Archimedi
Expand Window  |   Homepage

287 - 21 B.C.

 

   Archimedi nasciu a Siracusa, n Sicilia, nna lu 287 a.C. Fu lu figghiu di l'astronomu Phidia. Archimedi studiò ad Alessandria, Egittu, chi a li tempi era lu centru struttivu cchiù mpurtanti. Umili di natura, iddu nun vuleva la gloria di chiddu chi faceva, e p'assicurarisi ca fussi propriu accussì, nun lassò noti di tutti li spirimenti e tiurii matimatichi chi fici. Nui, pi furtuna, nni avemu un pocu di sti noti, pi mmenzu di li quali lu travagghiu futuro di li fisici e di li matematici fu fattu cchiù facili. Archimedi nvintò la leva, e fu nta st'occasioni chi dissi: "Datimi un puntu d'appoggiu e vi movu la terra." Fu amicu strittu di Hieron, re di Siracusa e di so' figghiu Giloni. Fu pi stu re chi Archimedi nvintò assai machini di guerra, duranti l'assediu di Siracusa da parti di li Rumani. Cu posizionari specchi supra costruzioni iavuti, abbruciò assai navi di la flotta Rumana, quannu li navi si truvavanu vicini a li mura di la cità.

   Na vota lu re Hieron ci dissi di virificari si la curuna reali fussi tutta d'oru a lu 100%. Archimedi, ncignusu, pinsò chi mettennu un oggettu nta un liquidu, l'oggettu duvissi spiazzari tantu liquidu, uguali di pisu a lu pisu di l'oggettu. E accussì fici: pigghiò un pezzu d'oru di pisu uguali a lu pisu di la curuna e lu misi nta l'acqua e piso` lu liquidu spiazzatu. Poi pigghiò la curuna e la misi nta lu stissu ammuntari di liquidu, e lu pisu di lu liquidu spiazzatu fu uguali a lu pisu di la curuna, ma fu menu di lu pisu di lu pezzu di oru chi avia pruvatu prima: la curuna nun era tutta d'oru, ma na mistura di oru e argentu. 

(Archimedi mentri chi punta lu so' famusu specchiu a la flotta Rumana)

   Di sta scuperta vinni la famusa "Liggi di Archimedi": Un corpu mmersu nta un liquidu o gas spiazza tantu liquidu o gas iguali a lu volumi di lu corpu mmersu. Da la stissa esperienza vinni "Lu principiu di galleggiamentu di Archimedi: -La forza chi spinci un corpu a galliggiari nton liquidu o gas, è equivalenti in grannizza a lu pisu di lu corpu galleggianti ma oppostu in dirizioni-. Na scuperta mpurtantissima di Archimedi ni la giometria fu la misurazioni di lu "circulu" scuprennu finu a cchiù vicinu di un millesimu lu valuri di la "p" greca. A stu puntu Archimedi nisciu currennu di la casa mmenzu la strata gridannu: "Eureka, Eureka!" chi veni a diri: "La truvai, la truvai!" cioè la risposta, e senza addunarisi ca era nudu.

   Nautra nvinzioni di Archimedi è la "Viti d'acqua",chi ancora oggi è usata in Egittu comu menzu d'irrigazioni. La -Viti d'acqua-, è un tubo fattu a cura di porcu cu nu stuppagghiu nternu a prova d'acqua. Lu tubu si metti nta l'acqua e firriannu lu manicu di lu tubu cu lu stuppagghiu, l'acqua nesci di l'autru latu. 

 

    Archimedi muriu duranti chi li Rumani catturaru Siracusa nta lu 212 a.C. Marcellu, lu ginirali rumanu, avia datu ordini di nun ammazzari Archimedi. Un surdatu, chi nun sapia cu era Archimedi, lu trapassò cu la so' spata mentri iddu travagghiava di giumitria nni la so' stanza. Marcellu la chianciu la morti di lu grandi nvinturi, e ci detti funirali spiciali militari, mittennu supra lu tumulu na sfera nfilata nto n cilindru, comu Archimedi avia lassatu dittu.

 

U problema dî voi di Archimedi

Si tu si ntilligenti e saggiu, o straneru, carcula lu numaru dî voi dû Suli chi
na vota pasculavanu nte campi di Trinacria, divisi nta quattru mannari di
culuri diffirenti, una bianca comu u latti, n’avutra d’un nivuru lucenti, a terza
gialla e l’urtima stampiata. Nna ogni mannara c’eranu viteddi, d'un gran
numaru, secunnu sti pruporzioni: tu ài a capiri, o straneru, ca u numaru dî
viteddi bianchi era uguali a la mità e un terzu di chiddi nivuri, nzemmula
cu tutti chiddi gialli, mentri u numaru dî viteddi nivuri era uguali a la quarta
parti di chiddi stampiati e un quintu, nsemmula, arreri, cu tutti chiddi gialli.
Sparti ài a teniri cuntu ca u numaru dâ rimanenza dî li viteddi, chiddi stampiati,
era uguali a la sesta parti di li bianchi e un settimu di tutti chiddi gialli. 
Chisti eranu i proporzioni dî li vacchi: lu numaru di chiddi bianchi era
precisamenti uguali a la terza parti e un quartu di tutta la mannara di chiddi
nivuri; mentri lu numaru di chiddi nivuri era uguali a la quarta parti di tutta
la mannara di chiddi stampiati e cu iddi a quinta parti, quannu tutti,
inclusi li viteddi, iavanu a pasculari nzemmula. Ora li stampiati n quattru
parti eranu uguali in numaru a un quintu e un sestu di l’intera mannara
gialla. Nfini u numaru di chiddi gialli era uguali a un sestu e un settimu di
la mannara bianca. Si tu, o straneru, nu poi diri accuratamenti, lu numaru dî li
voi dû suli, dannu a sulu lu numaru di sti viteddi ben nutricati e lu numaru
di li vacchi secunnu lu so culuri, tu nun sarrai chiamatu gnuranti di numari,
ma mancu poi essiri cuntatu tra li pirsuni struiti.

Ma ài capiri puru st’avutri cundizioni pi li voi dû suli. Qaunnu li viteddi bianchi si mmiscavanu cu li nivuri, li linii chi furmavanu d'un latu e di l'avutru eranu uguali in lunghizza e larghizza, e li vallati di Trinacria, di tutti li lati, eranu chini di ddu gran numaru, E puru, quannu chiddi gialli e chiddi stampiati eranu arricugghiuti nta na sula mannara eranu n tali manera ca lu so numaru, cuminciannu di unu, cricseva lentamenti di cchiù, finu ca cumplitava na fiura triangulari, senza ca c’eranu viteddi di avutri culura nto menzu d’iddi nè ci nni mancava unu dî soi. Si tu si abili, o straneru, a risorviri tutti sti cosi e mitttiritilli nzemmula a menti, dannu tutti li rilazioni, tu ti nni vai ncurunatu di gloria sapennu ca tu fusti giudicatu perfettu nni la casa dâ saggizza.