Sicilia, terra di lu suli. È misa nta lu menzu di lu mari Mediterraneu comu si ci l'avissi pusatu Diu. Vasata di lu suli e biniditta di la Natura, addivintau lu centru d'attrazioni di lu munnu civilizzatu anticu. Pi la so' pusizioni pulitica, cummirciali e giografica, e pi l'avvantaggiu strategicu chi teni, causò guerri longhi e battagghi di sangu tra assai nazioni. Di lu Sittintrioni a lu Miridioni, di lu luntanu Livanti a lu vicinu Punenti, tutti la vulevanu. Comu si leggi nta li libbra di storia siciliana, assai foru
li Re e li Generali chi cunchistaru l' "Isula dû Suli", comu la chiamava Omeru, ma idda nun fu mai shiava di
nuddu. La virità è ca idda conchista tutti cu lu suli chi sempri brilla, cu ddu ciavuru di zara ca fa stunari, cu l'arbuli chini di frutta culurita, cu la gioia nta lu cori, un sintimentu di suddisfazioni, n'allusioni di filicità. La so' storia pari senza fini.
Nuiatri cuminciamu ad aviri cocchi ucchiata di sta Isula gluriusa a cuminciari di comu trimila anni n'arreri. Nun avemu tanti nutizii di l'antichi abitanti, ma circa trimila anni fa fu quannu un populu di la pinisula iberica, circannu na terra megghiu, arrivò nta la Granni Isula di lu Miditerraniu e si stabbiliu nta la parti Nord-Occidintali di l'Isula. Lu ginirali di stu populu si chiamava Sicanu, e lu so' populu pi ringrazziallu chiamò la nova terra Sicania. Passò un pocu di tempu e n'avutra genti, sta vota di lu Laziu, vinni e s'impusissò di la parti Orientali di l'Isula. Lu nomu di lu so' Ginirali era Siculu, figghiu di Italu, e puru ora lu so' populu pi ringrazziallu di la bona guida ca avia datu chiamò sta terra Sicilia, in onuri di lu so'
Ginirali. Cintinaia d'anni passaru e assai cosi succideru, e nta lu mentri sti du' populi si mmiscaru, nsemmula guderu e suffreru, e a pocu a pocu, nun mi dumannati comu e picchì, lu bellu nomu di SICILIA risistennu a lu tempu e a la sfurtuna, a li Greci e a li Rumani, a li Finici e Cartaginisi, ristò scrittu pi l'eternu.
Terra
d'u Suli
Expand Window |
Homepage