Apostolica Legazia
Expand Window  |   Homepage

    L'urtimu muvimentu espansionisticu ca ditirminò lu futuru assistamentu di l'Europa fu chiddu di li Nurviggisi ca fôru chiamati Norsmen, e poi n secutu, Nurmanni. Finu a versu lu 1000 l'Europa era duminata di tri putenzi: la Bizantina, n'estezioni di l'Imperu Rumanu, l'Islamica ca si dividia fra dui Califfati: lu Fatemita, chi di l'Egittu arrivava finu a la Sicilia e la Mauritania e lu Spagnolu chi cuntrullava assai parti di la Spagna e di l'Africa sittintriunali.

 

    Ancora prima di lu 1000 li Vichinghi, chi finu a stu puntu s'avianu cuntinutu a fari ncursioni nta li terri di lu nord, nclusa l'Inghilterra, avianu cuminciatu a fari ncursioni nni la parti sud-occidintali di l'Europa, arrivannu finu a Parigi, sacchiggiannu, arrubbannu, bruciannu e distruggennu tuttu chiddu ca ncutravanu. Eranu populi ca campavanu di brigantaggiu. Fu nta lu 911 ca lu re di Francia Carlu lu Semplici, pi firmarli, ci detti un granni tirritoriu, chiddu ca poi fu chiamatu Nurmandia, a Rolloni, unu di li capi cchiù forti c'avianu li Vichinghi. Stu tirritoriu ci fu datu cu lu pattu però ca avianu a essiri suggetti a la curuna e puru farisi cristiani. 

 

    Fu di certi famigghi di sta genti ca certuni, pi mancanza di travagghiu e scopu di vita, si ficiru surdati di furtuna, mircinari. Li mircinari di cui vulemu parrari cca, sunnu li Nurmanni dâ cuntia d’Altavilla: Guglielmu Brazzu di Ferru, Robertu lu Guiscardu e li sô frati, tra cui puru Ruggeru, ca vinniru e si stabbileru nta l’Italia miridiunali, cummattennu pi cui li pagava megghiu.

    Nun passò assai, quannu cummattennu pî Longubardi, a causa di la mpruvvisa diserzioni di Argiru, ginirali di l’armata longubarda, versu li forzi bizantini, Guglielmu, pi mancanza di na guida di l’esercitu, fu numinatu conti e ginirali di ddu esercitu. Iddu scunfissi li bizantini e cunquistò tutta la Puglia e avutri terri vicini. A la sô morti, sô frati Robertu addivintò conti, e ntô 1058 iddu cu lu sô esercitu appiru na richiesta d’aiutu ntâ liti tra Binirittu X e Nicola II, tutti dui aspiranti papa. Li Nurmanni pigghiaru a Binirittu prigiuneru, dannu a cianza a Nicola di essiri iddu lu papa, e iddu pi ricumpenza detti statu ligali, ca cci mancava, a li Nurmanni e numinò Robertu duca di Puglia e Calabria, cuncidennucci di essiri patruni di tutti li tirritori c’accupavanu si iddi stavanu sutta l’atorità papali. Prima di chistu li Nurmanni avianu ricivutu na dumanna d’aiutu dî bizantini pi aiutari a Giorgiu Maniaci, ginirali bizantinu, chi circava di cunquistari la Sicilia ca era accupata di li musulmani. Li Nurmanni lassaru prestu la Sicilia a causa dî particularità chi dimustravanu li bizantini ntô spartiri lu buttinu di guerra, ma dda visita cci abbastò pi nutari quantu era fertili la terra e ricchi li cità. Chista fu na raggiuni pi cui Robertu e Ruggeru, ora conti di Calabria, dicideru ca un ghiornu avissiru accupatu a Sicilia.

    Doppu ca l’esercitu bizantinu si nni iiu, senza finiri la mprisa, la Sicilia addivintò un tiatru di lotti ntistini tra li vari kaids musulmani. L’emiru di Siracusa Ibn-ath-Thumma ammazzò l’emiru di Catania e accupò a cità. Sintennusi forti a stu puntu si misi ntesta d’accuppari tutta la Sicilia, ma sô cugnatu, Ibn-Hawwas patruni di Enna e di tutta la Sicilia cintrali, lu firmò e lu misi puru n piriculu. Ibn-ath-Thumma, scantannusi di so' cugnatu, chiamò li Nurmanni p’aiutallu. Chista era l’occasioni c’aspittavanu Ruggeru e Rubertu. Cu na manata di cavaleri e cchiù picca di milli fanti li du' frati traseru a Missina senza mancu cummattiri e prestu occuparu na bona parti di l’isula orientali, finu a Troina. A stu puntu Rubertu fu richiamatu nta l’italia miridiunali a causa di la lotta ca cci vulianu fari li baruna ca nun vulianu suttastari a iddu. Ruggeru arristò sulu a cummattiri li musulmani. Prestu a so' lotta addivintò na veru guerra accanita pi la cunquista dâ Sicilia e la cacciata dî musulmani. La lotta fu longa, firoci e certi voti puru crudeli di na parti e l’avutra, ma Ruggeru avanzava sempri e divintava cchiù forti. Iddu fici Troina a so' capitali e custruiu a prima cattidrali, pigghiannusi l’atorità c’appartineva â Chiesa, pi stabiliri diocisi unni e quantu nni vuleva. Nto 1071, cu l’aiutu di Rubertu lu Guiscardu, Palermu cadiu ntê manu dî Nurmanni. Ruggeru fici risturari lu Duomu, ca nn’avevanu fattu na muschea, e fici cilibrari la prima missa doppu 250 anni. Ntô 1083 Ruggeru numinò Mpalermu lu primu viscuvu latinu.

    Pi Ruggeru cci vosiru trent’anni pi cunquistari tutta la Sicilia. Lu gran rifurmaturi ecclesiasticu papa Gregoriu VII, ca luttò contru la simunia, vinni a cuntrastari l’intiressi di Enricu IV di Germania, ca vulia, senza ntirfirenza dâ chiesa, vinniri o dari tituli ecclesiatici a lu cleru. A causa di l’opposizioni di stu papa all’investitura di lu cleru di parti di genti siculari, stu cunflittu passò a la storia cû titulu di Cuntruversia di L’Invistituri, e nta lu 1084 Enricu vinni a Roma cun granni esercitu, accupò Roma e la misi a saccu. Papa Gregoriu scappò e Enricu fici papa l’antipapa Clementi III. I Nurmanni di parti sua, numinaru papa Vittoriu III, chi fu furzatu di Clementi III a passari quasi tuttu lu so' papatu a Munti Cassinu unni iddu avia statu abbati. A la so morti, nta lu 1088, li Nurmanni numinaru papa a Urbanu II, ma chistu nun potti pigghiari putiri subitu pi l’interfirenza di Enricu IV.

Urbanu II iiu n Sicilia, e fu ospiti di Ruggeru a Troina, pi dui raggiuni:
a) vosi vidiri di prima manu li progressi c’avia fattu Ruggeru contru li musulmani;
b) iddu avia bisognu d’aiutu pi libbirarisi di Enricu IV na vota pi sempri. Comu ricumpenza, Ruggeru dumannò a lu pontefici di fallu Legatu Apostolicu pi la Sicilia nta l’affari ecclesiastici, privileggiu ca iddu s’avia già pigghatu, pichi iddu vosi rimpiazzari cu genti chi cci putia aviri fiducia, comu francisi e ngrisi, li capi di la girarchia ecclisiastica bizantina comu avia fattu cu ;u so' cuvernu. Ora, cu l’occasioni, vuleva ca lu papa nni facissi na nomina ufficiali.

    Nta lu 1094 Rubertu lu Guiscardu, p’assicurari a sô frati e manteniri la prummisa fatta a Urbanu II, muviu cu l’esercitu contru Enricu IV e lu fici fuiri di Roma e puru di l'Italia. Ma Urbanu II nun vulia dari a Ruggeru tanta atorità supra la chiesa n Sicilia, e quannu Urbanu II numinò Munzignuri Robertu viscuvu di Missina e Troina, Ruggeru lu fici arristari mentri diceva la missa. Sta liti tra lu papa e Ruggeru durò ottu misi. Finalmenti pressatu dâ nicissità pi lu bisognu d’aiutu, Urbanu II accunzintiu a un privileggiu ca nuddu capu di nazioni cristiana eurupea avia, e cu la bolla Quia Propter Prudentiam Tuam (a causa di la tô prudenza) detti a Ruggeru l’Apostolica Legatia, cu lu dirittu di essiri eriditatu di l’eredi “...quod omni vitae tuae tempori, vel filii tui Simonis, aut alterius, qui legitimus tui haeres... legatum Romanae Ecclesiae statumus...” (...ca pi lu tempu di la to vita , comu puru di chidda di to figghiu Simuni, o avutri, chi sunnu eredi legittimi toi... ti facemu legatu di la Chiesa Romana...) ricanuscennu a Ruggeru la sula e suprema atorità n Sicilia supra l’affari timpurali e sprituali ecclesiastichi, abbasta ca nun appurtassi dannu all’anima e a li dogma di la chiesa. Cu stu mannatu Ruggeru putia stabiliri ufficialmenti diocisi, numinari viscuvi ecc.

    A stu fini iddu furmò lu Tribunali di la monarchia ca s’intirissava di giudicari problemi religgiusi e contru la riliggioni, comu contruversi, riclami, crimini ecc. chi rigurdavanu laici e cleru, senza la ntrumissioni di lu papa. Cchiù appressu a bolla papali di Urbanu II di l’Apostolica Legatia fu accittata legalmenti dû papa Adrianu IV, chi, cu lu cuncurdatu di lu 1156 cu Guglielmu lu Malu recanusciu lu dirittu di li Siciliani di rivolgesi a lu re nta l’affari ecclesiastici e no a lu papa. Ma sta bolla nun appi sempri mari carmu, ô cuntrariu, attraversu li seculi a Curia Romana pruvò cchiù di na vota di abbuliri chidda chi iddi pinzavanu di essiri na ndignità pi la chiesa. Cchiù d’un papa pruvò a fari la Sicilia suggetta a lu Vaticanu, cu lu papa comu atorità suprema, ma li tentativi falleru sempri. Sta lotta certi voti fu firoci tra Roma e Federicu II, ma cu cchiù di na scumunica contru Federicu II lu papatu nun arrivò mai a nenti.

    Cu la morti di Federicu II, lu papatu vitti la Sicilia comu na mèta facili e uffriu la curuna di Sicilia a Carlu d’Angiò, ca trattò li Siciliani accussì malamenti a lu puntu di fari scuppiari la rivuluzioni, ca va sutta lu nomu di Vespri Siciliani, cu la quali li Siciliani ittaru fora li francisi. Lu populu sicilianu si organizzò a cità-statu e dumannò a papa Martinu IV di mettilli sutta la so' prutizioni. Lu papa nveci lu 7 di maggiu 1282, iornu di l’Ascenzioni, scumunicò tutta l’isula. A stu puntu, a causa di li minacci chi vinevanu di Carlu d’Angiò e di lu papa, lu Parlamentu sicilianu uffriu la curuna di re a Petru III d’Aragona, e quannu iddu accittò, lu papa scumunicò puru a iddu e lu dichiarò dicadutu comu re d’Aragona e di Valenza, uffrennu la curuna di ddu regnu a Carlu di Valois figghiu di Fulippu III re di Francia. Nta lu 1285 tutti l’espunenti maggiuri di sta lotta mureru. Carlu d’Angiò muriu nta gennaiu, papa Martinu muriu nta marzu e Petru III muriu nta novemmiru. Ma chidda chi poi fu la guerra di novant’anni nun si firmò pi chissu, picchi li siciliani rifiutaru la proposta di lu novu papa Onoriu IV, cioè di la Sicilia essiri sutta l'atorità di Roma e lu papa urdinò la cuntinuazioni di l’ostilità.

    A la morti di Onoriu, fu elettu papa Nicola IV, ca rumpiu lu trattatu c’avia fattu fari Eduardu d’inghilterra, pi na paci di durata ntâ Sicilia. Petru III, prima di moriri, avia lassatu comu re di Sicilia a so' figghiu Federicu III, ma lu frati cchiù granni Giacomu, c’addivintò re d’Aragona, si pigghiò puru la curuna di Sicilia, pi usalla comu un menzu di trattativa, uffrennula a Carlu lu zoppu d’Angiò e accussì aviri la binidizioni di lu papa pi essiri re d’Aragona. Li siciliani nun vosiru sentiri ragiuni e mancu so' frati Federicu III. Mortu papa Nicola IV e ntô stissu annu avennu rinunziatu a lu papatu Celestinu V, fu elettu papa Bonifaziu V, chi senza dumannari a li siciliani, lu 12 giugnu, 1295, fici lu trattatu di Aragni, stabbilennu ca Giacomu d’Aragona ci dava la Sicilia a lu papa, lu principi Federicu si maritava cu Catarina, figghia di Biatrici d’Angiò, facennulu re di Gerusalemmi. Arreri li siciliani dissiru di no, e lu Parlamentu fici Federicu re di Sicilia. La guerra allura cuntinuava, sta vota nun sulu contru li d’Angiò e lu papa, ma puru contru Giacomu d’Aragona, a lu quali nun piaciu chiddu chi fici sô frati Federicu.

    Li forzi contru la Sicilia eranu pripundiranti, e anchi si Federicu cu la so' armata di siciliani e mircinari appi quarchi successu nta la guerra, la Sicilia cuminciò a cadiri nta li manu di li francisi, chi occuparu Catania nta lu 1301 e ficiru n’armistiziu timpuraniu cu Federicu. A la fini di la tregua, lu novu papa Bonifaziu VIII, nta lu 1302, rinnuvò l’interdizioni, contru la Sicilia, di Martinu IV, cu la bolla Unam Sactam, chi dicia “...omnen humanorum creaturam subesse romano Pontefici...” (...ogni criatura umana s’avi a suttamettiri a lu pontefici rumanu...). Stu cuncettu fu poi allargatu di la curia teologica dicennu ca lu papa “...Dei locum tenet in terris...” (...teni lu postu di Diu nterra...), perciò “...Summus Pontifex in toto orbe terram in temporalibus jurisditionem habet et plenitudinem potestatis...” (...lu sommu Pontefici avi giurisdizioni e cumplita putistà nta li cosi timpurali di tuttu lu munnu...), picchì “...solus a Deo assuntus in plenitude potestatis...” (...iddu è l’unicu pigghiatu di Diu chi avi  putistà cumpleta...). Dopu di chi, misi a Carlu di Valois a la testa di li truppi di d’Angiò ca nta lu 1302 sbarcaru a Termini Imeresi, occuparu dda cità e doppu eru a assidiari la cità di Sciacca, la quali si difinniu cu curaggiu e valuri, facennu mpussibili a Carlu di pigghialla. Ora siccomu puru la pistilenza si misi a circulari nta l’esercitu di Carlu, chistu appi a veniri a na cunclusioni e accussì fici lu trattatu di Caltabellotta, sempri nta lu 1302.

    Cu stu trattatu la Sicilia vinia di novu ricanusciuta statu ndipindenti, Federicu pigghiava lu titulu di re di Trinacria, chi a la so' morti si vineva a perdiri e la Sicilia turnava a li d’Angiò. Federicu nun si cunzidirò mai re di Trinacria, ma re di Sicilia, e comu tali accuminciò na pulitica di espanzioni agghiuncennu Ateni e avutri terri a lu so regnu. Nun ci fu mai lu disideriu di rispittari lu trattatu di Caltabellotta nè da parti di li Siciliani nè da parti di Federicu, e quannu Federicu muriu ci succesi so figghiu Petru IV. Chista fu la ruttura di lu trattatu e la guerra fu ripigghiata di li d’Angiò e di lu papatu cu lu tentativu nutili di purtari la Sicilia sutta l’atorità di la curia rumana. N’occasioni simili vinni versu la fini di la guerra di novant’anni. Papa Urbanu V accuminciò li niuziati pi finiri la guerra di novan’anni e sti niuziati foru conclusi di lu papa Grigoriu XI, nta lu 12 di austu, 1372, cu lu trattatu di Avignon. Chistu era un trattatu assai umilianti pi la Sicilia, dovutu a la inettitudini di lu re Federicu IV e a li lotti nterni fiudali ca asistevanu n Sicilia tra li baruna. Cu stu trattatu Federicu IV addivintava vassallu di lu papa e di Giuvanna I d’Angiò di Napuli, accittava lu titulu di re di Trinacria, titulu ca si pirdeva si iddu muria senza figghi, s’impignava a nun fari allianzi senza lu cunzenzu di la Santa Sedi, avia a dari a la chiesa tutti li beni chi cci avianu cunfiscatu, fari esenti di tassi tutti l’entità riliggiusi; la riggina di Napuli, Giuvanna d’Angiò, era la riggina puru di la Sicilia e lu papa era l’atorità suprema supra la Sicilia e l’Italia miridiunali.

    Finalmenti nta lu 1374, doppu 92 anni lu papa levava a la Sicilia l’interdizioni fatta di Martinu IV, e pi tantu tempu nuddu parrò cchiù di l’Apostolica Legatia, tutti forsi vulennu evitari st'argumentu difficili. È stranu però comu lu papa Gregoriu XI nta l’euforia di la vittoria pulitica contru la Sicilia, nun pinzò di abbuliri la bolla di Urbanu II di lu 1097, cioè l’Apostolica Legatia. Nta lu 1607, lu cardinali Cesare Baronio scrivennu un trattatu supra la Monarchia, svampò la vecchia quistioni di l’Apostolica Legatia, facennu nasciri forti e amari polemichi, ma tramiti l’interventu di Fulippu re di Spagna, la situazioni tra Statu e chiesa n Sicilia arristò a lu status quo, e lu cardinali Baronio pirdiu lu papatu pi lu vetu di Fulippu di Spagna. Ma la Curia Romana stava sempri a circari di truvari n’occasioni pi abbuliri stu privilegiu sicilianu, picchì mai si rassignò a dd’umiliazioni chi cci dava la Sicilia. St’occasioni finalmenti vinni, nta na manera banali, lu 27 di Innaru, 1711. Lu viscuvu di l’isula di Lipari mannò a vinniri a lu mercatu na partita di ciciri, fruttu d’elimosina. I guardi di l’annona, sempri prisenti, vosiru pagatu lu daziu di la vinnita di li ciciri. Lu viscuvu di Lipari, monsignuri Tedeschi, si lamintò, dicennu ca i ciciri eranu In Coena Domini, vol diri limosina e perciò pruprità di la chiesa e pi chistu esenti di tassa (la diocesi di Lipari avia statu criata versu lu 1300, e pi chissu nun era sutta lu Tribunali di la monarchia, ma sutta lu putiri di lu Vaticanu).

    L’atorità siciliana subitu ricanusciu lu sbagghiu fattu di li guardi e rimbursò lu viscuvu pi l’ammuntari, ca era quantu un rotulu di ciciri (comu 800 grammi). Lu viscuvu nun fu sudisfattu e dumannò na scusa pubblica di la casa riali. Lu vicirè rifiutò senza pinzaricci supra e lu viscuvu comu risposta, arrabbiatu, scumunicò li du' guardi, li quali scantati pi la salvizza di l’arma, curreru nni lu vicirè e chistu li fici assolviri di lu Tribunali di la monarchia, secunnu li reguli di l’Apostolica Legatia. Lu viscuvu allura si rivulgiu a lu papa, lu quali mannò na littra a tutti li viscuvi e li chiesi di la Sicilia cunfirmannu la scomunica di li du' guardi e urdinannu di appizzari na copia di la littra nta tutti li chiesi. Stu ordini nun puteva aviri effettu n Sicilia senza l’autorizzazzioni di lu re ca era ancora l’Apostolicu Legatu n Sicilia, perciò lu re riaggiu cu l’ordini di arrestu e/o esiliu di tutti li viscuvi e prilati chi eranu leali a lu papa e cunfiscannucci puru la pruprità. Cû tempu la liti addivintò accussì forti ca nta lu 1715 Clementi XI scumunicò tutta la Sicilia. Sta liti passò a la storia cu lu nomu di Cuntruversia Liparitana, e lu pueta populari cantò a propositu.

 

Lu santu Patri nni livau la missa,
Lu re conza la furca a li parrini,
Scurrunu li funtani a stizza a stizza,
Li terri mancu spicanu luppini!
Domini Diu li casi nni subbissa,
Li iurati nni sucanu li vini,
Sicilia è carni di sasizza,
Cca c’è la liggi di li saracini!

 

    Nta lu 1728, papa Binirittu XIII, anchi si nton modu liggeru, cunfirmò lu dirittu di lu Tribunali di la monarchia e livò la scumunica a la Sicilia. Doppu 17 anni li chiesi n Sicilia foru aperti, li campani si rimisiru a sunari e la genti puteva arreri riciviri li Saramenti senza scantu di na parti o di l’avutra. Nta lu 1871, lu cuvernu talianu, anchi cu l’opposizioni di certi canusciuti omini di cuvernu, abbuliu l’Apostolica Legatia, mittennu fini a na quistioni c’avia duratu pi quasi ottu seculi.