Trisceli
Expand Window  |   Homepage

   Lu nomu di stu simbulu è Trisceli, e significa n oggettu a tri gammi. Nui videmu li primi signali di stu simbulu nta l’età priistorica, quannu nta certi scavi ca si ficiru nta l’Asia fu truvatu un vasu di lu XII seculu a.C., unni si putevanu chiaramenti vidiri pitturati dui guirreri di li quali unu avia lu simbulu di lu Trisceli scurpitu nta lu scudu. Pi diri la virità nuddu avi ancora scuprutu d’unni vinni stu simbulu e picchì. Verso lu VII seculu a.C. n'avutru vasu truvatu nta certi scavi n Sicilia, mustra a Minerva chi cummatti contru lu giganti Enciladu ca nta lu scudu havi dipintu lu trisceli. A lu tempu di Diunisiu I, li surdati di Siracusa si vosiru mettiri lu trisceli nta lu scutu pi farisi canusciri comu Siciliani.

   Stu simbulu, a comu si viri, havi assai c'accumpariu e vinni truvatu a tanti posti antichi nni lu bacinu di lu Mediterraneu, nn'asisti puru unu nta l'isula di Man, na isula tra l'Inghilterra e l'Irlanda ca havi un simbulu a tri gammi comu lu trisceli, sulu ca sti gammi sunnu curazzati. Li greci avianu visitatu la Sicilia cchiù di na vota, quannu si capacitaru di la firtilità di la terra e di tanti autri risorsi, e la pussibbilità di farinni na patria nova, vinniru ‘n massa di tanti stati, la chiamaru Trinacria, ca veni a diri "triangulu" appuntu picchi havi tri punti. Sti tri punti ora sapemu ca sunnu Capu Pachinu a sud, Capu Peloru a est e Capu Lilibbeu a ovest. Fu cchiù appressu ca lu Trisceli simbuliggiò la Sicilia e oggi lu Trisceli lu canuscemu cu lu nomu di Trinacria, ma veramenti sunnu dui cosi diffirenti: Trinacria e` lu nomu di un triangulu mentri Trisceli e` lu nomu di st'uggettu a tri gammi. Cchiu` tardu a lu Trisceli ci fu iunciuta La testa di la Midusa, la soru cchiu` tirribili di li Gorgoni, c'avia serpi pi capiddi e cu la taliava arristava di petra.

   Quannu li Rumani accuparu l'Isula e nni ficiru na pruvincia rumana, la chiamaru Triquetra, ma lu nomu di Sicilia, ca veni di lu populu priistoricu di li Siculi, fu chiddu ca appi lu supravventu contru li greci, li cartaginisi, li rumani e lu passari diliteriu di lu tempu, comu s’avissi statu scrittu a littri d’oru e timpiratu di lu focu. La virsioni d'oggi di la testa di la Trinacria è di na fimmina, forsi na dea, certi voti cu l'ali pi significari lu curriri eternu di lu tempu, serpi pi significari saggizza. Li serpi poi foru canciati e sostituiti cu spichi di furmentu, pi significari la firtilità di la terra di l'Isula. Lu Trisceli, poi, fu adottatu da li greci comu simbulu di la Trinacria, chi cchiù appressu arristò comu sinonimu pi Sicilia. Lu Trisceli (o Trinacria) fu poi aduttatu da lu Parlamentu Sicilianu comu parti intigrali di la Bannera Siciliana, e fu misu nta lu mezzu, tra lu russu e l'oru di la Bannera.