata di marmu nta lu muru di un palazzu di Catania, ebbi dittu chi ddu assi diceva l'urariu a secunna unni ittava l'ummira nta la balata. Subitu iddu urdinò di livari dda balata cu l'assi e purtalla a Roma. Naturalmenti a Roma la miridiana nun funziunò beni. I Rumani nun sapevanu chi la miridiana s'avia a rigulari a secunnu di la lucalità giugrafica. Li Rumani apprinneru puru di li Siciliani l'usu di bagni pubblichi, l'esistenza di li varberi, e l'usu di lu bonu cucinari. Infatti fu un Sicilianu, Archistratu di Gela, ca nta lu IV seculu a.C., scrissi lu primu libru di cucina, ntitulatu. " Lu Dolci Gustu". E fu un Sicilianu lu primu granni cuocu di li tempi antichi, Mitecu di Siracusa chi fu puru un matimaticu.

    Li Rumani vinceru a Cartagini grazi a la Sicilia. Fu n Sicilia chi li tri guerri Punichi foru di cchiù cummattuti, mentri a Sicilia sfamava, armava e visteva li ligioni Rumani. La Sicilia fu chiamata "A cartedda d'u pani di Roma" tantu pruduceva assai. Nu scritturi ngrisi di storia siciliana scrissi: - La Sicilia era accussì fertili ca l'isula addivintò na calamita pi l'emigranti: l'America di lu munnu anticu-. Stesicoru d'Imera e Teocritu di Siracusa nvintaru diffirenti misuri metrichi di puisia, mentri Empedocli d'Agrigentu fu unu di li cchiù granni filosofi, un matematicu, omu di Statu e scenziatu di fisica. Archimedi di Siracusa, di cui li scuperti fisichi e matematichi nni aiutanu finu a ora, fici difficili e longa a li Rumani l'occupazioni di Siracusa, grazi a li so' nvinzioni. Chisti fôru la catapurta, usata pi lanciari pruettuli (petri e avutri cosi) contru lu nimicu, l'arganu, cu cui pigghiava li navi Rumani quannu s'avvicinavanu a li mura di la cità, li isava e poi li lassava cadiri a sfrcillarisi nta l'acqua e li specchi ustura cu cui abbruciava li navi rumani nta la praia. Li Rumani eranu marvigghiati a ddi tipi di difisa e cridevanu di cummattiri cu dei nveci di omini.

 

La storia di la sicilia e di la so' terra è accussi gluriusa chi lu pueta latinu Lucreziu scrissi un puema pi la Sicilia, dicennu tra l'avutri cosi:

 

Giustu è chi chista terra di tanti biddizzi superba
Si fa d'insigna a li genti, e assai s'ammira, abbunnanti
D'invidiati beni, e ricca di nobili spiriti.

 

    Assai foru chiddi chi vantaru la mitizza di lu clima, la firtilità di la terra, la ricchizza di lu mari e la biddizza di li so' fimmini. A stu casu, Tucididi e Plutarcu parraru di la bedda Laide di Iccara, oggi Carini, e pi idda un pueta populari, pi vantari la biddizza di la so picciotta, cantò:

 

Bedda, ca si cchiù bedda veramenti
di la bedda di Liccari (Iccara) brillanti…

 

    Sicilianu fu Diodoru Siculu di Agira, ca, nta lu primu seculu a.C., scrissi la Biblioteca Historica nta 40 volumi. Chistu è lu menzu cchiù mpurtanti pi canusciri la storia siciliana. Apuleu, un filosofu Rumanu, natu a Algeri, chiamò li Siciliani Trilingui, picchi sapianu parrari lu Grecu, lu Cartaginisi (Punicu) e lu Latinu. Epicarnu di Siracusa, nta lu V seculu a.C. nvintò la cummedia scritta. Ci detti formi artistichi e tutti li futuri scrittura di commedi mudillaru li so' cummedi supra chiddi d'iddu. L'attitudini umuristica di li siciliani fu assai apprizzata di li rumani e fu Ciceroni chi a propositu scrissi:- Nun c'è na mala situazioni unni li Siciliani nun la portanu a situazioni comica.

    È n'opinioni comuni chi Marcu Polu (1254-1324) purtò li spaghetti di la Cina. Chista è la cosa cchiù luntana di la virità. Marcu Polu, nta lu so' libru "Il Milione", dici ca iddu canusceva la pasta prima di iri nta la Cina. La cridenza ca li spaghetti foru purtati nta l'Europa di la Cina, di Marcu Plolu, veni di una pirsuna chi nta lu 1500, pubblicannu lu libru "Il Milione", scrissi na nota a la fini di na pagina, dicennu ca Marcu Polu avia purtatu li spaghetti di la Cina. Chiddu chi Marcu Polu veramenti dici nta lu so' libru è ca visitannu l'isula di Piccula Giava, vitti "… l'abitanti usari na <<farina d'arbulu>> pi fari la mpastata di unni facevanu tanti cibi, comu li spaghetti e la lasagna chi facemu nuatri, e sunnu assai boni." Chista è n'affirmazioni chi dimostra ca iddu canusceva la pasta prima di li so' viaggi.

    È un fattu assicuratu ca li spaghetti o la pasta in ginirali, asistevanu quasi ducentu anni prima chi Marcu polu partissi pâ Cina. La pasta veni di la Sicilia. La prova nun si pò rifiutari, picchì nni veni di na surgenti storica tali comu lu giografu arabu Idrisi. Stu giografu fu ncarricatu di lu re Ruggeru II di Sicilia di scriviri na spusizioni ggiugrafica di tuttu lu munnu canusciutu di lu dudicesimu seculu, facennu risartari di cchiù la Sicilia. Idrisi, un seculu prima di la nascita di Marcu polu, scrissi nta lo so libru:-…A occidenti di Termini c'è lu paisi di Trabia, un postu chi fa ncantari, riccu di acqui pirenni e di mulina, unni fannu tanti tipi di pasta e in tanta quantità ca l'esportanu nta l'Italia e nta l'Africa. la pasta nasciu n Sicilia dopu ca vinniru l'Arabi e no picchì la purtaru iddi, comu purtaru tanti cosi, ma picchì n Sicilia si curtivava lu granu duru cu cui si fa la simmulina chi è la materia prima pi fari la pasta. Lu frumentu moddu, soffici, curtivatu nta quasi tutti li parti di lu munnu, produci farina pi fari pani e dolci e cosi accussi, ma no pasta.

    Fu 'n Sicilia chi nasciu lu primu Parlamentu di lu munnu chi elessi a Ruggeru II Re di Sicilia. A la so' corti di Palermu, Ruggeru, cuminciò a fari veniri li menti cchiù granni, la quali corti littiraria fu purtata a li sferi cchiù iavuti di Fidiricu II, puru iddu pueta, linguista, scinziatu, matematico e ligislaturi. Cu Fidiricu II la corti di Palermu s'affirmò comu la veru Scola Litteraria chi poi fu difinuta La Scola Puetica Siciliana. La corti di Fidiricu era china di li menti cchiù brillanti di ddu tempu: vinevanu di la Sicilia, Italia e puru di l'estiru. Sta scola fu chidda chi fici lu sautu versu la Lingua Vulgari, chiamata accussi mparauni a lu Latinu chi era la lingua classica. La Lingua Vulgari era un mistu di sicilianu cu chiddu chi poi fu chiamatu italianu. Sta lingua desi a la Scola na caratteristica naziunali, facennu perciò la lingua Siciliana la prima fra tutti. Accussi, comu fu affirmatu di Danti Aligheri, e, poi di lu poeta Petrarca, l'arba di la littiratura nasciu n Sicilia, duranti lu regnu di Fidiricu II, a Palermu.

    La morti primatura di Fidiricu II fici strata a n'avutra cundizioni storica, civili e pulitica, chi smuviu la Scola di la Sicilia a la Tuscana. Ddà, lu gran pueta Danti e po' Pitrarca e Boccaccio mposiru e affirmaru la lingua Tuscana comu Lingua Vulgari, e Danti la chiamò "Il dolce stil novo". La nova cundizioni civili e pulitica, dopu la morti di Fidiricu fu purtata di Carlu I D'Angiò. Favuruti di la Chiesa, li D'Angiò foru finalmenti abili di mettiri li manu supra la Sicilia. Siccomu la Sicilia nun vuleva accittari a iddu picchi vuleva li Svevi (discinnenti di Fidiricu), Carlu I, e nun sulu pi chistu, trattò li Siciliani nni la manera cchiù tinta pussibili: nigannu la libirtà e la la prupriità a lu populu. Ogni tipu di crimini fu fattu contru lu populu Sicilianu da stu Re e c'imposi tassi impussibili a pagarisi. Ma nun durò assai. Si divi sapiri ca li Siciliani sunnu assai gilusi e prutittivi di la famigghia, spicialmenti di li so' fimmini e picciriddi. Lu valuri familiari e lu sensu d'onuri sunnu li cosi cchiù cari e cchiù sacri a l'omu sicilianu.

    A lu 30 di marzu di lu 1282, lu lunniri dopu la Pasqua, iornu in cui li Siciliani, finu a oggi, hannu la tradizioni di cilibrari la Pasquetta, iennu 'n campagna pi fari scialati cu li famigghi e l'amici, li Palermitani nisceru fora di la cità pi divirtirisi a manciari e ghiucari. Un surdatu francisi ucchiò na bedda picciotta appena appena maritata e cuminciò a tuccarla cu la scusa di scupriri si purtava armi. La picciotta pi lu scantu e la virgogna svinni. Lu picciottu, so' maritu, arriniatu pi l'affruntu, scippò la spata a lu surdatu e l'ammazzò. Fu comu un signali: la genti si lassò iri contru li francisi comu un marimotu. Prima ancora chi si capissi chi succideva la fudda divintò comu nu brancu d'armali, senza risparmiari un surdatu francisi chi ci vineva menzu li pedi. Puru li civili vinevanu firmati e si nun eranu canusciuti eranu custritti a prununziari a parola "ciciri", picchi li francisi nun lu sapevanu diri e dicevanu "chichiri" e firmavanu accussi la so' sintenza di morti. Un puema pupulari espressi accussì l'odiu chi lu populu Sicilianu sentia versu li turturi e li riprissioni di Carlu I D'Angiò:

 

Nun v'azzardati a viniri in Sicilia,
ch'annu iuratu salarivi li coria,
e sempri ca virriti ntra Sicilia,
la Francia sunirà sempri li martoria.
Oggi a cu dici kikiri in Sicilia,
si ci tagghia lu coddu pi so Gloria;
e quannu si dirà "Qui era Sicilia",
finirà di la Francia la mimoria.

 

    Quarcunu ha dittu, e avutri ancora dirannu, ca la stragi causata da la rivuluzioni di lu Vespru Sicilianu fu causata di la barbarica natura di lu populu sicilianu. Mi pari chi avemu dittu abbastanza pi spiegari cui è, e chi cosa è lu populu sicilianu: la buntà, la ginirusità, l'ospitalità, li valuri di famigghia, li valuri umani di stu populu, ecc. ecc. Lu fattu è, nun avi mpurtanza cu si e cu nun si, quannu tu si misu nta na pusizioni unni lu to onuri, la to famigghia, la to libirtà, la to stissa vita sunnu trattati comu si nun esistissiru, li cosi cancianu, e ponnu canciari drasticamenti. Datici l'occasioni a un liuni nta na gaggia e nun si po' diri chiddu chi po' succederi. Carlu D'angiò esercitò nta la Sicilia na tirannia accussi uddiusa comu li Siciliani nun avianu mai vistu. Li Siciliani eranu cuntrari a lu regnu di l'Angioini finu di lu principiu e cu bona ragiuni. Iddi avianu statu libbiri e pi assai tempu avianu avutu atonomia di li putenzi straneri sutta lu so' Re.

    Carlu D'Angiò ci la fici pagari a li Siciliani cunfiscannuci li terri e li casi e tuttu chiddu chi pussidevanu, torturannu e dipurtannu assai di li genti, viulintannu li fimmini, furzannu l'aristocrazia a mantiniri l'ufficiali di lu so' esercitu nta li so' palazzi e di sirvirli, furzannu la pupulazioni a fari largu nta li so' casi pi li surdati, cu li cunsiquenzi chi na tali situazioni puteva causari nta li famigghi, e mpunennu un sistema di tassi pisantissimu. Carlu I stampò puru sordi di lanna e di ramu custrincennu li Siciliani ad accattarisilli cu li sordi d'oru. Sti modi di fari accussì riprissivi avissiru pututu smoviri muntagni a fari l'impussibili. 

 

    Sempri pi la buntà di l'animu sicilianu, fu unu scritturi Palermitanu chi pi primu nta lu seculu XVI, pruposi l'abulizioni di la pena di morti, dicennu: "Sta vita chi Diu nni desi, vurrissi chi fussi risparmiata". N'avutru sicilianu, nta lu 1580, prupusi l'abulizioni di la turtura, picchì tanti pirsuni s'accusavanu iddi stissi, di cosi chi nun avianu fattu, pi nun suffriri. Finalmenti fu la Sicilia a essiri lu primu Statu chi nta lu 1812 abuliu la pena di morti.

    Ora chi avemu vistu un pocu di lu fari di lu populu sicilianu tramiti esempi nni la storia siciliana, riturnamu a l'argumentu cu cui principiamu, veni a diri la mafia. Lu populu sicilianu ha statu pi seculi e seculi suggettu a occupazioni brutali, crudeli, opprissivi e riprissivi. Tali occupazioni hannu purtatu la Sicilia a la puvirtà, e tanti voti a lu puntu di vera fami pi mancanza di manciari, tuttu causatu di li putenti. Un populu spintu finu a stu puntu fa qualunqui cosa pi supravviviri: arrubari, ngannari, diri minzogni e pi difenniri e sfamari se stissi e li so' famigghi, puru ammazzari. A causa di chistu, cuminciannu nta lu Mediuevu, nasciu na setta sigreta chiamata "Li Vindicosi". Stu gruppu travagghiava pi lu beni di li poviri e l'oppressi, circannu a modu d'iddi di aggiustari li cosi sbagghiati chi li putenti facevanu a li debuli. A un certu puntu, assecunna di lu tipu di guvernu, chi capitò di nun essiri oppressivu, la setta scumpariu, specialmenti sutta Fidiricu III e poi Alfonsu IV dittu lu Magnanimu. Infatti nta lu seculu XV sti dui rignanti ebbiru assai a cori lu benessiri di li citatini e ci misiru un bonu capizzu a li nobili.

    Dopu la morti di Alfonsu IV, e cu l'assurgiri di lu regnu spagnolu, nasciu na forti lotta tra l'aristocratici di Sicilia pi lu controllu di tirritorio. Sta lotta lassò lu populu senza prutizioni contru l'oppressioni di li Baruna, e spissu nun avia mancu chi manciari. Di novu l'oppressioni, la riprissioni, la corruzioni di li Baruna, di l'Amministratura e di la Giustizia sunnu accussi forti di fari nasciri, pi putiri supravviviri, na forti dilinquenza nta li campagni contru la quali l'atorità nun rinisceva a fari nenti. Tuttu chistu sicutò pi seculi, assemi a piriudi di fami forti, causata di l'avidità di li putenti, di pestilenzi, causati di la nigligenza di li guvirnanti e di furtissimi tirrimoti. Chisti urtimi eranu causati di la natura vulcanica di l'isula. L'ingiustizi foru aggravati di lu guvernu Astrecu e poi fatti ancora peiu di lu guvernu di li Burbuna, li quali di novu iniziaru 'n Sicilia nu statu di tirruri, pi lu scantu ca putissi succediri a iddi chiddu ca succidiu a la Francia cu la rivuluzioni. Cu li Burbuna, l'ingiustizi e l'oppressioni arrivaru a lu puntu di fari crisciri la dilinquenza, ca nun è ancora mafia.
   

    Prima ancora di li Burbuna avia nasciutu n'avutra organizzazioni di dilinquenti, ma p'addifenniri li debuli e li poviri, chista era la setta di li Biati Pauli. Sta setta arrivò a lu puntu di essiri na putenza dintra na putenza, nu Statu dintra lu Statu, cuntraria a l'oppressioni di l'Amministratura di la liggi, chi l'amministravanu a vantaggiu d'iddi stissi. Era puru cuntraria a l'ingiustizi di li Giudiziari e a l'Ufficiu di l'Inquisizioni, chi dava giudizi e sintenzi chi partevanu di pinalità picunari, punizioni fisichi finu a sintenzi di morti. Sta setta, era cchiù o menu visibili assecunna di lu modu di guvirnari. A stu tempu nni la storia, la giustizia si vinneva, accussi si unu aveva sordi e assecunnu quantu pussideva, si puteva libbirari puru di la curpa di omicidiu. 

 

Cu li Burbuna trasiu la "Camurra" nta lu regnu di li dui Sicili, chi era na forma di mafia, un modu ligalmenti oppressivu di aviri di quarcunu chiddu chi unu vuleva. Si trattava di na estorsioni pulitica fatta di na triplici tassa di la vinnita di tituli nubiliari comu si fussiru all'asta, tanti voti lu stissu titulu vinnutu a tanti pirsuni e di na dunazioni mposta di lu Re, lu vicirè o avutri ufficiali pubblichi.. Li patruna di lu putiri eranu li ricchi e li putenti e iddi s'aiutavanu ntra d'iddi, finu a lu puntu chi pi qualunqui viulenza o delittu chi iddi facevanu eranu assicurati d'impunità, mentri lu populu comuni stava nta la miseria e vineva curputu siveramenti e rigurusamenti cu ingiustizi pi qualunqui curpa riali o mmintata.

    La suffirenza di lu populu era silinziusa e nvisibili a li nobili. A la genti arristava sulu ubbidiri e sirviri. Tuttu chiddu chi lu populu vuleva era un pezzu di pani pi supravviviri, mentri purtava supra li spaddi lu pisu di li ricchi e di l'aristocrazia, e la sivirità e la viulenza di li so' liggi. La Sicilia era a lu puntu di l'esasperazioni nta lu 1860, quannu vinni n Sicilia l'aiutu aspittatu. Giuseppe Garibaldi, animatu di un sensu di giustizia e puru di ambizioni pi lu putiri, vinni 'n Sicilia cu la menza prummisa di l'atonomia e di purtari benessiri. Cu l'aiutu eroicu di lu populu Sicilianu, Garibaldi libbirò la Sicilia di lu guvernu oppressivu di li Burbuna. Cummattiu contru li forzi burbunichi assicutannuli finu a li vicinanzi di Napuli. Ddà vicinu, nta la battagghia di lu Volturnu, Garibaldi scunfissi difinitivamenti li Burbuna e furzò Francescu II Di Burbuni a lassari lu tronu. Chistu avissi duvutu essiri pi Garibaldi lu mumentu bonu d'impatrunirisi di lu regnu di li dui Sicili. Inveci, cu na mossa di dibulizza di carattiri e di suttamissioni a la casa di Savoia, desi la so' vittoria a Vittoriu Emanueli II. Dopu siccomu nun ci desiru mancu un ncarricu di guvernu, cu lu cori nculluratu si ritirò nta l'isula di Caprera.

    Cu l'unificazioni di l'Italia, o megghiu, cu l'annessioni di la Sicilia all'Italia, la situazioni ecunomica 'n Sicilia nun migghiurò. A lu cuntrariu, pi l'inespirenzia e la gnuranza di la storia e la cultura Siciliana da parti di lu novu guvernu, e, specialmenti, dimustrati di lu Primu Ministru Camillu Bensu di Cavour, li cosi piggiuraru, e piggiuraru d'assai. Lu novu Regnu avia tanti nicissità, supra tuttu, ecunomichi. La Sicilia fu curputa cu l'impusizioni di na nova lingua: la lingua Italiana; liggi novi, supra lu mudellu di lu Piamonti, ca nun putevanu funziunari n Sicilia a causa di na cultura completamenti diffirenti e di na situazioni ecunomica completamenti opposta, cchiù un ammasso di tassi novi e pisanti chi li Siciliani nun putevanu pagari. L'oppressioni Spagnola addivintò l'oppressioni Italiana e si ntisi di cchiù picchi la genti s'aspittava un trattamentu megghiu di lu novu Re picchi era Italianu.

    Ma la cosa c'affinniu cchiù assai li Siciliani fu la leva. Li siciliani hannu un forti sensu di lu valuri di famigghia. Mentri la fimmina è onurata e rispittata comu la Patruna di la casa e lu centru di la famigghia, l'omu avi la granni rispunsabilità di pruvvidiri, suppurtari e difenniri la famigghia. La leva lassava la famigghia cu nuddu chi l'aiutava. Anchi si nta na casa c'eranu dui omini, la famigghia a stu puntu era abbastanza granni di aviri bisognu di dui omini pi sfamarisi, e un omu sulu nun abbastava, dati li scarsi risorsi di la famigghia. Li famigghi nun avevanu abbastanza pi l'omu, o unu di l'omini partiri pi militari, picchì pirdevanu tuttu e murevanu di fami. Chista fu n'avutra raggiuni pi l'omu sicilianu scappari e mittirisi fora liggi. È ora, infatti, chi pi la prima vota, si senti parrari di la "mafia", sia comu parola chi comu na forza contru la liggi. Sta genti, furzata da l'oppresioni di lu guvernu a divintari foraliggi, arroba pi campari e suppurtari li famigghi e a pocu a pocu si organizza nta na associazioni cu li so' propri reguli e liggi. Iddi nun arrobanu cchiù a casu, ma cumincianu a rubari a li ricchi e a lu stissu tempu aiutanu li menu furtunati. Cu lu tempu lu putiri d'iddi diventa accussì forti ca nveci di arrubari direttamenti, si mettunu d'accordu cu li ricchi e li putenti pi pruteggiri a iddi e li mali cosi chi fannu. La curruzioni di la Mafia si vidi già a l'orizzonti.

    A lu tempu chi Mussulini acchianò a lu putiri nta lu 1922, la mafia avia già cunsulidatu lu so` putiri nta li campagni. Sta genti a modu d'iddi avianu già fattu nasciri na speci di riforma agraria; furzannu li granni prupritari di terri a affittari li terri a iddi cu cuntratti. Ora lu prufittu va a li prupritari e iddi hannu a pagari assai beni li cuntrattura (la mafia) pi li sirvizi chi hannu fattu, e la genti chi travagghia nta la terra e li tassi. La mafia assicura lu travagghiu a li cuntadini, cumannannu accussi lu rispettu, la gratitudini e l'ubbidenza di li cuntadini, li quali ora hannu l'obbricu di nun putiri rifiutari qualunqui favuri ci pò dumannari lu binifatturi! È quasi quasi un modu ligali di fari sordi. Cu la nascita di lu Fascismu, la mafia si ittò a lu serviziu di lu novu putenti rigimi comu già avia fattu prima cu avutri partiti pulitici.. Ma na vota ca Mussulini si cunsulidò nta lu guvernu, nun vosi essiri identificatu cu la mafia. Ora la mafia era iddu e nun avia bisognu cchiù di nuddu. Cesare Mori fu unu sprigiudicatu capu di polizia chi s'avia distintu nta lu travagghiu pi lu so' pugnu di ferru. Nta lu 1925, Mussolini, cunsigghiatu di li so' cunsiggheri, numinò Cesare Mori, un omu chi Mussolini disprizzava, a pulizziari la Sicilia sradicannu la mafia.

    Na forti campagna vinni lanciata di lu guvernu contru la mafia, cu la scusa di astutari li foraliggi nta la Sicilia. Ma la ragiuni vera fu chidda di cunsulidari lu fascismu n Sicilia. Cesare Mori assartò la Sicilia cu 800 omini e un putiri illimitatu di fari e sfari chiddu chi vulia. Iddu cummattiu contru li dilinquenti cu lu carciru, l'asiliu e la cunfiscazioni di li beni di qualunqui chi fussi suspittatu di favuriri la mafia. Li sò metudi eranu crudeli e ingiusti. Sta lotta brutali contru la mafia nun arrivò a lu so' fini; fu un cumpletu fallimentu. Nun fu avutru chi n'azioni poliziesca senza cunsiquenzi suciali. Mori fu sulu abili di arrascari la crusta di la mafia, di mulistari li gruppi cchiù nichi e cchiù debuli. Quannu cuminciò a pistari li pedi a li pisci grossi, un telegramma di Mussulini lu richiamò a Roma e ci livò lu mpiegu. Comu si vidi, e comu un deputatu Sicilianu dissi nta un discursu a la cammara di deputati nta lu 1899: -La stituzioni di la mafia nun è la virgogna di la Sicilia, ma cchiuttostu la virgogna di lu guvernu chi la manteni.

    Finu a stu puntu, e finu a lu 1946, la mafia opira e si fa cchiù granni nta li campagni, ma cu la diportazioni di Luky Lucianu, rilasciatu di li Stati Uniti pi li sirvizi chi fici a li forzi alliati, facilitannu lu sbarcu nta la Sicilia, la mafia va attraversu un piriodu di rinnuvamentu. Ora la mafia s'introduci nta li cità, accumincia cu li cuntratti di travagghi pubblici e privati, cuntrolla la prostituzioni, vinni mpieghi statali, fa siquestri di pirsuni, lu contrabbannu di sicaretti, ecc. Cchiù appressu la mafia scopri la droga (unni si ponnu fari ernormi summi di sordi nta picca tempu), traficu illecitu d'armi, e riciclamentu di sordi. L'anni '70, '80 e '90 sunnu li cchiù brutti nta la storia di la mafia. Chenchi rivali s'ammazzavanu ogni ghiornu pi lu cuntrollu di lu tirritoriu. Comu si vidi di chiddu chi avemu dittu, la mafia nasciu cchiù comu prutizioni pi li debuli e no comu n'organizzazioni fora liggi per sè. Ma, comu qualunqui cosa umana pò fari, idda diginirò nta na cosa fortimenti immurali.

    Nta lu 1980, subitu dopu aviri scunfittu li Brigati Russi nta l'Italia di lu Nord, lu Ginirali di li Carabineri, Carlu Albertu Dalla Chiesa, fu mannatu n Sicilia, pi luttari contru la mafia. A causa di li forti nteressi di genti pulitichi di lu guvernu, la sira di lu 3 di sittemmiru, 1982, a li 9 e 45 di sira, mentri lu Ginirali turnava a casa di lu travagghiu (anchi si nuddu avissi duvutu sapiri lu so itinirariu), fu ammazzatu a un simaforu assemi a so' muggheri e li so' guardi di corpu, nta na strata di Palermu. La genti di Palermu incheru di ciuri lu postu unni ci fu l'assassiniu e ci misiru na tabella unni c'era scrittu: "Cca muriu la spiranza di lu Sicilianu onestu." Comu unu di li cchiù famusi scritturi siciliani, Santi Correnti, dici: Ci sunnu cincu miliuna di genti n Sicilia, e sulu qualchi 3500 membri di la mafia. Dopu aviri avutu sta ucchiatedda nta l'anima Siciliana e la so' storia, e dopu taliari a lu numaru di statistica tra li membri di la mafia e li cincu miliuna di Siciliani, chi s'ammazzanu a travagghiari onestamenti pi putiri campari, comu è chi qualcunu pò diri ca diri Sicilianu è comu diri mafiusu?

    Iu nun m'aspettu ca li cosidetti giurnalista o li regista o li pruduttura di tilivisioni e di film capiscinu o cridinu a tuttu chistu; dopu tuttu iddi chi nni sannu di oppressioni, pirsicuzioni pulitica, civili e riligiusa, d'ingiustizi, di fami causati di l'avarizia di li putenti, di li pistilenzi causati di l'apatia e la trascuranza di lu guvernu. Infatti iddi dimostranu ca nun nni sannu nenti di tuttu chistu e chi mancu c'importa di leggiri la storia pi struirisi supra li fatti, o pi scelta o pi ndiffirenza.