A Nostra Lingua nta Storia

Song: Talè chi musica (Look, what a music) 

Expand Window  |   Homepage


Di Fara Misuraca
Traduzioni n sicilianu di Ninu Russu

   La quistioni dâ lingua n Sicilia (e criu puru nta lu restu di l'Italia) è na storia ancora tutta di scriviri anchi siddu ha statu affruntata di linguisti, filosofi, storici e littirati e, ora, veni usata di certi furmazioni pulitichi cu aspirazioni d'indipinnenza. Dû puntu di vista storicu a nuiatri nun ntiressa lu fenomenu linguisticu n quantu tali, siddu s'avi a cunzidirari lingua o dialettu, ntiressa nveci quantu, comu lingua, avi nfluinzatu lu prucessu di rinnuvamentu e di trasfurmazioni duranti lu passaggiu di lu tempu fiudali a lu tempu mudernu, quannu la Sicilia si truvò a affruntari l'unificazioni pulitica e culturali attornu a lu novu centru puliticu, ca era Napuli, e a lu novu gruppu diriggenti ca si stava furmannu.

   Nun è pi casu ca a quistioni di la lingua si riproponi sulu quannu cuminciò a furmarisi a burghisia isulana ed è attaccata forti a la rivinnicazioni di la nazioni Siciliana. È bonu però, pi megghiu capiri la situazioni, minziunari quali eranu l'intricci e li cuntraddizzioni di la situazioni linguistica. Lu Sicilianu originariamenti avia statu na lingua littiraria mpurtanti cu funzioni pristiggiusa e di cumannu puru nta penisula e comu funnamentu avia avutu a Scola Puetica Siciliana e lu fattu ca â curti di Fidiricu II si parrava, si scriveva e si puitava in arabu, latinu, grecu e, sopratuttu, n Sicilianu. Sta lingua, comuni o populu, a l'intellettuali e â curti, supravviviu â scumparsa dâ dinastia sveva e si usò, comu tistimonianu certi ducumenti aragunisi, finu a la fini di lu seculu XV quannu a Sicilia, sutta Alfonsu d'Aragona e di Castigghia, addivintò viciriami e arristò tali pi 440 anni.

   Nta ddu piriudu si virificaru du' fatti mpurtanti: a mminzioni e a diffusioni di la stampa chi aggivulò la circulazioni dî libra n manera viloci e chi nuddu s'avia mmagginatu finu a ddu puntu e a cunzulidazioni dû duminiu spagnolu ntô Mediterraneu e, pi quantu nni nteressa, ntâ penisula taliana. La Cancillaria di Napuli, centru di dumini aragunisi, scigghiu comu lingua l'italianu e siccomu la Sicilia era ntê dumini spagnoli, puru nta l'isula fu mposta la lingua Italiana-tuscana. Nun c'è di maraviggharisi di restu oggi, comu esempiu, ca grazi a la straputenza di l'Inghilterra prima e di l'America doppu, la lingua ufficiali du munnu e lu ngrisi. Sta situazioni vinni rinfuzzata sutta Carlu V ca rinisciu a fari di l'Italia na zona assai nfluinzata dâ Spagna.

   Di ddu puntu n poi ntâ Sicilia (e forsi ntâ tutta l'Italia) cominciò a fari radichi sempri cchiù funnuti a diglossia: tutti, pupulani e nun pupulani parravanu lu sicilianu, ma un sicilianu ntisu comu lingua, chi cuminciò a digradari picchi nun truvava sviluppu nun sennu cchiù na lingua cultivata e littiraria e sopratuttu nun sennu cchiù na lingua scritta. Nta lu stissu tempu li gruppi struiti usavanu l'italianu pi parrari e pi scriviri, appuntu pi siguiri lu sviluppu culturali dâ penisula. Già versu a fini dû 1500 n Sicilia, comu puru nta avutri riggioni taliani, la parrata lucali addivintò dialettu e l'italianu addivintò la lingua currenti usata nta l'uffici pubblichi, nta l'esercitu e nta qualunqui amministazioni. N'avutra lingua parrata era lu spgnolu, specialmenti ntâ classi pulitica spagnola, sennu ca cu sta lingua s'avia a cumunicari cû re e la curti.

   Comunqui lu sicilianu arristò na lingua "affittiva", comu lingua di cumunicazioni familiari e sopratuttu comu lingua dû populu analfabeta. Era l'unicu menzu di cumunicazioni senza taliari l'origini suciali di l'individu, di la sô prufissioni e di la sô struzioni. Pi gghiunta li parrati eranu diffirenti ntê diffirenti tirritori di l'isula e si facevanu sempre cchiù diffirenti mancannu un supportu sculasticu chi garantissi na grammatica e na sintassi chi nni facissi na lingua sula. E sopratuttu mancava un supportu littirariu. La puisia, l'addiminu, lu cuntu nun sunnu abbastanza pi fari affirmari na lingua, cci voli lu scrittu, lu romanzu (ca furniscinu la costruzioni sintattica) e lu rapportu tra l'istituzioni e lu populu. Stu rapportu nun pò essiri mantinutu nta tanti lingui, Roma nni duna l'esempiu. Lu monolinguismu sicilianu pi sta raggiuni cuincideva cu l'analfabitismu. Cu sapia leggiri e scriviri canuscia almenu du lingui e macari tri: lu sicilianu, l'italianu e lu spagnolu. Nta tutti li scoli, pubbrichi o privati e nta chiddi di gesuiti, n particulari, s'inzignava latinu e talianu, mai lu sicilianu, anchi si era parratu currettamenti. Nun c' è nu ntillettuali di ddu piriodu chi scrivi n sicilianu, abbasta pinzari a Mongitore e Villabianca, cchi avianu granni stima pi la cultura e pi li tradizioni siciliani.

   La quistioni dû sicilianu comu lingua naziunali siciliana fu misa mmenzu tra lu 1780 e lu 1790. (duranti li vicireami di Caracciolo e Caramanico e quannu De Cosmi avia assai putenza), dû principi di Turrimuzza e dû poeta Giuvanni Meli li quali si prupuneru di riscattari lu sicilianu dâ cundizioni di dialettu a chidda di lingua naziunali dâ Sicilia. Cci foru puru a ddi tempi tentativi d'imegnu ntillittuali, comu a pubblicazioni dû Vocabbulariu Etimologicu Sicilianu, Italianu e Latinu dî fratelli Pasqualinu e li opiri n Sicilianu dî  tri cchiù granni pueta dû tempu: Giuseppi Vitali, Domenicu Tempiu e Giuvanni Meli. Chisti però si prupunevanu di rifari un siclianu ntilliggenti supra l'esempiu di l'italianu-tuscanu. Ma nun ci arrinisceru. Li raggiuni dû fallimentu di sta niziativa foru tanti: la burghisia nascenti, pi esempiu, nun era ntirissata a un ricupiru di la lingua c'avissi fattu li comunicazioni difficili; l'intillettuali, cu n testa Giuvanni Aceto e Austinu De Cosmi pinzavanu ca lu turnari a na lingua ca tagghiassi lu menzu cumunicativu cû restu di l'italia era comu nu ndibbulimentu culturali.

   Lu De Cosmi anchi si nun putia niari ca i Siciliani foru i primi a puitari ntâ lingua "vulgari", veni a diri nun classica, appi puru a ricanusciri ca cu la scumparsa di li Svevi lu prugressu dâ lingua e dâ cultura siciliana si firmò, mentri lu tuscanu, grazi ô cuntributu di scrittura famusi, nun sulu tuscani ma di tutta l'Italia, s'arricchiu e si nubbilizzò, addivintannu la lingua di tutti. Poi cci detti puru na bona spinta lu cuvernu borbonicu ca nta lu 1797 misi la liggi di scriviri tutti i ducumenti ufficiali n lingua taliana. Cu vulia l'indipinnenza dâ lingua, rialmenti, era sulu l'aristocrazia. Ma chisti nun vulianu un sicilianu rozzu, menzu di cumunicazioni cû populu bassu, ma un sicilianu littirariu, un sicilianu accademicu, studiatu e struitu. Mentri nto restu di l'Europa si traducevanu nta lingua "vulgari" li libbra cchiù famusi, cuminciannu dâ Bibbia (Lutero), n Sicilia, l'accademia naziunali siciliana (chidda di Vitali e Meli) nun sulu nun vulia parrari di pulitica n sicilianu ma si rifiutavanu puru di trascriviri n sicilianu "vulgari", chiddu caputu di tutti, puru li calindari e li catachisimi. Lu populu nta stu casu era alluntanatu sempri di cchiù dâ lingua siciliana. Pi sti mutivi tutti i ducumenti cchiù mpurtanti, a cuminciari dâ custituzioni du 1812, foru scritti nna linga taliana senza putirili tradurri n sicilianu pi falli canusciri ô populu. Nuddu chiaramenti si dava lu chiffari di parrari e cumunicari cu la massa. Nè chiddi chi scrivevanu n sicilianu struitu nè chiddi chi scrivevanu in italianu. Secunnu lu principi di Castelnuovo e secunnu Paulu Balsamu, lu patri dû custituzinialisimu sicilianu "…li massi nun eranu adatti a participari a la vita pubblica e era megghiu tinilli luntanu dâ politica…" A custituzioni du 1812 fu fatta canusciri ô populu pi mennzu du cleru ca la spiava nta crersia quannu facianu li predichi".

   Lu piriculu di sta suburdinazioni ô cleru nun fu mancu caputa di lu stissu De Cosmi c'avia cuminciatu, ê tempi lluminati di Caracciolo, la riforma sculastica e la stituzioni di scoli nurmali cu lu fini di struiri li massi pupulari. La lingua basi di putiri utilizzari era l'italianu, no lu sicilianu, pinzannu ca sta scelta avissi duvutu struiri li massi di populu dannucci la pussibilità di cumunicari. La burghisia però nun accittò e nun aiutò cu stu pruggettu di struzioni, c'avissi fattu nasciri du lingui anchi tra lu populu. Li scoli nurmali dati all'amministazioni lucali o nun vinniru fatti o pi mancanza di sordi foru abbannunati senza nuddu aiutu finanziariu (Ulloa).Puru lu re si ci misi e nqualità di legatu apostolicu doppu l'insurgenzi du 1820, detti lu ncarricu dâ struzioni primaria â cresia. L'amministrazioni cumunali, ddi picca ca avianu rinisciutu a cuminciari na scola, eranu suggetti â vuluntà du cleru pi appruvari li programmi e puru l'inzignanti. Li spisi dû fallimentu di stu tentativu di struzioni elementari di parti di li democratici e di li prugressisti lu pagò lu populu quannu cu la riforma custituziunali di lu 1830 fu fatta la liggi ca sulu cu sapia leggiri e scriviri putia vutari! Ma è puru giustu diri ca nudda liggi pruibbia ê cumuni di grapiri scoli, la virità è ca nun c'era la vuluntà di fallu. Si pinzava ca era nutili e anchi piriculusu struiri lu populu. Perciò li scoli chi funziunavanu, sparti a essiri affucati cu li reguli dû cleru, eranu picca, troppu picca pi putiri dari na struzioni anchi minima.

   Basta sulu pinzari ca Mpalermu, na cità di 200 mila abbitanti, ntô 1852 c'eranu sulu setti scoli cumunali pi un tutali di 1200 sculari. Nta tutta la pruvincia di Catania, cunzidirata na pruvincia avanzata, ntô 1840 c'eranu 115 scoli pi un tutali di quattrumila sculari. Troppu picca eranu chiddi cumunali, c'asistianu ntâ carta ma n rialità nun funziunavanu. Lu populu era anaffabbeta e gnuranti e a so' lingua avia statu cunnannata a ghiri nnarreri cchiù c'avanti.. Chiddu ca ntiressa nun è la lingua ca unu s'inzigna â scola ma la pussibilità di usalla e si chistu è mpidutu nun si pò svluppari un linguaggiu riccu e struttivu. Fallu artificiusamenti, comu tintaru Meli, Tempiu e avutri, senza lu supportu di la prupagazioni pupulari è na strata ca nun spunta. Chistu chi dicemu pi lu sicilianu si pò appricari a qualunqui linguaggiu riggiunali. Nun sunnu li puisi o l'addimini o li pruverbi, comu dissimu, chi custruiscinu na lingua ma li scoli e lu studiu, e la nostra lingua fu custruiuta cû talianu ca nun e` "tuscanu" ma l'evuluzioni di un "vulgari", grazi a lu cuntributu di pirsuni comu Aligheri, Boccaccio, Macchiavelli, Guicciardini, Petrarca, Tasso, ecc. N cunclusioni, la mancanza di scoli pi curpa dî cumuni o di la genti ca nun cci mannava li figghi, a la fini vinni pagata dâ pupulazioni siciliana, chi quannu cci fu lu primu cinzimentu, doppu l'unificazioni di l'Italia, la Sicilia risurtò a prima nta l'anaffabbitismu.