N'ucchiata a la Sicilia
Expand Window  |   Homepage

   La Sicilia è una di li dicinnovi rigiuni di l'Italia, c'un guvernu semi-autonomu. La Sicilia è divisa nta novi pruvinci: Agrigentu, Caltanissetta, Enna, Messina, Ragusa, Siracusa, Trapani e Palermu chi è la capitali. La Sicilia avi assai porti di mari, ma sulu tri sunnu chiddi cchiù mpurtanti: Palermu, Messina e Catania. La catina muntagnusa di la Sicilia (li Piluritani e li Madunii) sunnu a continuazioni di la catina di l'Appennini di l'Italia. Chistu nni fa pinsari ca un tempu, forsi, la Sicilia e l'Italia eranu iunciuti.

 

U Carrettu Sicilianu

 

   La sicilia è bagnata di lu mari Ioniu a Est, di lu mari Tirrenu a Nord e di lu mari di Sicilia a Sud. Sti tri mari sunnu, naturalmenti, unu, cu lu nomu di Mari Mediterraneu, chi significa: "Mari mmenzu li terri". La Sicilia avi n'area di circa 10.000,00 migghia quatrati e na populazioni di 5.000.000,00 di pirsoni. Un quartu di la pupulazioni travagghia nta l'agricultura, e lu restu travagghianu cu lu cummerciu, servizio civili e avutri occupazioni di serviziu. La Sicilia produci citru, granu duru, vegetali, oliva e racina pi tavulu e pi vinu. L'industri Siciliani producinu sali chimici, surfaru, materii chimichi, navi, midicinali, ogghiu crudu e raffinatu, e manciari processatu. L'economia di li cità costali è regulata di cchiù di l'industria di la pisca.

   La Sicilia avi na storia antica chi ci duna la prima luci a circa 3000 anni fa. Di li primi genti nta la Sicilia videmu l'Elymi ( forsi di la Libia), li Sicani (forsi di la pinisula iberica) e li Siculi (di lu Laziu). Finu dû principiu la Sicilia fu visitata di assai e diffirenti genti chi ficiru risidenza saltuaria nta l'Isula. Li Finici, ca fundaru Palermu, Li Greci chi chiamaru a Sicilia Trinacria e stabileru assai cità e paisi e li Cartaginisi, chi cummatteru assai guerri supra lu nostru territoriu. Cu lu tempu la cità di Siracusa addivintò na granni putenza e lu tirannu Hiero II occupò la maggiuranza di la Sicilia, nclusi la putenza di Agrigentu, Gela, Himera, Catania e Messina. Versu lu 350 A.C. li Rumani, chiamati da li Mamertini di Messina, ntervinniru nta la Sicilia, contru Siracusa e Cartagini, pricipitannu la prima guerra punica chi durò 23 anni. Cu li Rumani chi vinceru la guerra contru li Cartaginesi, Roma occupò tutta la Sicilia, e, mentri Roma apparentimenti lassò li Siciliani libbiri di cuvirnarsi pi cuntu d'iddi, nni lu stissu tempu ci misi supra certi tassi, ma accussi pisanti, ca si diceva ca la Sicilia era lu granariu di Roma.

   L'occupazioni rumana durò assai, e fici la Sicilia lu tiatru di l'avutri dui guerri punichi. Nta lu V seculu d.C. la Sicilia fu accupata di li Vandali e poi di li Goti, finu chi finalmenti cadiu nta li manu di l'Imperu Bizantinu. Nta lu IX seculu A.C., l'Arabi Musulmani, chi p'assai tempu avianu cuminciatu ad allargari lu so' imperu tra tutti li nazioni custeri di lu Mediterraneu, accuparu la Sicilia, e cuvirnaru l'Isola pi circa 250 anni. Li Mori, comu foru chiamati poi l'Arabi Musulmani, nsemi a la firocità c'avianu, purtaru puru grannissimi arricchimenti di littiratura, arti, filosofia ecc. di li quali lassaru un forti signali nta la nostra Isula.

   Nta l' XI Seculu d.C., li Nurmanni, e n particulari Ruggeru I, assicutò fora di la Sicilia l'Arabi, e poi so figghiu Ruggeru II stabiliu lu regnu di Sicilia e Bassa Italia. Mentri la Sicilia avia statu economicamenti spussiduta di ogni occupazioni chi cci avia statu, sutta li Nurmanni l'Isula fioriu cu l'arti e cummerciu e divintò la nvidia di tutta l'Europa, pirchì lu modu di viviri di li Siciliani strapassò d'assai lu modu di viviri di lu regnu cchiù riccu di lu munnu canusciutu d'allura. Di li Nurmanni, a fini di la dinastia, cu lu matrimoniu di Costanza (l'urtima eredi di li Nurmanni) cu Enrico VI, mpiraturi di lu Sacru Rumanu Imperu, lu putiri iiu nta li manu di la dinastia Astreca di li Hohenstaufen. Fediricu II, figghiu di Costanza, puru iddu mpiraturi di lu Sacru Rumanu Imperu, si adopirò, comu so' nannu Ruggeru II, pi lu migghiuramentu di la Sicilia, facennu, tra l'avutri cosi, assai riformi amministrativi. Sutta d'iddu la Sicilia raggiunsi l'apugiu di lu benessiri e prosperità dannu a la Sicilia lu titulu di "Paradisu di l'Europa".

   Dopu d'iddu, lu Papatu misi nto tronu L'Angivinu Carlu I. Carlu fu accussì opprissivu finu a lu puntu di causari la rivuluzioni canusciuta comu li Vespri Siciliani (1282), e, doppu di chistu, li Siciliani si scelsiru comu re  Petru III d'Aragona, re di Spagna. Stu fattu spartiu lu regnu di li dui Sicili, lassannu l'angivini supra lu tronu di Napuli. Petru d'Aragona detti a la Sicilia libirtà quasi totali. Dopu d'iddu, cu l'unificazioni di la Spagna e cu l'avventu di la Dinastia Asburgu, la Sicilia cadiu di novu ni la tirannia. Nto 1713 a Sicilia fu data a la casa Savoia, ma sulu pi picca anni e poi riturnò a la Dinastia Asburgu.

   Nto 1734 la Sicilia e lu regnu di Napuli ieru nta li manu di li Burboni, e cu l'avventu a lu tronu di Spagna di Carlu re di lu dui Sicili, so' figghiu, Ferdinannu I, fu fattu re di li dui Sicili. Nta lu 1806, li francisi ci livaru a Ferdinannu I lu regnu di Napuli, e iddu si ritirò 'n Sicilia, e dopu li guerri napolionichi, Ferdinannu I ancora na vota fu re di li dui Sicili. Nta lu 1860 Giuseppi Garibaldi, cu li so' ligindari 1000 Camici Rossi, sbarcò a Marsala, catturò a Siclia, chi poi divintò parti di l'Italia unita. Duranti la Secunna Guerra Mondiali, la Sicilia suffriu l'occupazioni Anglo-Amiricana, e la Sicilia, e precisamenti ni li campagni di Catania, fu novamenti tiatru di un cummattimentu firoci, unni cchiù di 10,000 omini, tra Germanisi, Italiani e Alleati persiru la vita. A stu puntu eranu li cosi a lu 10 di Lugliu, 1943.