Natali N Sicilia
Expand Window  |   Homepage

I canti di l'orbi

Di Fara Misuraca
Traduzioni n sicilianu di Ninu Russu

   Nta Sicilia Lu tempu di Natali è fattu tradizionalmenti cu na serii di cirimoni riliggiusi, pratichi di divuzioni, particulari usi alimintari e diffirenti tipi di iocu. Tra li manifistazioni natalizi nun nni putemu scurdari li tradizioni di cantu e di musica e li rapprisintazioni di drammi musicali chi l'accumpagnanu. La tradizioni musicali cchiù canusciuta, sutta lu puntu di vista riliggiusu era certu, e forsi è ancora, la nuvena chi dava anchi l'occasioni di iuncisi cu l'amici, parenti e vicini di casa, ca si riunevanu pâ festa.

   Li nuveni di Natali cunzistevanu in prieri e canti riliggiusi chi ntê novi iorna, prima da notti di Natali parravanu di la natività: "l'Annunciazioni, la Nascita, e la Fuitina pi l'Eggittu. C'era la tradizioni ca avvicinannusi lu Natali si priparavanu vicinu la porta di casa atareddi, beddi cunzati cu ciuri, frutti (aranci, ficusicchi, nuci ecc.) e ramuzzi virdi di cipressu, prova di la forti divuzioni. Li nuveni eranu sopratuttu ricitati di cantastori orbi, chi li parrucciani prinutavanu, sia pi dintra ca pi fora davanti all'atareddi. Lu gruppu di cantanti di solitu era furmatu di dù pirsuni: un viulinista cantanti orbu e un chitarrista chi l'accumpagnava. Di l'Ottucentu n poi li nuveni, comu dici Pitrè, foru fatti puru di li ciaramiddara e di avutri sunatura diffirenti, ma no orbi. Li canzuni eranu tramannati pi via di ucca e spissu si rifirevanu a ddi vanceli ca finu dû mediuevu avianu statu pruibuti dâ cresia.

   Fu sulu versu la fini di lu seculu diciottesimu chi sti cosi (canzuni) si cuminciaru a scriviri e arrivaru finu a nuiatri. A la fini di la "cantata" lu parruccianu cci uffreva ê sunatura pani, frutta sicca, vinu e quarchi surdiceddu (cu era picciriddu nta l'anni cinquanta pò essiri ca ci penza ancora a lu passari pi li strati di sti pirsunaggi vistuti di pastura ca si firmavanu davanti a li casi a cantari a nuvena). A dumanna dâ ricumpenza spissu faceva parti di la canzuna ca fineva cu na ditta di stu tipu:

 

È nasciutu lu bammineddu
Datimi lu carrineddu,
(Munita di li tempi)

O puru

È finuta la sunata
Li dinara e li cucciddata.

Ccà appressu ripurtamu li paroli d'una di sti cantati riggistrata di l'urtimu canturi orbu di
Palermu, u Zu Rusulinu, ca muriu nta lu 1975. (rappurtata di E. Guggino, 1980)

Sennu ddà la stidda iunta
Tutta a picu si furmau
Ribassannu la so punta
Chidda grutta cummigghiau.

Poi cumanna a tanti genti
Cui di supra e cui di sutta
Pi vidiri chiaramenti
Cui ci abita nna dda grutta.

A lu trasiri di dda genti
Riturnaru spavintati
A li tri re di l'orienti
Ci dissiru "ammirati!"

Trasi Gaspari e dicia:
" O me Diu riccu trisoru
ti purtavu di parti mia
stu vasettu chinu d'oru".

Baldassari cu dicoru:
"o me Diu T'aiu purtatu
iu l'incensu pi ristoru
chi sarrà sacramintatu".

Miccioni umili e gratu:
"O me Diu di tanta altizza
iu la mirra t'aiu purtatu
servirà pi tua amarizza".

La so matri cu pristizza
Cci sfasciò lu figghiu raru.
Li tri re cu cuntintizza
Mani e pedi cci vasaru.

Gloria, Gloria ca nasciu
Lu veru uomu e veru Diu.

 

I cantastori Orbi di Palermu

   La mimoria dî cantastori orbi avi li basi luntani nta lu tempu e nni veni di li granni pueta cantanti di lu mitu. Orbi eranu Omeru e Dimodoru, li veru cantastori, comu puru eranu orbi l'induvini Fineu e Tiresia. La cicità di li granni pueti e di l'induvini nta li miti greci è rapprisintata comu un donu divinu, o di natura sacra: l'ispirazioni e la chiaruviggenzia. Lu pueta comu l'oraculu avi l'occhi chiusi a li cosi tirreni ma l'avi aperti a na rialità diffirenti. Cu lu passari di l'anni, lu cantastori orbu pirdiu sti qualificazioni nobili. lu sô misteri accuminciò a essiri ragiuni di nicissità, vista la limitata capacità di travagghiu, pi putirisi procurari di campari nta na manera dicurusa.. Nta lu piriudu classicu li puenti cantura eranu rispittati e anurati. Putemu pinzari a Demodocu â curti di li Fiaci o a Femiu â curti d'Itaca o a Omeru ca li rapprisintava tutti.. Lu ripirtoriu d'iddi era furmatu assai di fatti mitici e atti valurusi d'eroi comu puru di canti e musichi prufani. Sti carattaristichi nun hannu canciatu cu lu cursu di li seculi ma canciò nveci la pusizioni suciali di sti cantura.

   L'orbi eranu sunatura ambulanti e mindicanti, e di lu mediuevu n poi chistu ha statu lu stereutipu di lu cantastori orbu anchi si la prisenza d'iddi ha statu truvata puru â curti di palazzi signurili. La prufissionalità e la bravura di sti sunatura, nviati di quann'eranu picciriddi a lu misteri sutta la guida d'un maistru, li faceva ricircati nta li festi di li ricchi. La maggiuranza d'iddi però campavanu comu sunatura ambulanti, accumpagnati pi guida d'un cani o di un picciutteddu cchiù poveru d'iddi. Mpalermu tra lu 1660 e lu 1665 successi un canciamentu: cu l'iniziativa e sutta la guida di patri Gesuiti e grazi a li dunazioni di certi famigghi, l'orbi si pottiru uniri nta na cungrigazioni ntitulata La Mmaculata Concezioni cu la sedi a la Casa Professa di Palermu. Assai sunnu li cungregazioni chi nasceru a causa di chidda di Gesuiti, cu la sedi a Casa Professa, tra cui chidda di li nobili, di li sacerdoti, di l'artefici, di l'operai e tanti avutri. La vita d'iddi fu sempri turmintata picchì suffreru sempri la surti diffirenti dî Gesuiti. Dui dati mpurtanti e ducumintati dâ storia di la cungrigazioni di l'orbi sunnu lu 14 austu 1755 quannu si detti o rificiru lu statuto e lu 30 novemmiru 1767, lu iornu ca i Gesuiti foru espulsi.

   Dui misi prima n fatti la Giunta Straurdinaria supra l'abusi aveva giudicatu n manera precisa supra l'operatu di la Cumpagnia di Gesù, difinennu lu sô scopu "lu cchiù immurali, lu cchiù sporcu, lu cchiù inumanu, lu cchiù culpusu" e chi " avia currumputu la giuvintù, guastatu li custumi, canciatu la fidi, suvvirtutu li populi" (F. Scaduto, Stato e chiesa nelle due Sicilie, 1969; F Renda, Bernardo Tanucci ed i beni dei gesuiti in Sicilia, 1974). Li cungrigazioni attaccati a la Cumpagnia di Gesù, fra li quali chidda di l'orbi, si tinniru li propri aviri, ma foru difinitivamenti alluntanati di Casa Professa ntô 1773, quannu, lu 21 lugliu di dd'annu lu papa Clementi XIV licinziò la Cumpagnia di Gesù.

   Ma la nostra cungrigazioni rinisciu a ripigghiari pusessu di certi lucali doppu lu 1805, quannu li Gesuiti ripigghiaru lu sô postu, doppu ca fu ripristinatu l'Ordini nta lu 1804, ma fu nta lu 1828 ca lu novu statutu vinni appruvatu di Francescu I di Burbuni. Nta stu statutu vennu stabbiluti li reguli pi trasiri nta cungrigazioni: essiri orbu, di custumi boni, sapiri usari nu strumentu musicali (giniralmenti viulinu, chitarra, viuluncellu). Doppu l'ammissioni eranu necessari sei misi di nuviziatu. Chiddi chi sapevanu sulu sunari, ma un sapevanu cantari o fari canzuni, avianu a pagari na tassa d'iscrizioni di 4 tarì e dui grana la simana.

   Li cunfrati, na vota appruvati e doppu aviri supiratu u nuviziatu, putevanu guadagnarisi di campari cantannu e sunannu prieri e stori sacri pi li strati. Si stabbiliscinu puru li reuli di elizioni dî supiriura e di tutta na seri di pirsunaggi menu mpurtanti e di li rispittivi obblichi chi hannu, cosa ca duna l'idia di na sucità fortimenti custutuiuta e girarchizzata. Si stabbileru puru li benefici ca spittavanu a li cunfrati: dirittu di sibburtura, dirittu d'assistenza n casu di malatia e speci n casu di malatia murtali, nta stu casu ddu puvireddu avissi avutu un "rinfriscu" di sei tarì p'accattarisi cosi duci. Ma supratuttu cu stu statutu lu statu limitava l'intrumissioni dî Gesuiti nta li quistioni timpurali e facia cchiù libbira la prufissioni di sunaturi, abbulennu lu privilegiu viscuvili ca ubblicava l'orbi a scrivirisi â cungrigazioni pi putiri fari lu misteri di sunaturi ambulanti. La cungrigazioni si finanziava cu li sordi guadagnati di cunfrati e virsati sutta nomu di "contribbutu vuluntariu" ma veramenti ubblicatoriu e riulati cu forti riguri. Cu stu statutu l'orbi arrivanu a lu scopu di cuvirnarisi pi cuntu d'iddi anchi si cuntinuanu a aviri lu benificiu di usari li lucali di Casa Professa, cu picca sudisfazioni dî Gesuiti c'avissiru vulutu ca s'assuggittassiru a li Reuli di li Cungrigazioni spirituali, limitannu assai la libbirtà ndividuali. D'allura n poi orbi e Gesuiti foru sempri n guerra.

   Chiddu chi sapemu supra lu modu di operazioni di l'orbi Mpalermu e supra lu sô ripirtoriu è pi mmenzu di Villabianca: eranu soliti cantari e ricitari pi li strati canzuni sacri ma puru chiddi prufani e sopratuttu mpruvvisari puisi nta li festi pi li santi (triunfi) e "canzuni ridiculusi" pi li festi prufani comu "Lu curnutu cuntentu", "La storia dû mischinu", "Lu nnimoniu tantaturi", ecc.L'orbi eranu chiamati puru pi quarchi sunata, veni a diri nta l'occasioni di quarchi ballu. Nta sti casi avianu un ripirtoriu granni di ballu comu "La napulitana", "lu diavulicchiu", "la ngrisina", "la lannisi", "la salariata", "lu trasi e nesci", "lu mainettu" ecc. L'orbi grapevanu puru lu spittaculu all'opira di pupi. Tra li canti di l'orbi, certuni parravanu di fatti successi di ricenti. Perciò sti cantatura sirvevanu puru pi dari nfurmazioni e comu "purtatura di curtura pupulari". Sunnu ntirissanti pi chistu li tistimunianzi e li canzuni chi ficiru e diffunneru doppu lu 1860, ca foru arricugghiuti di Salvatori Salamuni Marinu. Chisti parravanu di Lu saccheggiu di Palermu, chiddu di Carini, Li morti di Milazzu, La battagghia di Calatafimi ecc. Li cantatura, o cantanti, nta stu casu eranu veramenti pueti, comu chiddi dâ Grecia antica.

   Mentri nto restu di l'Italia, dû mediuevu a oggi, la fiura dû cantanti orbu nun risurta simbuliggiata bona tra lu gruppu di cantastori, mmiscata com'è a chidda di giullari, cantura di guerri, buffuna e sautabanchi, n Sicilia, e n particulari Mpalermu, ô canturi orbu arristò affidata na tradizioni particulari, tantu ca stu tipu di canturi, anchi si recita suggetti prufani, resta sempri attacatu a occasioni di carattiri riliggiusu: prieri, nuveni e festi sacri e manteni comu strumentu priviliggiatu lu viulinu. A storia di paladini nfatti era un suggetu esclusivu di cantastori e li stori di cronaca li cantastori ca li discrivevanu cu l'aiutu di cartilluna addisignati a culura vivaci, l'accumpagnavanu câ chitarra , muvennusi d'un paisi a n'avutru nta l'occasioni di feri e festi e guadagnannusi di campari vinnennu li fogghi cu li stori addisignati e culurati.

 

Nonno Gregorio cû viulinu
Foto di la mità di lu 1800

 

   Nun nn'amu a scurdari poi ca l'asistenza di na cungrigrazioni fortimenti strutturata ubbricava, pi statutu, ca ogni cumpusizioni nova, riliggiusa o profana, avia a essiri giudicata di li cunsultura e di tutti li cunfrati, e spissu chiddi novi (cumpusizioni) eranu un fruttu di rifacimentu n chiavi pupulari dd'un patrimoniu di cunuscenzi littirari, mannannu a spuntaniità e l'inginuità a gammi all'ariu. L'abilità di usari lu strumentu musicali nun era mai spuntania, ma, anchi siddu si nzignavanu di nichi "a aricchia", era poi fruttu di nu studiu cuntinuu sutta la guida d'un maistru. Nta cungrigazioni certu nun ci fu mai na vera e propria scola. È prubabili ca la priparazioni di sti sunatura la facianu a la Casa di li Spersi, funnata nta lu 1617 e ntitulata Lu Bon(?) Pasturi. Chista avia nasciutu comu ricoveru (furzatu) di picciutteddi poviri, tra i quali orbi chi vinianu livati di li strati, cioè vacabbunni, pi nsignalli e struilli. Veramenti nun era na opera pia, picchì nta sta Casa si facevanu viulenzi e sfruttamenti.

   Li siculari si nzignavanu a sunari strumenti diffirenti e a cantari (pi chistu li castravanu, senza assunnalli… picchì ancora l'assonnu nun asisteva e lu facianu senza cunzenzu). Ntô 1917 lu Culleggiu dû Bon Pasturi lu chiuderu e nasciu lu conzirvatoriu. Nta l'Ottucentu nveci, splicitamenti pi l'orbi, fu funnata na scola pi menzu dû sacerdoti Giovanni Crollo. Assai picciuttedi poviri e orbi friquintavanu sta scola pi quarchi annu, pigghiannu na curtura e na maistria sufficienti a mittilli n cundizioni di guadagnarisi lu pani cû sô travagghiu. Sta scola, nta lu 1892, cu lu patruciniu di Gnaziu Floriu, addivintò lu Stitutu di l'Orbi, na scola vera e propria unni, fina a oggi, veni datu nu nsignamentu littirariu, musicali e tecnicu.