Caronda
Expand Window  |   Homepage

   La venuta di greci n Sicilia nun fu n’occupazioni militari e mancu n’azioni di espanzioni di tirritoriu da parti d’iddi. Cchiuttostu fu n’emigrazioni d’un gruppu di genti o gruppi di famigghi di la sò matri patria n cerca di libbirtà di li forti tassi e rigulamenti gravusi, di parti di la classi aristucratica e di lu sò cuvernu, ca li vuleva teniri nton statu di quasi scavitù. La forti disoccupazioni fu n’avutru grossu puntu chi furzò dda genti a campari in modu poviru e n certi casi n cumplita disulazioni. Li primi greci chi emigraru n Sicilia, s’impatruneru di tanta terra quantu nni putevanu cultivari, facennuni na pruprità privata. A tutta prima pruvaru a cunviviri cu li siculi ca eranu già dda, ma poi a picca a picca, siccomu nn’arrivavanu sempri di cchiù, accuminciaru ammuttari li siculi sempri cchiù versu l’internu di l’isula.

   Cu lu tempu certi gruppi di famigghi o quacchi famigghia granni, o pi cooperazioni ntra d’iddi o pi granni numaru di famigghia, addivintaru putenti, stabbilennu na speci di classi, chidda chi si putissi chiamari aristocratica, ricuminciannu a furmari na sucità comu chidda c’avianu lassatu. Stu gruppu di famigghi, o famigghia singula, siccomu s’avianu arriccutu, forsi picchì avianu cchiù terra o un cummerciu di granni prufittu, avianu addivintatu cchiù ntisi, pigghiannusi lu rolu di capi di la cumunità, aggiustannu liti, dicidennu comu avianu a ghiri li cosi e mittennu reguli ginirali. La vuci si spargiu di sta isula cu la terra fertili e cchiù genti vinevanu n parti diversi di l’isula, li comunità s’ingrannevanu e addivintaru cità, ca poi cchiù appressu si organizzaru a cità-statu. Sti cità-statu avianu n’assimblia e un capu di statu. Una di sti cità funnata di li greci fu Kata Aimen (chi veni a diri “vicinu l’Etna”) chi cchiù appressu addivintò Katane e all’urtimu Catania. Versu li 650 a.C. u capu di lu statu di Katane fu Caronda, ca dicinu ca fu di famigghia di buggisi, e chi fu lu cchiù granni legislaturi di l’antichità, e lu spiritu di li sô liggi è vivu ancora oggi.

   Li sô liggi nu sulu foru usati nta la sô cità ma cchiù appressu foru puru aduttati di tanti cità di la Magna Grecia cioè n Sicilia e nta l’Italia miridionali e cchiù tardu ancora nta certi parti di la Grecia e puru di l’Asia. Macari Aristoteli parrò di Caronda cu maravigghia, comu unu di li cchiù granni ligislatura c’avianu asistutu finu a ddu tempu. Caronda fu lu primu a stituiri liggi pi puniri li disirtura, facennuli vestiri di fimmina e facennuli stari nta la chiazza pi essiri visti di tutti, facennucci sentiri la virgogna di la sô vigliacchitudini. Fici liggi pi puniri tistimoni favusi, a cui, nveci di daricci pena di carciri, cci faceva mettiri ntesta na curuna di tamerici (n‘erba disprizzata), e ci faceva girari li strati di la cità, pi tutti sapiri ca eranu genti a cui nun si puteva aviri fiducia. Caronda fu l’iniziaturi di la struzioni pubblica facennu la liggi ca li picciriddi poveri avianu a ghiri a scola a spisi di lu statu. Pruibbiu a li veduvi chi si maritavanu arreri di essiri cunziggheri di statu, dicennu ca un omu chi è accussi duru d’imporri na matrigna ê sô figghi nun puteva dicidiri giustamenti l’interessi pubblichi.

   Caronda fu un gran difinzuri di l’unità familiari e urdinò chi l’urfaneddi avianu a essiri n cura di li parenti materni, mentri li beni ereditati avianu a essiri curati di li parenti paterni; l’idia era ca accussi li picciriddi eranu rispittati e ben curati e li beni eranu beni amministrati. A lu stissu tempu iddu fici na liggi chi mpuneva a un parenti riccu di maritari l’orfana cu na bona doti.  Li liggi di Caronda sunnu canusciuti comu “li Codoci Calcidisi”, e sunnu mpurtanti picchì hannu un tonu univirsali: la santità di la famigghia e lu benessiri di li picciriddi, cosi chi iddu cunzidira li basi pi nu statu forti.

Chisti sunnu un pocu di li liggi di Caronda:

• L’omu nta li sô pinzeri e azioni avi a dumannari a li dei la guida e accussì ci vennu aiutu
   e idei boni.

• Unu avi a evitari mali azioni pi tinirisi li dei amici, picchì iddi nun hannu nenti n cumuni cu
   la genti tinta.

• Chiddi chi sunnu cunzidirati mali azioni sunnu: disprezzu pi li dei; oltraggiu versu li ginitura,
   offisa a li magistrati e a la liggi.

• Ognunu s’avi a sfurzari a cuminciari e finiri un travagghiu cu dignità e dicoru.
   Li ricchi c’aiutanu li poviri comu li ginitura chi nzignanu a li picciriddi rispettu e amuri versu la
   patria hannu a essiri vantati. Chiddi chi sunnu poveri senza nudda curpa d’iddi, hannu a essiri
   aiutati; ma no chiddi chi sunnu poveri picchi sunnu lagnusi e dissoluti, picchì accussì unu
   s’inzigna a fari mali cosi e a divintari na mala pirsuna.

• Unu avi a amari la virtù e pi chissu è bonu aviri amici di granni meritu.

• Li morti hannu a essiri anurati nun tantu cu lacrimi e cumpassioni ma imitannu li sò virtù
   e uffrennucci primizi.

Caronda era assai siveru e rigidu cu li so liggi e misi a liggi dû tagghiuni “Occhiu pi occhiu…” 

   Una di li liggi di Caronda pruibeva a tutti di trasiri armatu nta l’assimblia, pena la morti. Un ghiornu turnannu di na battuta contru li briganti, arrivatu nta chiazza unni c’era lu palazzu di l’assimblia, ntisi forti vuci ca vinevanu di la sala di l’assimblia. Pinzannu ca ci fussi na sciarra, curriu dintra pi rimettiri l’ordini. Unu cci fici nutari ca iddu avia ruttu la liggi picchì avia trasutu armatu nta l’assimblia. Allura iddu, cuscenti di lu sbagghiu e di la liggi, tirò fora la spata e s’ammazzò. Chista era la liggi.