Introduzioni Sicilianu
Expand Window  |   Homepage  |

    Ciao. Iu sugnu Ninu Russu, e sugnu un Sicilianu-Americanu, però, comu dici la canzuna, sugnu un Sicilianu veru. Avi assai chi sugnu nta Merica, e oramai sugnu attaccatu a sta terra, pi tuttu chiddu chi m'à datu, e pi comu m'à trattatu e, pensu, ca n'avutra terra a stissa comu chista, nun c'è. Li mê figghi nasceru ccà, e i figghi d'iddi puru, infatti ora sugnu lu nonnu orgugliusu di novi niputeddi, ca pi mia sunnu i cchiù beddi dû munnu.

 

71  43  26  43  34  34  33  42  6  7  9  6

 

    L'America è biniditta di Diu, no cu la solita binidizioni, ma cu na binidizioni spiciali, na binidizioni particulari, unica, diffirenti. Pari comu si Diu l'avissi fattu l'urtima di tutti l'autri terri e ci avissi misu tutta l'esperienza chi aveva acquistatu doppu aviri fattu tutti l'autri terri, anzi, n particulari, tutti l'autri nazioni. Chistu è un misteru, e nun mi lu vogghiu spiari: "A cavaddu datu nun ci taliari mmucca".

    Nuatri tutti vinemu di qualchi parti di lu munnu. Lu numaru cchiù granni di genti vinniru tantu tempu fa, avutri qualchi tempu fa, e ancora avutri pocu tempu fa. Comu videmu, la nazioni nun si ferma, ed è sempri n muvimentu, comu di restu à statu sempri. Continuamenti sangu friscu e novu si agghiunci a chiddu vecchiu, la maggiuri parti di ccà, un pocu ancora di avutri parti di lu munnu. Ora, comu tutti nuatri vinemu di posti diffirenti, accussì ognunu di nuatri avemu ligami cu la nostra cultura, cu la terra chi detti a mia e a tutti l'avutri la ragiuni di lassari ddà terra, na ragiuni cuncrita, nta la maggiuranza di li casi, e no un capricciu.

    Ognunu voli beni a la matri, e la disia quannu è luntana, e assai pirsuni nun sannu cû è la matri o d'unni idda è. E puru, si nni putissimu pigghiari u DNA di li nostri animi, e ni putissiru diri a ognunu di nuatri d'unni vinemu, allura, sugnu sicuru, pi tutti fussi facili truvari la strata di la discinnenza, e chistu ni putissi fari cchiù umili versu li nostri simili, e lu munnu putissi essiri un postu cchiù megghiu e la vita fussi cchiù facili pi tutti. L'anima nostra brama pi sapiri cu semu, chista è la forza chi spinci l'omu a usari e sviluppari la sô menti, di novu e di novu, finu a lu puntu di perdiri lu senziu. Chista è la raggiuni pi cui di qualchi tempu sugnu ossessiunatu a cercari l'origini di li me antinati,e nun parru di li me nanni e nanni avi, picchì chiddi sû l'origini mei.

 

Interactive map of Sicilia. Click to view.

 

    Iu vegnu di la Sicilia, e vinni nta lu menzu di la me vita; già avia un bon numaru di anni quannu vinni ccà. Iu criscivi a lu me paisi, ivi ddà a scola, iucai e studiai ddà e mi divirtivi e suffrivi ddà, ridivi e chiancivi ddà, e aiu assai ricordi, la maggiuranza beddi ricordi di la me matri terra. Ora chi sugnu luntanu, e chista è la cosa cchiù ironica, staiu cunuscennu li cosi cchiù beddi di la me Sicilia: di la sô storia, di la sô littiratura, di li sô glori e di li sô suffirenzi.... Tramiti chistu iu vinni a capiri megghiu, e n certi casi, pi la prima vota, li tradizioni, li custumi, l'aspettu psicologicu di lu me populu fattu di travagghiatura duri, sinceri, fideli, ginirusi.

    A li me tempi, quannu comu picciriddu e poi comu picciutteddu e nfini comu giuvinottu ivi a la scola, nun ntisi mai minziunari la Sicilia, nè pi beni, nè pi mali. A scola studiamu la lingua taliana, la storia taliana, la litteratura taliana, ma nun si parrò mai di la Sicilia, e nuddu si lamintava, nuddu diceva nenti. Era comu si avissimu avutu fattu lu lavaggiu di ciriveddu: la Sicilia era la terra unni nuatri eramu, ci abbasta chissu, cioè, ca ci stamu, no? Chi avutru vulissi la Sicilia di nuatri? Chi nni dava la Sicilia? Nuatri avevamu avutri cosi pi la testa.

    Sti omissioni di lu sistema scolasticu talianu ficiru corpu cu nuatri animi giuvini, pi cui nuatri, inclusu lu suttascrittu, fallemu a scupriri li giuielli di la Sicilia, sia chi fussiru naturali, littirari, filosofici o storici. Ora, pi putiri capiri chistu modu di agiri, sta ndiffirenza versu la Sicilia, bisogna studiari assai la storia di la Sicilia, lu sô postu nta la storia, e li forzi esterni e interni chi l'ànnu dilaniatu pi cintinara... No, pi migghiara d'anni, in cui la lotta cchiù granni e continua era chidda di putiri suppurtari e stari vivu.

    Iu nun aiu la conuscenza di spiari a l'autri chiddu chi pi la prima vota cuminciai a ntravidiri ora iu stissu. Però putemu fari chistu nsemmula, a picca a picca, iu e vuiatri. Iu fazzu di tuttu pi purtarivi tanti nutizi, e li cchiù beddi. Puru mi mpignu a fari di tuttu pi nun essiri monotunu, e cercu puru di renniri piacevuli la littura, ma stati sempri attenti a chiddu chi c'è dintra. Cu l'avventu di Mussulini o putiri, cchiù mpurtanza di prima fu data a la lingua taliana, di restu la ligua Siciliana nun era na lingua, era un dialettu, e un dialettu rozzu. Nuddu sappi mai a li mê tempi chi si Federicu II Re di Sicilia campava ancora vint'anni (iddu muriu a 56 anni) la lingua nazionali taliana di oggi, fussi la lingua Siciliana.

    Versu la fini di la Secunna Guerra Mundiali, si puteva vidiri chi avia già accuminciatu na forti e quasi vuluntaria sustituzioni di la lingua Siciliana cu la lingua Italiana. Dicu quasi vuluntaria picchì mentri li novi ginirazioni pigghiavamu a priu la lingua Italiana, li maistri e l'atorità sculastichi nun muveru mai un ditu pi bluccari stu ginocidiu di lingua, stu processu virgugnusu, anzi nni spincevanu a nun parrari lu Sicilianu. Sta cunversioni di lingua è ancora n prugressu oggi, e nun si tratta di l'evoluzioni naturali di la lingua. Oggi, n Sicilia, li programmi scolastichi fannu qualchi sforzu versu lu patrimoniu Sicilianu, ma è troppu picca, troppu tardu.

    Mi capitò di veniri a cuntattu di un pocu di litteratura Siciliana prima di aviri 18 anni: qualchi cosa di G. Meli (unu di li cchiù granni di la nostra littiratura), e precisamenti "L'Origini di lu munnu" un puema comicu in cui lu patri di li dei cria lu munnu, e "Sarudda", un ditirammu, unni si vantanu i vini di la Sicilia e li vippiti di un gruppu di amici chi campanu pi lu vinu. Però, chiddu chi mi attirò di cchiù la curiosità, fu un puimettu, di lu XVI seculu, chi parra di la morti mmatura di "La Barunssa Di Carini".

    Iu nun avia ancora quasi nuddu nteressi di canusciri la Sicilia, mai pigghiai a Sicilia seriamenti. Visitai na para di posti, ma senza nteressi, e nun vitti chiddu chi c'era chiaramenti scrittu nta ddi ruini antichi. Nta lu 1986 mi fici n'operazioni a la carina. Custrittu a fari nenti pi dù anni nun è na cosa bona, ma quasi fu na binidizioni pi mia. Nun putennu fari nenti completamenti di pisanti, mi dedicai a la littura. Fu nta st'occasioni, circannu tra li me libbra, chi scuntrai arreri lu libru di La Barunissa di Carini, nun sulu, ma va trovai puru n'avutri tri copi diffirenti chi iu avia accattatu n Sicilia e mi l'avia scurdatu.

    Mi misi a liggilli e a fari lu parauni di l'unu cu l'autru. Prestu mi accurgivi chi c'eranu assai e mpurtanti diffirenzi tra l'unu e l'autru. Ci fici cchiù attinzioni e mi accorsi chi c'un pocu di travagghiu putevu circari di riarranciari li strofi e li siquenzi in modu tali di fari un puimettu diffirenti di l'autri, e cioè chi avissi un principiu e na fini, chiddu chi tutti l'auturi mancavanu. La raggiuni di lu puimettu aviri virsioni diffirenti era duvutu a lu fattu chi li diffirenti ricercatura avianu vinutu n cuntattu cu varianti differenti di lu puimettu, chi fu sempri tramannatu oralmenti, cantatu e ricitatu, e nun fu mai scrittu finu a lu 1872. L'interessi di st'auturi era nu nteressi littirariu-storicu. Chiddu chi iu ora vuleva fari era di arranciarlu in modu di daricci un sensu cronologicu pi dari a lu puimettu un principiu e na fini, e li sustituzioni farili veniri cussì vicini l'unu a l'autru di fari pariri veru la cuntinuità... nsumma comu cuntari un cuntu. Chistu avissi fattu arrabbiari li critici littirari (ora staiu spirannu troppu!), ma, criu, avissi piaciutu assai a lu populu a la larga.

    Ci vosi un bellu pezzu di tempu pi finiri lu pruggettu, anchi e sopratuttu pirchì nun avia tuttu lu matiriali chi mi abbisugnava pi fari na bona ricerca, e pi qualchi tempu lu lassai stari. Ntantu na cosa bella mi successi: vinni a cuntattu cu avutra littiratura Siciliana, e, versu lu 1990 o 1991, ebbi la furtuna di viniri a cunuscenza di un Club Culturali Sicilianu, a New York, chiamatu "Arba Sicula", e mi ci scrissi comu membru. Li publicazioni n Sicilianu e Ngrisi chi ricivivi mi graperu l'occhi grossi e mi ficiru sentiri umili a lu stissu tempu. Mpruvvisamenti vitti quantu dannu avia fattu iu a me stissu e quantu dannu avianu fattu a mia li programmi taliani. Cu chistu iu nun staiu parrannu mali di l'Italia, ca la vogghiu beni quantu la Sicilia. Purtroppu la pulitica e tanti avutri fatturi foru chiddi chi ànnu la curpa, nsemi a la genti di atorità chi ànnu sempri idei di vuliri nvintari arreri la rota.

    Mprovvisamenti la me vita passi cumpleta, ma troppu curta a lu stissu tempu: troppu curta pi gudiri di tutti li tesori di la Sicilia, ca nun ànnu mai statu sigreti. Ci arrivai tardu? Videmu. La Sicilia è un paisi ncredibili. La sô storia è sculpita ni li anguli cchiù rimoti di lu tempu. Siguiri la Sicilia attraversu tutta la sô storia è l'esperienza cchiù suddisfacenti pi ogni pirsuna, anchi si nun è un Sicilianu. W. Goethe Quannu visitò l'Italia e poi la Sicilia, dissi "L'Italia senza la Sicilia è nenti ".

    Tantu è diversificata la sô storia, chi si pô diri di essiri d'interessi glubali. Sparti di l'aiutu chi truvai cu avutri libri, mi giuvò l'aviri pigghiatu di curiusità lu computer, chi mi fu e mi è di granni aiutu. Cu lu computer mi veni cchiù facili produrri li mê idee e sarbarli senza aviri lu scantu chi mi scordu unni misi li carti, e nni lu stissu tempu mi duna aiutu, tramiti dischi di enciclopidia, a truvari cchiù prestu certi particulari nfurmazioni.

    Aiu pinsatu tanti voti comu pozzu fari conusciri l'amuri e l'intusiasmu chi aiu pi la Sicilia. L'orgogliu chi aiu di essiri parti, anchi scanusciutu, di la sô storia, di la sô littiratura, di li sô figghi. Comu fari pi spartirimi st'amuri e stu orgogliu cu tutti li Siciliani chi stannu nta li Stati Uniti? e pinsai, di novu, chi lu mezzu ci l'aiu nta li manu, ed è lu computer. Iu nun sugnu un viaggiaturi, comu dicinu, di lu " Ciber space", iu l'aiu a fari a sciarra cu stu mostru chi mi dici tanti voti ca chiddu chi fazzu è sbagghiatu, o nun voli fari chiddu chi ci dicu di fari...! Ma, truvari l'aiu la strata.

    Aiutatimi, purtamu a cunuscenza di tutti la gloria di la Sicilia. Viniti a mustrari a tutti la nostra matri terra. Damu la nostra fidi e lu nostru amuri a l' America di cui semu figghi aduttivi, ma nun nni scurdamu la nostra Matri di sangu.